Qazan aiynda Işkı ıster ministrlıgınıŋ ekı bırdei şeneunıgıne aiyp taǧyldy. Kölıktegı IID bastyǧynyŋ bırınşı orynbasary paraqorlyqpen jüielı türde ainalysqany üşın küdıkke ılınse, Qylmystyq-atqaru jüiesı komitetınıŋ arnaiy esepke alu bölımşesınıŋ basşysy, ädılet podpolkovnigı qyzmet babyn paidalana otyryp alaiaqtyq jasaǧan.
Prezident juyrda ǧana jariialanǧan Joldauynda qaramaǧyndaǧy qyzmetkerler sybailas jemqorlyqqa qatysty qūqyq būzuşylyq jasaǧan jaǧdaida, bırınşı basşylardyŋ jeke tärtıptık jauapkerşılıgı küşeitıletının tapsyrdy. Būǧan deiın Astanada jüzege asqan «Astana – adaldyq alaŋy» jobasynda da qaramaǧyndaǧy qyzmetkerler sybailas jemqorlyq boiynşa ūstalsa, bırınşı basşylar da jauapqa tartylatyny turaly aitylǧan bolatyn. Degenmen jyl basynan berı qanşa şeneunıktıŋ ūstalǧanyn bılsek te, olardyŋ tıkelei basşylaryna qatysty şara qoldanylǧany turaly eşqandai aqparat estımedık.
Sonymen, Işkı ıster ministrlıgıne qarasty kölıktegı IID bastyǧynyŋ bırınşı orynbasary ūlttyq biuro qyzmetkerlerınıŋ jedel-ızdestıru şaralary kezınde qolǧa tüstı. Naqtyraq aitqanda, şeneunıktıŋ «Qazaqstan» jylu-energetikalyq keşenı» firmasynyŋ aimaqtyq basşylaryna Almaty, Qaraǧandy, Qostanai jäne basqa da oblystarda janarmai ūrlauda qamqorlyq tanytqany anyqtalǧan. Oǧan atalǧan öŋır basşylarynan şılde-qyrküiek ailarynda qamqorlyq tanytqany üşın 2,4 million teŋge para alǧany jönınde aiyp taǧyldy. Aita keteiık, būǧan deiın 3 qazan künı de osy departamenttıŋ ūiymdasqan qylmyspen küres basqarmasynyŋ basşysy para aldy degen küdıkpen ūstalǧan edı.
Memlekettık qyzmet ısterı jäne sybailas jemqorlyqqa qarsy ıs-qimyl agenttıgınıŋ resmi ökılı Janna Bastarovanyŋ aituynşa, ūstalǧan taǧy bır şeneunık Işkı ıster ministrlıgı Qylmystyq atqaru jüiesı komitetınıŋ bölım basşysy bolyp qyzmet ıstegen. Ädılet podpolkovnigı qyzmet babyn paidalana otyryp, Aqtöbe oblysynyŋ tüzeu mekemesınde otyrǧan sottaluşyny Aqmola oblysyndaǧy abaqtyǧa auystyrǧany üşın küdıkke ılıngen. Osy äreketı üşın syiaqyǧa deldal arqyly 2800 AQŞ dollaryn alyp jatqan sätte öz kölıgınde qūryqtaldy.
Sonymen, qaramaǧyndaǧy qyzmetkerler torǧa tüsken bırınşı basşylarǧa tärtıptık jaza berıle me, kütemız…
