«Ūlttyq muzeige syi-tartu» şarasy qolǧa alynǧaly atalmyş mädeni oşaq jaqsylardan qalǧan nebır qūndy jädıgerlermen tolyqty. Mäselen, muzei qoryna qazaq valsınıŋ korolı atanǧan Şämşı Qaldaiaqovtyŋ pianinosy qosyldy.
«Kuban» atalatyn būl muzykalyq aspapty kompozitorǧa 1965 jyldyŋ 4 aqpanynda Şymkent jastary syiǧa tartqan. Jalpy, bala jasynan muzykaǧa qūmar bolǧan Şämşı pianinoda oinaumen qatar dombyra şertıp, syrnaidy da tartqany aitylady. Auylyna kelgen syǧan jıgıtınen mandolinany satyp alǧany jaily da derek bar. Qazaqstannyŋ eŋbek sıŋırgen qairatkerı Altyn İmanbaeva Şämşı mekteppen qoştasu keşınde Latif Hamididıŋ «Būlbūl» änın mandolinamen oryndap, auyldastarynyŋ aldynda mereiı öskenın jazady.
Şämşınıŋ artynda 300-ge juyq än qaldy. Sonyŋ bırazy qazır Ūlttyq muzeide tūrǧan pianinomen şyǧarylǧan şyǧar dep topşylaimyz. Aitpaqşy, kompozitor būl muzykalyq aspapty syiǧa alǧan jyly Qazaqstan Komsomoly syilyǧymen marapattaldy. Al 1991 jyly Halyq ärtısı atandy. Kompozitordyŋ ǧūmyry osydan 26 jyl būryn osy aqpan aiynda üzıldı. Ömırınıŋ soŋǧy jyldary kigen qaraköl börıgı de Astanadaǧy muzeide saqtauly. Oǧan alda keŋırek toqtalatyn bolamyz.
Amanǧali QALJANOV
