Kögıldır köktemdı qanatyna qondyryp jetken qūstarmen bırge qar qūrsauynan arylǧan tūmsa tabiǧat ta tülei bastaidy. Osy bır ǧajap körınıstıŋ sänın taldary sybdyr qaqqan saiabaqtar tolyqtyrady. Astanaǧa aǧylǧan halyq kelbetı köz süisınter ǧimarattardy ǧana emes, jasyl jelek jamylǧan saiabaqtardy da armansyz aralaǧylary keledı. Kündelıktı küikı tırşılıkten aryltyp, jan rahatyn sezındıretın saiabaqtar elordamyzdyŋ sänıne ainalǧaly qaşan. Biyl da qala tūrǧyndary men qonaqtarynyŋ qydyruyna arnalǧan bes bırdei qalalyq saiabaq jazǧy jūmysyn bastady. Qala körkıne sän qosyp tūrǧan Astana, Jerūiyq, Studentter, Prezident jäne Arai saiabaǧynyŋ jaŋa kelbetımen bız de tanysyp qaitqan edık.
Astanalyq saiabaqta byltyr da bırneşe özgeşelıkter bolǧan edı. Pavilondar sany men qoǧamdyq tamaqtanu oryndary köbeiıp, olardyŋ barlyǧy qazırgı zamanǧy arhitekturalyq talaptarǧa sai jasaldy. Al gülzarlar men gülder saiabaqtyŋ ajaryn aşyp, jaŋaşa reŋ berdı. Būl saiabaqtyŋ artyqşylyǧy – kielı qūs – aqqulardyŋ aidynda jüzıp jüretındıgınde. Biyl kielı qūstarǧa qara aqqular men qaramoiyn aqqular qosylypty. Basqa toǧannan mandarinka üirekterınıŋ tört jūbyn da körıp qaldyq. Jaiau jürgınşıler köpırı jaǧynan kıreberıs te aitarlyqtai özgerıske ūşyrapty. Onda ädemı müsınder men basqa da şaǧyn arhitekturalyq pışınder qoiylǧan. Türlı ekstrimge äues jandar üşın «Amerikalyq syrǧanaq» jäne «5-element» qyzmet körsetse, balalarǧa «Zymyranda ūşu» siiaqty attraksiondar erekşe äser syilady. Saiabaqtyŋ ortalyq alleiasynda, iaǧni Tūran daŋǧyly jaǧynda «jasyl energiiany» qoldanudyŋ naqty mysaly retınde sigvei men giroskuterlermen syrǧanauǧa da mümkındık bar.
Biyl jazda ötetın basty şara – «EKSPO-2017» halyqaralyq körmesı bolǧandyqtan, pavilondar men tūraq aimaqtary körmenıŋ taqyrybyna sai bezendırılıptı. EKSPO stilındegı animatorlar körermenderge köterıŋkı köŋıl küi syilady. Taǧy da bır aita keterlıgı, Astanalyq saiabaq öz qonaqtaryna ötkızıletın mädeni şaralar, oiyn-sauyqtar men demalys türlerı turaly aqparatpen kıtapşalar taratty.
Al Jerūiyq saiabaǧyndaǧy «Tosyn syi» jäne «Jūldyzqūrt» siiaqty ırı attraksiondar balalar üşın ülken jaŋalyq boldy. Elorda qonaqtaryna jaŋa formattaǧy oiyn-sauyqtar Studenttık saiabaqta da ūiymdastyryldy. «Jaz-2017» saiabaq mausymy üşın arnaiy ädemı installiasiialarmen «Saiabaqtyŋ jetı ǧajaiyby» atty 7 bıregei taqyryptyq baǧdarlama äzırlenıptı. Osy boiynşa 40 käsıpqoi artist, bişıler men akrobattar, animatorlar jas körermennıŋ qoldauymen jaz boiy qonaqtarǧa köterıŋkı köŋıl küi syilaityn bolady.
Balalarǧa arnalǧan qazaq änderı men bilerınıŋ teatrlandyrylǧan buffonadasyn Balapan-şou ūiymdastyrsa, balalar tanymal multfilmderdegı kışkentai keiıpkerlermen Minon-şou şarasynda tanysty. Aldar Köse turaly ertegınıŋ keiıpkerlerı Alaqai-şou äzıl-syqaq qoiylymymen jäne akrobatikalyq nomerlermen öz körermenderın quantyp, şoudyŋ soŋy «Qara jorǧamen» aiaqtalady.
Robottar men köşe bilerın ūnatatyndar EKSPO-şoudy tamaşalady. Turistık şouda bolaşaq energiiasy turaly qoiylym körsetılıp, jaryqdiodty kostiumder kigen ärtıster biledı. Baǧdarlama balalarǧa da, olardyŋ ata-analaryna da qatty ūnady.
Osylaişa, bas qalanyŋ bes būryşynda dumandatyp dübırlı keşpen bastalǧan saiabaqtardyŋ aşyluy astanalyqtar üşın erekşe mereke boldy. Endı jaz boiyna elordalyq saiabaqtardyŋ qonaqtary bırqatar qyzyqty şaralardyŋ kuäsı bolǧaly otyr. Ūiymdastyruşylardyŋ aituynşa, Astana saiabaqtarynda mūndai erekşelıkter būryn-soŋdy bolǧan emes. Jaŋa mausymda qalalyq saiabaqtarda köterıŋkı köŋıl küi syilaityn şou baǧdarlamalary, teatrlandyrylǧan qoiylymdar, miuziklder syndy türlı şaralar köpşılık nazaryna ūsynyldy. Jaz boiy jalǧasyn tabatyn keremet keşter 5 saiabaqta künıne ekı ret 100 künde 1000 şara bolyp ötedı. Mıne, ǧajap!
Güljan RAHMAN
