«Bır jer bar, alys ta bolsa jaqyn, bır jer bar, jaqyn da bolsa alys» degen söz tura «Öndırıs» eldı mekenıne qaratyp aitylǧan siiaqty. Elordanyŋ ırgesıne tiıp tūrǧan auylǧa jai künderı jetu qiyn, al qaqaǧan qysta qatynau tıptı maşaqat.
Qoǧamdyq kölık köbeidı
Tūrǧyndar «Öndırıske» tek bır ǧana №24 avtobus jüretınıne, onyŋ özı keşıgıp keletınıne köp şaǧymdanady. Osyǧan orai, bız STS kompaniiasy qoǧammen bailanys qyzmetınıŋ jetekşısı Oksana Loskutovaǧa habarlasqanymyzda, ol 28 qaraşadan bastap būl baǧytqa jaŋadan 3 avtobus qosylǧanyn, endı olardyŋ sany 12 bırlıkke jetkenın aitty. Soǧan qaraǧanda būl jerde bar mäsele eldı mekenge jüretın avtobustar sanynyŋ jetıspeuşılıgınde emes, qys mezgılınde joldy qar alyp qalyp, qoǧamdyq kölıkter qatynasynyŋ qiyndauynda jäne tūrǧyn alapta halyqtyŋ köp şoǧyrlanuynda bolsa kerek.
Aldaǧy uaqytta «Öndırıs» tūrǧyndarynyŋ qalanyŋ ortalyq bölıgımen qatynauyn jaqsartu maqsatynda Aqseŋgır köşesınde kışı ainalmaly joldyŋ qūrylysyn bastau jospary bar. Qūrylys bastalatyn ainalmaly joldyŋ bır bölıgınde baraq tipındegı 12 üi ornalasqan. Ol üilerdı syryp, tūrǧyndaryn jaŋa jerge qonystandyru mäselesı jäne qūrylysy bäseŋdep qalǧan Sarybūlaq özenı arnasynyŋ qaita salynuy qazırgı künı kün tärtıbınde tūr.
Baiqoŋyr audanynyŋ äkımı Nūrbol Nūrsaǧatovtyŋ aituynşa, «Qalalyq jyljymaityn mülık» şaruaşylyq jürgızu qūqyǧyndaǧy memlekettık kommunaldyq käsıporyn 12 üige mülıktı baǧalau jūmystaryn jürgızetın bolsa, Sarybūlaq özenı arnasynynyŋ qūrylysyna jauapty merdıger ūiym bır aptanyŋ ışınde jol tösemesın jöndeudı bastap ketpekşı.
Sondai-aq audanda jyly aialdamalar da tapşy. Aiazdyŋ ötınde ūzaq uaqyt avtobus kütudıŋ azabyn jol tosqan jolauşylar ǧana bıledı. Qaqaǧan qysta aşyq dalada jarty saǧat tūryp qalsaŋyz, densaulyǧyŋyzdan da aiyrylyp qaluyŋyz mümkın. Osy saualdy audan basşysyna joldaǧanymyzda, ol kısı būl problemamen jaqsy tanys ekenın, olardyŋ kezeŋ-kezeŋmen bırtındep şeşılıp jatqanyn aitty.
– Tūrǧyndar men qonaqtarynyŋ jaĭlylyǧyn qamtamasyz etu maqsatynda 2020 jyly Baiqoŋyr audany boĭynşa 32 aialdama keşenderı ornatyldy. Jolauşylardyŋ tılekterı men ötınışterın esepke ala otyryp, taǧy 6 aialdama pavilondaryn ornatu josparlanǧan. Onyŋ 4-euı jelge tözımdı jäne 2 jabyq tiptı (jyly) aialdama pavilondary, – dedı äkım.
Audan basşysynyŋ aituynşa, jaŋa aialdamalar bırınşı kezekte mektep, auruhana jäne qatty jel soǧyp tūratyn tūstarǧa ornatylady. Aialdama keşenderınıŋ negızgı bölıgın memlekettık-jekemenşık ärıptestık (MJÄ) mehanizmı boiynşa investorlar köteredı. Jabyq tiptegı aialdamalar elordanyŋ klimattyq erekşelıgın ǧana emes, zamanaui talaptar men äleumettık qajettılıkterdı de eskere otyryp jasalady.
Aulalarǧa ajar kırdı
– Qazırgı künı audan halqynyŋ sany jedel artyp, infaqūrylym da qarqyndy damyp keledı. Menı äkım qylyp taǧaiyndaǧanda bız bırınşı kezekte aula aumaqtaryna tolyqtai taldau jürgızdık. Bügınde audanda 237 aula bolsa, sonyŋ 107-sı kürdelı jöndeudı qajet etedı. Ärine, problemalar az emes, bıraq onyŋ bärı josparǧa sai bırtındep şeşıletın bolady. Abattandyru jūmystary barysynda PİK ökılderımen keŋesıp, tūrǧyndardyŋ talap-tılekterı eskerıledı, ol üşın tūrǧyndarmen kezdesuler ötkızemız, – deidı Nūrbol Tölegenūly.
Äkımnıŋ aituynşa, biyl audan aumaǧynda 53 aula men 13 ırı qoǧamdyq keŋıstık (şaǧyn saiabaq) abattandyrylypty. Sondai-aq audannyŋ körkın keltırıp, aua tazalyǧyn saqtau üşın küzgı jäne köktemgı aǧaş egu nauqanynda 10000-nan astam tüp aǧaş otyrǧyzylǧan.
Abattandyrylǧan aulalarda oĭyn alaŋqailarynan bastap futbol, basketbol, stritbol alaŋdary ūĭymdastyrylyp, köpfunksionaldy jattyǧu qūrylǧylary ornatylǧan. Sport alaŋdarynda qauıpsız rezeŋke jabyndylar töselıp, arnaiy trenajerlermen qatar, balalar üşın şaǧyn säulet nysandary, strit-vorkaut alaŋdary, qoqys jäşıkterı qoiylǧan.
Jataqhanalar jaǧdaiy qiyn
Baiqoŋyr ekı jyl būryn qūrylǧan jas audan bolǧanmen, mūndaǧy halyqtyŋ edäuır bölıgı osy öŋırge būrynnan qonys tepken selinogradtyqtar. Sondai-aq būl öŋırdegı üi-jaidyŋ köbısı eskırgen, kommunaldyq jüielerınıŋ tozyǧy äbden jetken. Būryndary jūmysşylar qauymyna arnap salynǧan, qazır küiı ketken jataqhanalar da az emes. Olardyŋ bırqataryn özımız de közımızben körgenbız. Mūndai problemany audan basşysy da joqqa şyǧaryp otyrǧan joq.
– Jasyratyny joq, Baiqoŋyr audanynyŋ aumaǧynda bırqatar problemalyq jataqhanalar bar, olardyŋ eskı boluyna bailanysty qasbetterı, şatyrlary, injenerlık jäne elektr jelılerı jöndeudı qajet etedı. Alaida atalǧan jataqhanalar būzuǧa jatpaidy,– dedı N.Nūrsaǧatov.
Degenmen aǧymdaǧy jyly demeuşıler qarajaty esebınen 9 jataqhanaǧa jöndeu jūmystary jürgızılıptı.
Audannyŋ taǧy bır erekşelıgı – būl öŋırdı qar qatty alady. Sondyqtan qysqy mausymda qar tazalau jūmystaryna Baiqoŋyrdyŋ daiarlyǧy küştı. Audan boiynşa būl ıske 257 arnaĭy tehnika men 450 kommunaldyq jūmysşy jūmyldyrylǧan.
– Qys mausymy bastalardyŋ aldynda kommunaldyq qyzmetter men merdıger ūĭymdardyŋ aldaǧy qys mezgılıne daĭyndyǧymen qatar, qar jinauǧa arnalǧan jäne basqa da arnaĭy tehnikalary tekserıldı. Negızınen, qar tazalau kezınde qar jinau maşinalary, qūm şaşatyn, şnekorotorlar, avtogreĭderler, qar tiegışter, samosvaldar qoldanylady. Sonymen qatar, qar tazalau jūmystary barysynda, äsırese äleumettık nysandarǧa kıretın joldardy tazalauǧa köp köŋıl bölınedı. Qar tazalau boĭynşa ötınışterdı äleumettık jelılerdegı paraqşamyz ben 109 qyzmetı arqyly qabyldaĭmyz, – deidı äkım.
Qysqy mausymǧa daiyndyqty äzırleudegı basty mäselelerdıŋ bırı qar poligonyn jasaqtau bolyp tabylady. Biyl qar poligonyna kıru jäne ışke ötu joldary keŋeĭtılgen. Poligonǧa belgı punktı ornatylyp, elektr jaryǧy tartyldy, qajet bolǧan jaǧdaĭda joldarǧa töseu üşın jalpy kölemı şamamen 50 tonna inerttı material daĭyndalǧan. Sonymen qatar, merdıger ūĭym poligonǧa täulık boĭy jūmys jasaĭtyn beĭnebaqylau jüĭesı men ştamp saǧattaryn bekıtuge arnalǧan qūral ornatty.
Äleumettık nysandar jöndeldı
Sondaĭ-aq qysqy mezgılde şetkı aimaq tūrǧyndary üşın bärınen būryn äleumettık nysandardyŋ dūrys jūmys ıstep tūrǧany maŋyzdy. Äsırese qazırgıdei ındet bäseŋsımei tūrǧan zamanda «bas auyryp, baltyr syzdaǧan» jandardyŋ qalaǧa sabylmai, üiınıŋ janyndaǧy emdeu mekemelerınen em-dom ala salatyn mümkındıkterı bolsa qandai ǧanibet! Audan tūrǧyndaryna qazırgı kezde segız densaulyq saqtau ūiymdary qyzmet körsetedı. Olardyŋ ışınde «№8 qalalyq emhana» MKK; «Öndırıs» jäne «Janūia-1 ODA»; «Dostyq» otbasylyq densaulyq ortalyǧy audannyŋ ışınde ornalasqan.
Biylǧy Baiqoŋyrda 2 jaŋa mektep salynyp, sonymen qatar 3 mektepke kürdelı jöndeu jūmystary jürgızıldı. Sondai-aq №31 mektepte jäne №23 orta mektebınde qosymşa qūrylys jūmystary qolǧa alynǧan. Josparǧa säikes qūrylys jūmystary aǧymdaǧy jyldyŋ soŋyna deiın tapsyryluy tiıs.
Audannyŋ şet aimaqtaryn damytu baǧdarlamasy aiasynda «№12 balabaqşa-bastauyş mektep» keşenıne jäne №34 orta mektebıne qosymşa qūrylys arqyly mekteptı keŋeitu josparlanǧan. Jalpy qūrylystyŋ jobasy 600 orynǧa eseptelgen.
Baiqoŋyr audanynda mūnan basqa köşenı jaryqtandyru, jol jöndeu, jylu-sumen jabdyqtau mäselelerı boiynşa da qadam-qadau jūmystar atqarylyp jatyr eken.
