Elordadaǧy Oquşylar saraiynda «EHRO jaŋa jyldyq alauy» dep atalǧan Elbasynyŋ balalarǧa arnalǧan jaŋa jyldyq şyrşasy öttı. Oǧan Astana qalasynyŋ äkımı Äset İsekeşev qatysty. Äsırese, Jaŋa jyldy baldyrǧandar asyǧa tosyp, säbi armandaryn hatqa jazyp, Aiaz ata men Aqşaqardan tosyn syi kütıp jüredı. Balalyq şaq sonysymen de qyzyq, tättı ǧoi.
Quanyşqa toly merekege türlı kiım kiıp, erekşelenıp kelgen kışkentailar ortadaǧy eŋselı şyrşany ainalyp, şattyqqa toly änderdı şyrqap, jyl saiyn dästürge ainalǧan keştıŋ körıgın qyzdyrdy.
Aituly şaranyŋ aşyluynda Memleket basşysy Nūrsūltan Nazarbaevtyŋ teleekran arqyly balalarǧa ızgı lebızın bıldırgen qūttyqtauy körsetıldı.
– Qymbatty balalar! Jaŋa jyl – barşamyz asyǧa kütetın mereke, jaqsylyqtyŋ jarşysy. Būl – eŋ aldymen balalardyŋ merekesı, kışkentailardyŋ quanyşy. Sender täuelsız elde ösıp jatqan naǧyz baqytty ūrpaqsyzdar. Men elımızdegı barlyq balalardy jaŋa jyldyq merekemen şyn jüregımmen qūttyqtaimyn! Bügıngı şyrşa toiy este qalarlyq erekşe keş bolady dep oilaimyn. Balalardy şattyqqa böleitın osyndai şara elımızdıŋ är aimaǧynda ötude. Bız – bolaşaǧymyzdy bügınnen bastap oilaityn memleketpız. Ūly dala elınıŋ talantty balalary ünemı aldyŋǧy qatarda bolu kerek. Bız senderdıŋ aqyldy da alǧyr, zerdelı de zerek bolyp ösulerıŋızdı qalaimyz. Sol üşın bızdıŋ memleketımız barlyq mümkındıktı jasaidy. Asqaq armandaryŋyz oryndalyp, täuelsız elımızdıŋ damuyna üles qosatyn azamat bolyŋyzdar! Jaŋa jyldaryŋyz qūtty bolsyn! – dedı Elbasy.
Dumandy baǧdarlama aiasynda «EHRO jaŋa jyldyq alauy» degen taqyrypqa bailanysty ertegı älemındegı keiıpkerlerdıŋ qatysuymen şou-qoiylymdar ūiymdastyryldy. Türlı şamdardyŋ jarqyly balalardyŋ qyzyǧuşylyǧyn tuǧyzdy. Teatr ärtısterı jyl ataularyna ie bolǧan januarlardy beinelep, jetkınşekterge keremet körınıs qoidy. Daryndy balalar äueletıp än salyp, myŋ būralyp bi biledı. Aiaz ata men Aqşaqar baldyrǧandarǧa aqjarma tılekterın jetkızdı.
Astanadaǧy Balalar üiınıŋ tärbielenuşısı, toǧyz jasar Alisa merekege mūqiiat daiyndalypty. Özı qazaq tılınde erkın söilep, bızge Jaŋa jylǧa jattaǧan taqpaǧyn aityp berdı. «Jaŋa jyldy qatty jaqsy köremın. Aiaz ata maǧan syilyq äkelıp beredı. Sol üşın oǧan önerımdı körsetemın. Bügıngı şyrşa öte biık, maǧan qatty ūnady. Balalardyŋ bärı de men sekıldı önerlı» deidı baldyrǧan.
– Elbasy şyrşasyna 9-13 jas aralyǧyndaǧy 200-den astam bala qatysty. Onyŋ 28-ı – jetım, 79-y – ata-ananyŋ qamqorlyǧynsyz qalǧan, 14-ı – mümkındıgı şekteulı, 55-ı – az qamtylǧan jäne köp balaly otbasynan şyqqan jäne 24 daryndy balalar şaqyryldy. Aldaǧy jyly Astanada «EKSPO-2017» körmesı ötedı. Soǧan orailastyryp merekelık keştı «EHRO jaŋa jyldyq alauy» dep atadyq. Halyqaralyq şarany balalarǧa ertegı arqyly körsetkımız keldı. Qoiylym sättı şyqty, baldyrǧandarǧa ūnady dep oilaimyn, – dedı qalalyq Bılım basqarmasynyŋ basşysy Qasymhan Senǧazyev.
Jaŋa jyldyq keş soŋynda balalarǧa Elbasy atynan baǧaly syilyq tapsyrylyp, olarǧa tättı taǧamǧa toly dastarqan jaiyldy.
Azamat ESENJOL
