Elordada bır aptaǧa juyq uaqyt dürıldegen «Şabyt» HVIII şyǧarmaşyl jastardyŋ halyqaralyq festivalınıŋ qorytyndysy şyǧaryldy. Elımızdıŋ tükpır-tükpırınen jäne älemnıŋ Resei, Qytai, Polşa, Özbekstan, Qyrǧyzstan sekıldı memleketterınen kelgen 388 ümıtkerdıŋ arasynda dara şyqqan daryndylar Kongress-holda ötken gala-konsert barysynda ükılendı.
Biylǧy festival baǧdarlamasyna bes atalym engızıldı. Solardyŋ ışınde «Müsın» jäne «Sändık-qoldanbaly öner» atty ekı bölımnen tūratyn «Beineleu önerı» atalymynda bäseke küştı boldy. Oǧan 150 talapker qatysuǧa niet tanytty. Qorytyndysynda müsınşılerdıŋ arasynda kerekulık Daniiar Sarbasov top jarsa, qolönerşıler bäsekesınde atyraulyq Altynbek Esenǧaziev qarsylastarynan qara ozdyrdy.
Osy jyly alǧaş ret ötken «Sporttyq bal biı» atalymyna 14 jūp qatysty. Qazaqstanǧa qaraǧanda būl öner türı özge elderde jaqsyraq damyǧan siiaqty. Bal bilerı boiynşa halyqaralyq därejedegı töreşı litvalyq Iýozas Aleksandravichius bas bäigenı Reseidıŋ Krasnoiarsk qalasynan kelgen Roman Zotov pen Anna Pozdniakovanyŋ jūbyna bailap berdı.
«Sirk önerı» atalymynda ärtürlı şyǧarmaşylyq ūjymdary saiysqa tüstı. Mūnda 45 jyldyq tarihy bar Almatydaǧy Qazaq memlekettık sirkınıŋ Serık Boraşev jetekşılık etetın akrobattar toby bas jüldenı ielendı. Būl atalymda kezınde talai qazaqty siqyrşylyq önerımen bauraǧan Baltabek Jūmaǧūlov atyndaǧy arnaiy diplomnyŋ taǧaiyndalǧany janymyzǧa jyly tidı. Baltabek marqūm bas qalada sirk önerınıŋ negızın qalaǧan edı. Bırneşe jyl būryn «Astanalyq sirktı» sonyŋ atyna beru turaly mäsele de qozǧalǧan. Alaida, ol sol qalpynda tūr. Äzırge elordalyq öner ūjymynyŋ onyŋ atyndaǧy diplomdy ielengenın köŋılge medeu tūtamyz.
Ūltymyzdyŋ körnektı aqyny Qadyr Myrza Älı soŋynda qanatty sözge ainalǧan talai jyr tarmaqtaryn qaldyrdy. Sonyŋ bırı – «Naǧyz qazaq qazaq emes, naǧyz qazaq – dombyra». Būl söz «Halyqtyq muzyka» atalymyna qatysuşylardyŋ ūrany ıspettes bolyp estıldı. Atalmyş atalym ekı bölımge bölındı. «Dombyramen än aitu» bölımınde san dodada topty jaryp şyqqan dästürlı änşı, elordalyq Jaqsygeldı Maiasarovtyŋ baby men baǧy kelıskenınıŋ kuäsı boldyq. Sondai-aq, būl bölımde qazaq än önerınde şaşasyna şaŋ jūqtyrmaǧan Däneş Raqyşev atyndaǧy atauly diplom men biyl tuǧanyna 90 jyl tolǧan ataqty küişı-kompozitor Nūrǧisa Tılendiev atyndaǧy arnaiy syilyq pen diplom öz iegerlerın tapty.
«Dombyra» bölımıne qatysqan önerpazdar da mol oljaǧa keneldı. Mūnda bas jülde astanalyq Säken Bekjanovqa būiyrsa, bırınşı, ekınşı, üşınşı oryndardan bölek dombyraşylar Qūrmanǧazy Saǧyrbaiūly, Tättımbet Qazanǧapūly, Baijıgıt, Äşımtai, Nūrǧisa Tılendiev syndy küi önerınıŋ maitalmandary atyndaǧy jüldenı qanjyǧalaryna basty.
«Klassikalyq muzyka» atalymy da bırneşege bölındı. «Akademiialyq än aitu» bölımınde astanalyq Şahrizada Tynyştyq top jardy. Mūnda Ermek Serkebaev pen Küläş Baiseiıtova atyndaǧy arnaiy diplomdar da tabystaldy. «Fortepiano» bölımı boiynşa almatylyq Rabiǧa Düisenbaeva bas jüldenı ielendı. «Alt, violonchel, kontrabas» bölımderın bır arnaǧa toǧystyrǧan saiysta Pavel Romanenko jeŋımpaz bolyp tanyldy. Sondai-aq, Evgenii Brusilovskiidıŋ «Bozaiǧyr» şyǧarmasyn jäne Jan-Batist Sebastian Brevaldıŋ sonatalaryn üzdık oryndaǧandar diplommen marapattaldy. Ǧaziza Jūbanova atyndaǧy atauly diplom iegerı de anyqtaldy.
Biylǧy festivalde özge ümıtkerlerge qaraǧanda «Skripka» bölımıne qatysqan Maqsat Jüsıpovtıŋ esımı daralandy. Ol osy bölımde ozyp şyǧuymen qatar festivaldıŋ eŋ ülken jüldesı – QR Prezidentınıŋ kubogyn ielendı. Kubokty oǧan Astana qalasy äkımınıŋ orynbasary Ermek Amanşaev tabystady.
Festivaldıŋ jabyluyna bailanysty ötken gala-konsertte onyŋ jeŋımpazdarymen qatar «Turkvizyon – 2015» halyqaralyq baiqauynda elımızdıŋ namysyn qorǧaityn «Orda» toby men estrada änşısı Marjan Arapbaeva jinalǧandarǧa köterıŋkı köŋıl-küi syilady.
Amanǧali QALJANOV
