Elordadaǧy «Qazaqstan» ortalyq konsert zalynda Astana äkımdıgı men QR Mädeniet jäne sport ministrlıgı ärı dauylpaz änşı atyndaǧy Mädeniet jäne önerdı qoldau qorynyŋ ūiymdastyruymen «EKSPO-2017» halyqaralyq mamandandyrylǧan körmesınıŋ aiasynda «Ermek Serkebaevqa arnalady» atty älemdık opera jūldyzdarynyŋ gala-konsertı öttı.
Aituly şaranyŋ aşylu saltanatynda QR Mädeniet jäne sport ministrı Arystanbek Mūhamediūly talantty tūlǧanyŋ ömırı men önerınen söz qozǧady.
– Osydan tura elu jyl būryn, iaǧni 1967 jyly, älemdık körme aiasynda kanadalyq Monrealda bızdıŋ äigılı aǧamyz Ermek Serkebaev än şyrqap, qazaq önerın älemge tanytqan edı. Uaqyt qalai jüirık. Mıne, sol elu jyldan keiın elımızde ötıp jatqan EKSPO halyqaralyq körmesı aiasynda tau tūlǧaly azamatty eske alu keşın ötkızıp otyrmyz. Asyl aǧamyzdyŋ esımı eş ūmytylmaidy, öner joly mäŋgı jalǧasa beredı, – dedı ministr.
Odan keiın tektınıŋ tūiaǧy, belgılı «A’Studio» tobynyŋ muzykanty, prodiuser Baiǧali Serkebaev äkesı jaiynda qysqaşa estelık aityp, bügıngı keşke qatysyp otyrǧan önerpazdardyŋ bärı älem sahnalarynda öner körsetıp, jūrtşylyqty moiyndatyp jürgen änşıler ekendıgıne toqtalyp, mädeni şarany ötkızuge ūiytqy bolǧandarǧa alǧysyn jetkızdı.
Konsertke ardaqty azamatpen ömırde jaqyn aralasqan kino, öner, opera qairatkerlerı qatysty. Kino demekşı, bız Serkebaevty tek opera änşısı dep qana emes, ataqty rejisser Şäken Aimanov tüsırgen «Bızdıŋ süiıktı därıger», «Än şaqyrady» jäne «Taqiialy perışte» sekıldı bırqatar körkem filmderde aişyqty rölderdı somdaǧan tamaşa akter retınde de jaqsy köremız.
Konsert barysynda älemnıŋ üzdık dauys iesı atanǧan, Gremmi syilyǧynyŋ ekı dürkın iegerı, Mariia teatry men Parij operasynyŋ solisı İldar Äbdırazaqov, Mariia teatrynyŋ solisı Asmik Grigorian, ülken teatrdyŋ jetekşı solisı, Plasido Domingonyŋ «Operaliia-2016» konkursynyŋ jeŋımpazy Bogdan Volkov, Ülken teatrdyŋ jetekşı solisı İgor Golovatenko, Mariia teatrynyŋ solisı Sergei Skorohodov, mäskeulık «Novaia Opera» teatrynyŋ solisı Aleksei Tatarinsev, Ülken teatrdyŋ solisı Agunda Kulaeva jäne «Astana Opera» teatrynyŋ jetekşı solisı Saltanat Ahmetova, «Astana Opera» teatrynyŋ jetekşı solisı Sündet Baiǧojin, qalalyq Memlekettık akademiialyq filarmoniiasynyŋ änşısı Azamat Jyltyrközov sekıldı esımderı jalpaq elge tanylǧan talanttar öner körsettı. Joǧary deŋgeide ūiymdastyrylǧan şaraǧa kelgen köpşılık klassikalyq muzykanyŋ bal şyrynyn jūtyp, esten ketpes äser aldy. Sonymen bırge, telebeine arqyly daryndy tūlǧamen közı tırısınde dos köŋılmen syilasyp, şynaiy ärıptes bolǧan İosif Kobzon, Bibıgül Tölegenova, Armen Djigarhanian, Tamara Siniavskaia jäne Lev Leşenko syndy tanymal azamattar Serkebaevtyŋ sirek kezdesetın talanty men azamattyǧyn eske alyp, jinalǧandardyŋ jüregın tebırenttı.
Keş soŋynda Ermek aǧamyz älemnıŋ talai sahnasynda qaitalanbas dauysymen jarqyrata şyrqaǧan «Sevil şaştarazy» operasyndaǧy Kavatino Figarony Sündet Baiǧojin, Azamat Jyltyrközov, İldar Äbdırazaqov jäne İgor Golovatenko tamaşa oryndap, halyqtyŋ ystyq yqylasyna bölendı.
Azamat ESENJOL
