Jaqynda Astana qalasy memlekettık akademiialyq filarmoniiasynyŋ Qazaq orkestrı HH konserttık mausymyn aşty. Osyǧan orai Kongress-holda körnektı qazaq kompozitory Sydyq Mūhamedjanovty eske aluǧa arnalǧan «Şattyq Otany» konsertı öttı.
KSRO jäne Qazaq SSR halyq ärtısı, Memlekettık syilyqtyŋ laureaty Sydyq Mūhamedjanov – respublikamyzdaǧy muzykalyq mekteptıŋ negızın qalaǧan kompozitorlardyŋ bırı. Artyna mol mūra qaldyrǧan şyǧarmaşylyq iesı operalardy, simfoniialardy, oratoriialardy, änderdı, romanstardy tudyryp, horlar men konsertterge, dramalyq qoiylymdar men kinofilmderge arnap muzyka jazdy. Konsertte filarmoniia ūjymy osynyŋ bärın qamtuǧa tyrysty.
Qazaq orkestrınıŋ oryndauyndaǧy kompozitordyŋ «Qazaq uvertiurasy» şyǧarmasymen aşylǧan konsert ärı qarai «Qyz quu», «Klassikalyq küi», «Şattyq Otany» simfoniialaryna, «Mereke» poemasyna jalǧasty. Orkestrdıŋ bas dirijerı jäne körkemdık jetekşısı, QR eŋbek sıŋırgen qairatkerı, professor Aitqali Jaiymov pen QR Mädeniet qairatkerı Nūrlan Bekenov muzykanttarǧa būl tuyndylardy şeber oinata bıldı.
Basynan aiaǧyna deiın orkestrdıŋ süiemeldeuımen ötken keşte filarmoniia änşılerı de jarqyrap körındı. Sydyq Mūhamedjanovtyŋ «Qazdar qaityp barady» änın oryndaǧan QR eŋbek sıŋırgen qairatkerı Qiiaqbai Asanbaev körermenderdı äsem saz besıgınde terbettı. «Köktem valsı» tuyndysyn aitqan halyqaralyq konkurstardyŋ laureaty Aizada Qaponova jinalǧandardy serpıltıp öttı.
Kompozitor tudyrǧan «Aisūlu» operasynyŋ düniege kelgenıne jarty ǧasyrdan asty. Osy operadaǧy Aisūludyŋ ariiasyn aitqan QR eŋbek sıŋırgen qairatkerı Bibıgül Janūzaq, Serkenıŋ kavatinasyn şyrqaǧan «Daryn» memlekettık jastar syilyǧynyŋ iegerı, QR eŋbek sıŋırgen qairatkerı Azamat Jyltyrközov öz partiialaryn tamaşa alyp şyqty.
Sydyq Mūhamedjanov – ūly Abaidyŋ öleŋderıne än jazǧan alǧaşqy kompozitorlardyŋ bırı. Tıptı ol Abaidyŋ jan düniesın tereŋ tüsındı dep aitsaq, artyq ketkendei bolmaspyz. Sonyŋ jarqyn mysaly retınde konsertte Azamat Jyltyrközov oryndaǧan «Jarq etpes qara köŋılım ne qylsa da» änın, Baqtiiar Omarov äueletken «Ölse, öler tabiǧat» tuyndysyn, respublikalyq jäne halyqaralyq konkurstardyŋ laureaty Şahrizada Tynyştyq aitqan «Taŋǧajaiyp būl qalai hat» şyǧarmasyn jäne Altynbek Äbıldä şyrqaǧan «Qūlaqtan kırıp, boidy alar» romansyn aituǧa bolady.
Ötken ǧasyrdyŋ orta şenınde Qanabek Baiseiıtov pen aqyn Quandyq Şaŋǧytbaevtyŋ qalamynan «Beu, qyzdar-ai» komediiasy tudy. Būl şyǧarmany muzykamen Sydyq Mūhamedjanov körkemdedı. Nūrai Tanabaev osy komediiada aitylatyn «Äiteuır sol qyz bır sūlu» änın de aityp, jinalǧandardyŋ delebesın qozdyrdy. Osylaişa körermenderdı bırde tättı mūŋ qūşaǧynda terbetıp, bırde jinalǧandardyŋ köŋılın kötergen konsert barşaǧa ūnap, klassik kompozitordyŋ ruhyn jaŋǧyrtty.
Filarmoniia körermenderge alda älı talai tamaşa keşterdı syilamaq. Sonyŋ bırı, erteŋ, 23 qyrküiek künı Kongress-holl sahnasynda saǧat 19.00-de ötetın «Ūlytaudan qanat qaqqan Taijan aqyn» konsertı. Būl keş syrnaiyn saq-saq küldırgen aqyn, änşı, kompozitor, küresker azamat Taijan Qalmaǧambetovtyŋ şyǧarmaşylyǧyna arnalady.
Amanǧali QALJANOV
