Elordada Densaulyq saqtau basqarmasynyŋ alqa otyrysy bolyp öttı. Jiynda aq halattylarǧa qatysty özektı problemalar talqylandy.
Qazırgı künı atalǧan vedomstvo qarauynda 38 medisinalyq ūiym bar. Onda 3 myŋnan asa därıger men 6 myŋdai medbike jūmys ısteidı. Bıraq 500-dei maman älı de tapşy. Bılıktı kadrlardy tartu üşın aldaǧy uaqytta otbasylyq tiptegı jataqhanalar salu josparlanyp otyr. Sondai-aq, joǧarydaǧy mäselenı şeşude eŋbekaqy kölemın köteru de ülken yqpal etpek. Soŋǧy 5 jylda medisina qyzmetkerlerınıŋ jalaqysy 40 paiyzǧa ūlǧaiǧan.
Şipagerlerdıŋ sauattylyǧyn arttyru boiynşa da bıraz tırlık tyndyryldy. «Salamatty Qazaqstan» baǧdarlamasy ıske asyrylǧan jyldary densaulyq saqtau salasynyŋ 10 myŋnan astam mamany şeteldık jäne jetekşı otandyq klinikalarǧa baryp, täjıribe almasty. Byltyr elımızdegı ǧylymi ortalyqtarda, qiyr jäne taiau şet memleketterde 4250 därıger men meiırbike arnaiy kurstan öttı.
Basqosuǧa jinalǧandar ana men bala densaulyǧyna da basa nazar audardy. Astanadaǧy perinataldy ortalyqtardyŋ 80 paiyzy sapaly zamanaui tehnikamen jabdyqtalǧan. Sonymen qatar, 10 orynǧa eseptelgen neonataldy hirurgiia ortalyǧy qūryldy. Bügıngı taŋda jürek aqauymen düniege kelgen 600-ge juyq säbige osy ortalyqta sättı ota jasaldy. Osynyŋ barlyǧy demografiialyq körsetkışterge oŋ äserın tigızedı. Būǧan soŋǧy jyldary bala tuu körsetkışınıŋ 36 paiyzǧa öskenı dälel.
Şahar halqynyŋ 133 myŋǧa köbeiuı densaulyq saqtau nysandaryna tüsetın jüktemenı aitarlyqtai auyrlatady. Soǧan bailanysty Astanada 9 jaŋa auruhana aşyldy. Olardyŋ tügelınde emdeu men diagnostikalaudyŋ tyŋ ädısterı engızıldı.
Der kezınde atqarylǧan şaruanyŋ arqasynda qala därıgerlerı 15 pen 49 jas aralyǧyndaǧy adamdar arasynda AQTQ virusynyŋ taraluyn 100 myŋ kısıge şaqqanda 0,14 şegınde saqtai aldy. Al obyr aurularyn erte kezeŋde anyqtau jaǧdailary 100 myŋ adamǧa şaqqanda 55,7 körsetkıştı qūrady. Soŋǧy 5 jyl ışınde tuberkulezben auyru faktılerı 57,5 paiyzǧa tömendegen. Qan ainalymy jüiesı aurularymen küres nätijesınde ötkır miokard infarkı 32,3 paiyzǧa kemıdı.
Astanalyq densaulyq saqtau basqarmasy ökılderınıŋ aituynşa, qala tūrǧyndaryn medisinalyq qyzmettermen qamtu boiynşa jürgızıletın jūmystar jalǧasady.
B. MARATQYZY, astana-akshamy.kz
