Jyldar boiy myŋdaǧan elordalyq tūrǧynnyŋ jüikesın jūqartqan üleskerlık qūrylys problemasy jüielı türde şeşılıp keledı. Jaqynda sondai qūrylysy segız jylǧa sozylǧan – «Jaǧalau-3» tūrǧyn üi keşenınıŋ 30-blogy paidalanuǧa berılıp, jüzdegen otbasy quanyşqa keneldı. Sonymen qatar elordada halyqtyŋ äleumettık osal toptary sanatyndaǧy 300-den asa otbasy jaŋa päter kıltın aldy.
«Jaŋa jyl qarsaŋynda Nūr-Sūltannyŋ «saqaldy» qūrylystarynyŋ bırıne nükte qoiyldy! Būl qūrylys segız jylǧa sozylǧan – «Jaǧalau-3» TK, 30-blok. Üidıŋ özı paidalanuǧa berıldı. Qazır tūrǧyndarǧa köpten kütken päterlerıne tırkeuge tūruyna, emhanalarǧa, balalaryn mektepke, balabaqşaǧa tırkeuıne mümkındık beretın tehnikalyq pasporttary ülestırılıp jatyr» dep jazdy qala äkımı.
Aituynşa, būl tūrǧyn üi keşenınde alaiaqtarǧa aldanyp qalǧan 600-den asa otbasy bar.
«Üleskerlermen ötken alǧaşqy kezdesuımızde ūzaq kütken päterlerıne qonystana alatynyna senımsızdık tanytqan edı. Alaida qūrylysty aiaqtau üşın jūmysymyzdy kezeŋ-kezeŋımen jürgızdık. Tüitkıldı mäseleler köp boldy. Qazır ıstıŋ basym bölıgı şeşıldı, tek mamandar atqaratyn keibır tehnikalyq jūmystary ǧana qaldy» dep jazdy qala äkımı Altai Kölgınov instagram paraqşasynda.
