Astana qalalyq №11 emhananyŋ aǧa medbikesı Taŋşolpan Düisenbaeva Finliandiianyŋ Helsinki qalasynda halyqaralyq taǧylymdamadan öttı. «Meiırbike ısın ūiymdastyru – Finliandiia täjıribesı» dep atalǧan taǧylymdama barysynda qazaqstandyq mamandar orta medisina personalynyŋ jūmysyn ūiymdastyru jaiy jäne olardyŋ mındetterındegı erekşelıktermen tanysty.
Medbike bolyp 10 jyldan berı eŋbek etetın Taŋşolpan jūmysyn alǧaş balabaqşada feldşer bolyp bastaǧan. Atalǧan emhanada 2014 jyldan berı jūmys ısteidı. Halyqaralyq taǧylymdamaǧa ol Qazaqstannan 10 aǧa medbikenıŋ bırı bolyp barǧan.
– Astana qalasynan 2 emhanadan bardyq. Qalǧany – respublika boiynşa mamandar. Körgenımız, köŋılge tüigenımız köp. Būl elde barlyq medisinalyq tekseru, jalpy emnıŋ bärı tegın jürgızıledı. Bıraq bızde 6 aida bır ret tekserılse, olarda 5 jylda bır ret medisinalyq tekseruden ötedı eken. Taǧy bır aita keterlıgı, atalǧan elde tuberkulezge şaldyǧatyndar tırkelmegen, sondyqtan balalar tuǧanda osy auruǧa qarsy ekpe salmaidy jäne būl dert boiynşa emdeu oryndary atymen joq. Perzenthanalary köp ärı jaǧdai jasalǧanmen, bala az tuady. Medisina bolsyn, basqa kez kelgen salalardaǧy qyzmetkerler tek tüskı 15:00-ge deiın ǧana jūmys ısteidı. Odan keiıngı uaqytyn otbasyna, tabiǧat aiasynda demaluǧa arnaidy. Bıraq zeinetke 67 jasta şyǧady. Jalpy halqy öte baquatty ärı salauatty ömır saltyn qatty ūstanady. Sosyn baiqaǧanym, halqynyŋ köp bölıgı – egde jastaǧylar, jastar az. Bır jūma uaqyt ışınde bız bırneşe emdeu mekemesı men joǧary oqu ornyna bardyq, olardyŋ jūmysymen tanystyq, – deidı aǧa medbike.
Bügınde atalǧan emhanadaǧy salalyq därıgerlerdıŋ medbikelerın basqaratyn Taŋşolpan būl sapardaǧy täjıribesın ärıptesterımen bölısuge daiyn. Jalpy qazaqstandyq medisina mamandary mūndai taǧylymdamalardan jyl saiyn ötıp otyrady.
