Qazaq ūlttyq öner universitetınde jas dizainerlerdıŋ «Şabyt» halyqaralyq sändık-qoldanbaly öner jäne bodi-art festivalı öttı. Ekı künge sozylǧan şara Qazaq handyǧynyŋ 550 jyldyǧyna arnaldy.
«Fashion House Kazakhstan» agenttıgınıŋ qoldauymen ötken festival bodi-art jäne sändık-qoldanbaly öner salasynda jürgen jas talanttarǧa qoldau körsetudı közdeidı. Qatysuşylar baiqauǧa san türlı sändık būiymdar äkelgen. Olardyŋ arasynda qyzdardyŋ alqa, syrǧalary, qobdişalar, sömkeler, tıptı, qazaqy oiumen örnektelgen aǧaş esık te bar. «Mūra», «Jaz», «Suasty älemı», «Şyǧys natiurmorty», «Qyzyl ıŋır» dep atalǧan tuyndylardyŋ bırı gobelennen, endı bırı şiden toqylǧan.
Baiqaudyŋ bas jüldesın ielengen «Ūly Jıbek joly» triptihı qaraǧan jandy erıksız tarihtyŋ tereŋ qoinauyna jetelep äketedı. Būl – ūjymdyq jūmys. Bır top astanalyq suretşı tuyndyny tolyqqandy aiaqtau üşın bas-aiaǧy üş jyldai uaqyt jūmsaǧan eken. Keskındemeşı Andrei Plugovoi bızge mūndai kartinaǧa kırıspes būryn tarihty jaqsy bılu kerektıgın aitty.
– Būl jūmys bügın bırınşı ret köpşılık nazaryna ūsynylyp otyr. Mūnda bız Ūly Jıbek jolynyŋ orta ǧasyrlardaǧy tarihyn jäne qazırgı Qazaqstandy beinelegımız keldı. Özıŋız bılesız, kezınde Ūly Jıbek joly sauda-sattyqtyŋ örkendeuıne üles qosyp qana qoimai, mädeniettıŋ de damuyna yqpal ettı. Eŋ aldymen, ssenariiın jazdyq, odan soŋ, eskizderın syzuǧa bıraz uaqyt kettı, – deidı suretşı.
Şeberler triptihtı salyp şyǧu üşın seksennen astam aǧaş türlerın paidalanypty. Olardyŋ arasynda sonau Afrika, Ündıstan jerınen äkelıngen aǧaştar da bar eken. Esık pen tördei jerdı alatyn alyp kartinada Jer-Ana, qasiettı Qaǧba, arǧymaqtar, dombyra, ūly köş, qazaqtyŋ qonaqty qarsy alu dästürı jäne t.b. beinelengen.
Al, «aǧaş öŋdeu» atalymynda bırınşı orynǧa ie bolǧan Älıbek Nyşanbaev – bızdıŋ Taşkent qalasynan kelgen qandasymyz. Ol Taşkenttegı aǧaş oiu önerınıŋ Ortalyq Aziia mektebınde tälım alǧan. Al qazır Qazaq ūlttyq öner universitetınde oqidy. Älıbek aǧaştan sandyq, baqan, toǧyzqūmalaq taqtasy, qymyz ışuge arnalǧan keseler, qobdişalar jasaidy. Onyŋ toptamasyndaǧy erekşe közge tüsetın zat – aqsüiek. «Aqsüiek» oiynyna arnalǧan būl tuyndy jas şeberdıŋ «Qazaqtyŋ ūlttyq oiyndary» seriiasynan oiyp tūryp oryn alady.
Baiqau qorytyndysynda, «Bodi-art» atalymynda bırınşı oryn Aqerke Mūhamädievaǧa, ekınşı oryn Dinara Mūhametqalievaǧa, al, üşınşı oryn Äigerım Saǧynaevaǧa būiyrdy. «Toqyma» atalymyndaǧy jüldelerdı Raihan Qūsaiynova, Gülfara Jaqyp jäne Diana Edıresovalar jeŋıp aldy. «Gobelen» atalymynda bırınşı oryn Dina Tölegenovaǧa berıldı. Ekınşı jäne üşınşı oryndardy Fariza Jūmaǧat pen Mälika Keŋesovalar bölıstı. «Aǧaş öŋdeu» atalymynyŋ bırınşı ornyn Älıbek Nyşanbaev enşılese, ekınşı oryndy Erjan Tūtan qanjyǧasyna bailady. Al, üşınşı oryndy Batyl Qadırsızov ielendı.
Roza ÄREN
