Şala tuǧan şaqalaqqa şaqtalǧan
Elordada ötken jyly bır jarym myŋ säbi şala tuǧan. Olardyŋ adam qataryna qosylyp ketuı bır jylǧa deiıngı kütımıne bailanysty bolmaq. Osy rette, №2 köpbeiındı qalalyq auruhanada Katamnez jäne oŋaltu bölımşesı aşyldy.
Jaŋa bölımşede şala tuǧan şaqalaqty oŋaltuǧa tiıstı medisinalyq em-şara körsetılıp, analaryn säbidıŋ erekşe kütımıne beiımdeitın bolady. Katamnez degen ūǧymnyŋ özı täuekelder tobyndaǧy närestelerge arnalǧan medisinalyq kömektı ūiymdastyru degendı bıldıredı. Mūndai bölımşe Astana qalasy boiynşa alǧaş ret aşylyp otyr jäne kem degende jylyna 260 balany qabyldai alatyn bolady.
Äzırge näresteler perinataldyq ortalyqtardyŋ joldamasymen osynda em alady. Al aldaǧy uaqytta şala tuǧan balalardy oŋaltu memlekettık tapsyrys negızınde portalǧa engızıledı. Ol kezde memleket esebınen em jüredı, äzırşe bölımşede säbilerge tegın qyzmet körsetıledı.
İvan Li,
auruhananyŋ bas därıgerı:
– Bölımşede reabilitolog, pediatr, nevrolog, hirurg mamandary balalardyŋ densaulyǧyn qadaǧalap, ultradybystyq zertteu jürgızıledı. Qazırgı zamanǧy emdeu ädısterı arqyly salmaǧy jarty kelıden asatyn şala tuǧan şaqalaqtardyŋ et alyp, qalypty damuyna jetuın qamtamasyz etedı. Būl – stasionarlyq klinika. Mūnda anasy balasymen bırge kündız barlyq em türın ala alady. Qajet bolǧanda osynda qona jatyp em aluǧa jaǧdai jasalǧan, – deidı.