Qauyrt jūmystan şarşaǧanda taza auaǧa şyǧyp, jasyl jelek arasynda seruendegenge ne jetsın?! Köpşılıktıŋ köŋıl sergıtıp, küikı tırlıkten bır sätke bolsa da tynyǧuyna mümkındık beretın saiabaqtar bügınde elordada köbeiıp keledı.
Künnen-künge körkeiıp, köz aldymyzda güldenıp kele jatqan bas şaharda jyldaǧy dästür boiynşa biyl da aulalar abattandyrylyp, saiabaqtar men skverler qalypqa keltırılude. Qalanyŋ barlyq audanynda soŋǧy jyldary 750-den astam aulalar men qoǧamdyq keŋıstıkter, saiabaqtar, svkerler men bulvarlar abattandyryldy. Tek, tūrǧyn alaptarda 300-ge juyq aulalar men qoǧamdyq keŋıstıkter jaŋartylyp, el igılıgıne ūsynyldy. Jaŋa Bas josparda qalany abattandyruǧa erekşe nazar audaryldy. Būl rette qalalyq saiabaqtar men skverlerdı qaita jöndeu, qala köşelerın kögaldandyru, qoǧamdyq keŋıstıkter men qasbetterdı bırkelkı dizain-kodqa keltıru jūmystary qolǧa alynuda. Qala äkımınıŋ aituynşa, jyl basynan berı elordada 42 aula jäne 2 qoǧamdyq keŋıstık jäne «Halyq qatysatyn biudjet» jobasy aiasynda 34 aula abattandyryldy.
Qazırgı taŋda tūrǧyndar bos uaqytty üide emes, taza auada ötkızudı qalaidy. Osy oraida, elordalyqtardyŋ seruen qūrar oryndary jeterlık. Olardyŋ otbasymen jiı baryp demalatyn süiıktı oryndarynyŋ bırı – ortalyq saiabaq. Būl – şyn mänınde bala-şaǧamen ǧana emes, dostarmen de aşyq aspan astynda bas qosyp, şynyǧyp, sportpen ainalysuǧa taptyrmas oryn. Mūnda qala qonaqtary men şahar tūrǧyndarynyŋ türlı attraksiondarǧa otyryp, oiyn avtomattarynda oinauyna, 7D ölşemdegı kinoteatryna, amfiteatrǧa baryp, basseinde jüzuıne, velosiped teuıp, jügıruıne jäne erke Esıl jaǧalauynda alaŋsyz seruendep, tiımdı demaluyna barlyq mümkındıkter qarastyrylǧan.
Jyl mausymdary auysqan saiyn saiabaqtyŋ ūsynar qyzyqtary özgerıp tūrady. Qysta ortalyq saiabaqta şaŋǧy teuıp, mūz aidynynda konkimen syrǧanau üşın qajettı şaŋǧy men konkidı, velosiped pen samokatty, rolikter men balalarǧa arnalǧan oiyn kölıkterın jalǧa aluǧa bolady. Būl saiabaqta är keluşınıŋ qalauy men taŋdauyna qarai däm ūsyna alatyn kafeler men meiramhanalar da jetkılıktı. Eresekterdı balalyq şaqqa jetelep, baldyrǧandarǧa köterıŋkı köŋıl küi syilaityn tättı maqta men balmūzdaq satatyn düŋgırşekter de öte köp.
Abai daŋǧyly men Jeltoqsan köşesınıŋ qiylysynan oryn tepken tūŋǧyş Prezident mūrajaiynyŋ janyndaǧy saiabaq aǧaşynyŋ moldyǧymen, iaǧni köleŋkesınıŋ köptıgımen erekşelense, Jeŋıs jäne Bögenbai batyr daŋǧyldarynyŋ qiylysynda ornalasqan «Aqjaiyq» saiabaǧy keluşılerın su būrqaqtarymen, 100 adamǧa arnalǧan amfiteatrymen, «Siqyrly labirint» landşaftyq instaliasiiasymen, tanym alaŋdarymen qyzyqtyrady. Sondai-aq saiabaqqa Keŋes Odaǧynyŋ batyry Mänşük Mämetovanyŋ eskertkışı erekşe körık berıp tūr. Al «Atatürık» saiabaǧy özınıŋ jaily jäne «jasyl» atmosferasymen tanymal. Özennıŋ janynda bolǧandyqtan, osy maŋda tūratyn qalalyqtar būl jerde seruendeudı qatty ūnatady.
Jyl saiyn körkeiıp, ädemı bolyp kele jatqan demalys ortalyqtarynyŋ qataryna Qonaev jäne Saraişyq köşelerınıŋ arasyndaǧy Diplomatiialyq qalaşyqta ornalasqan seruendeuge asa yŋǧaily skverdı, Euraziia ūlttyq universitetı janyndaǧy ūstazdar saiabaǧyn, Tölebaev pen Qordai köşelerınıŋ qiylysyndaǧy «Dostyq» saiabaǧyn, Tılendiev daŋǧylynyŋ boiyndaǧy
«Köktal» saiabaǧyn, Täşenev jäne Amman köşelerınıŋ qiylysynda ornalasqan Jambyl Jabaev atyndaǧy saiabaqty qosuǧa bolady.
Bas qalada saiabaqtar qatary jyl ötken saiyn artyp keledı. Aldaǧy uaqytta Astananyŋ 25 jyldyǧy künıne orai Egemen Qazaqstan köşesı men Kenesary köşesınıŋ qiylysynda «Jurnalister» saiabaǧy boi köteredı. Bolaşaqta būl tek qalamgerler bas qosatyn oryn emes, köpşılık tynyǧatyn qūtty mekenge ainalary anyq.
