Şılıŋgır şıldedegı şydatpaityn ystyq tamyzda da jalǧasatyn türı bar. Mūndaida bärımız suyna şomylyp, rahattanatyn jer ızdeimız. Baratynymyz – Burabai. Köretınımız – keptelgen kölıkter, adamǧa tolǧan jaǧajailar, «ūşqan» baǧalar, oŋalmaǧan servis jäne taǧy basqalar. Burabaidaǧy janyŋdy auyrtatyn jaittyŋ bırı – tazalyqtyŋ joǧy, ekomädeniettıŋ tömendıgı. Äsırese, Kökşetaudyŋ saiasyndaǧy seksen köldıŋ köbısınıŋ suy lastanyp barady! Būl – bölek äŋgımenıŋ özegı.
Şomylatyn suy jūmsaq, taza köl ızdeseŋızder, Şortandydan (orysşa Şuchinsk dep atalyp jür) 6-7 şaqyrym jerdegı Aqylbai auylynyŋ maŋyndaǧy Kışı Şabaqty kölıne baryŋyzdar. Būl köldıŋ suy jazdyŋ ystyq künderınde 24-28 gradusqa deiın jylidy. Burabaidaǧy eŋ ūzyn kölderdıŋ bırı, ūzyndyǧy 13,6 şaqyrymǧa, jaǧalauynyŋ ūzyndyǧy 29,2 şaqyrymǧa sozylyp jatyr. Köldıŋ suy tūzdy bolǧandyqtan, terıŋızge maidai jaǧady! Jaǧasy qūmdy, künge qyzdyrynuǧa öte qolaily. Eŋ bastysy, saf aua, kök maisa, tau men köl, janǧa jaily tynyş jer! «Şabaqty» dep aty aityp tūrǧandai, kölden alabūǧa, aqtaban, kökserke, sazan, şabaq jäne bürge balyq aulauǧa bolady.
Demaluşylarǧa körsetıletın qyzmetı turaly az-kem aqparat bereiın. Aqylbai auylynyŋ şetınde, tura köldıŋ jaǧasynda bır tamaşa demalys orny bar. Ärı ūlttyq, ärı zamanaui demalys dästürlerı bır jerge jinaqtalǧan. Qalauyŋyz boiynşa, naǧyz qazaqtyŋ kiız üiınde, qazaqy aǧaş tösekte, tündıkten tüsken Ai säulesıne qarap jatyp, ūiqyŋyzdy alaŋsyz qandyrasyz (bū ǧajaiypty tek közben körıp, köŋılmen sezınu kerek). Eger zamanaui nömırde qonamyn deseŋız, aǧaştan jasalǧan üiıŋız (därethanasy, duşy ışınde) de daiyn. Üş nemese bes jūldyzdy qonaqüiden kem emes.
As-suyŋyzdy ala barsaŋyz, qalauyŋyzdaǧy tamaqty (ülken as, quyrdaq, sırne, käuap jäne t.b.) pısırıp ışesız. Keşkılık alaudyŋ janynda bi bilep, terıŋızdı bır şyǧarasyz. Odan keiın, rahattanyp tüsetın monşaŋyz daiyn! Monşadan şyǧyp, salqyn suǧa şaiynyp alyp, tüngı aspandaǧy jūldyzdardy sanai berıŋız! Demalys ornyndaǧy üilerdıŋ jalǧa alu qūny qymbat emes. Adam qarasy qalyŋ. Tamyzdyŋ tamyljyǧan taŋyn qarsy aluǧa, tau bökterındegı Şabaqty kölınıŋ äsemdıgıne tamsanyp qaluǧa asyǧyŋyzdar, dostar! Būl sondai-aq dästürlı toi-dumandardy, otbasylyq basqosulardy tabiǧattyŋ aiasynda atap ötuge taptyrmaityn jer!
Eŋ bastysy, suy taza kölge şomylyp, salqyndaǧan kezde: «Myna jer rasynda da keremet eken!» dep aidaryŋyzdan jel esıp, sudan şyqqyŋyz kelmei, jüzi beresız! Eger otbasymen bırge, ia bolmasa ärıptestermen bırge jazǧy demalysyŋyzdy älı josparlamaǧan bolsaŋyz, Şabaqtyǧa şomylyŋyz! Ondaǧy demalys ornynyŋ qojaiyny Janar Jailaubaiqyzymen (+7 775 071 8727) habarlasyp, demalatyn künderıŋızdı aldyn ala eskertıp qoisaŋyzdar, nūr üstıne nūr bolar.
