Beibıtşılık jäne kelısım saraiynda Şämşı Qaldaiaqov atyndaǧy VI halyqaralyq än laureattaryn marapattau räsımı ötıp, şara soŋy gala-konsertke ūlasty. Ūltymyzdyŋ bırtuar kompozitorynyŋ ölmes tuyndylary qalyqtaǧan keşke QR Memlekettık hatşysy Gülşara Äbdıqalyqova, Şämşınıŋ zaiyby Jämila, ūldary Äbılqasym men Mūhtar Qaldaiaqovtar qatysty.
– Biyl tuǧanyna 85 jyl tolyp, qazaq änınıŋ kögınde öşpes ız qaldyrǧan Şämşı Qaldaiaqovtyŋ änderı jarty ǧasyrdan astam uaqyt keŋ-baitaq dalamyzdy terbep keledı. «Qazaq valsınıŋ korolı» atanǧan kompozitor ūlttyq muzykamyzǧa Europanyŋ vals yrǧaǧyn alyp kelıp, qazaq än önerın baiyta tüstı. Özıne laiyq marapatqa da ie boldy. Qazaqstan Prezidentı Nūrsūltan Nazarbaevtyŋ Jarlyǧymen Şämşı Qaldaiaqovqa 1991 jyly «Halyq ärtısı» ataǧy berıldı. 2006 jyly onyŋ «Menıŋ Qazaqstanym» änı elımızdıŋ memlekettık änūranyna ainaldy. Al, 2010 jyly ol QR Memlekettık syilyǧynyŋ laureaty atandy.
Qazır Elbasy aldymyzǧa ülken maqsattar qoidy. «Mäŋgılık el» ideiasyn jüzege asyramyz dep otyrmyz. Ol üşın patriottyq sezımımız küştı boluy kerek, halqymyzdy, elımızdı süiuımız qajet. Osy maqsatqa Şämşınıŋ änderı arqyly jete alamyz dep oilaimyn. Ekı jyldan keiın elımızde älemdık aituly uaqiǧa – «EXPO 2017» halyqaralyq körmesı ötedı. Sol körmede qazaq mädenietı barynşa körınuı kerek. Qai öner salasy bolsyn qamtylyp, tanyluy tiıs. Ol jerde Şämşı Qaldaiaqovtyŋ änderı de şaryqtaidy dep senemın, – dedı Memlekettık hatşy.
Biylǧy festivaldıŋ ırıkteu kezeŋınen on bes änşı öttı. Bas jülde elordadaǧy Qazaq ūlttyq öner universitetınıŋ klassikalyq än aitu önerı kafedrasynyŋ studentı Ūlpan Äbdıkärımovaǧa būiyrdy. 1000 000 teŋge aqşalai syilyqty oǧan Memlekettık hatşy G. Äbdıqalyqova tapsyrdy. Ūlpan Şämşınıŋ aqyndyq önerınen de habar beretın «Qūşaq jaiǧan qandai adam?» änıne salyp, zor dauys iesı ekenın körsettı.
Körermender qazaqtyŋ zaŋǧar jazuşysy Mūhtar Äuezov «HH ǧasyrdyŋ töbesınen tamyp tüsken lirika» dep baǧa bergen «Aq maŋdailym» änıne qol soqty. Festivaldıŋ qazylar alqasynyŋ töraǧasy, QR Halyq ärtısı, «Men Şämşı men Nūrǧisanyŋ jekemenşık änşısı edım» deitın Nūrǧali Nüsıpjanov «Terıskei» änın şyrqap, dauysynyŋ älı de babynda ekenın tanytty. Halqymyzdyŋ ataqty opera änşısı Maira Mūhamedqyzy «Ana turaly jyr» änımen tamsantty. QR eŋbek sıŋırgen ärtısı Maira Iliiasova «Moiynqūmnyŋ», QR eŋbek sıŋırgen qairatkerı Hadişa Şalabaeva «Otyrardaǧy toidyŋ» samiian samalymen jelpıdı. Olarǧa qosa Marjan Arapbaeva, Bauyrjan İsaev, Almas Kışkenbaev syndy belgılı estrada änşılerı, «Menıŋ Qazaqstanym – 2014» halyqaralyq än festivalınıŋ bas jüldegerı Qanatbek Aibek Şämşı änderın şaryqtatty.
Festival maqsattarynyŋ bırı – kompozitordyŋ belgısız änderın jaryqqa şyǧaru. Būl tūrǧydan alǧanda, ekınşı oryn iegerı oŋtüstık qazaqstandyq «Tenor» duetı aitqan Şämşınıŋ «Bır än» tuyndysy jaŋalyq boldy. Bırneşe jyl būryn belgılı änşı Jūbanyş Jeksenūly tanytqan «Süimegender saǧynbaidy» änı de jas buyn änşılerdıŋ repertuaryna ene bastapty.
Aitpasqa bolmas «ättegen-ailar da» boldy. Üşınşı oryn iegerı Qyrǧyz Respublikasynan kelgen Niiaz Qasymov «Syǧan serenadasyn» şyrqar aldynda ännıŋ sözın jazǧan adam retınde İsrail Saparbaidyŋ esımı atalyp kettı. İsrail – änmen attas dramanyŋ avtory, al atalǧan än mätının körnektı aqynymyz Qadyr Myrza Älı jazǧanyn qaperge salǧymyz keledı. Keibır änşılerdıŋ än sözderın dūrys jattamaǧany da qaryn aştyrdy. Basqa-basqa emes, Şämşınıŋ än mätınderın jatqa bılmeu ülken olqylyq dep oilaimyz.
Festivaldıŋ şymyldyǧy «Menıŋ Qazaqstanym» änımen jabyldy. Barşa jūrt elımızdıŋ änūranyna ainalǧan būl tuyndyny QR eŋbek sıŋırgen qairatkerı Azamat Jyltyrközovpen bırge şyrqady.
Amanǧali QALJANOV
