Qazaq batyrlary, Garri Potter, Elf pen Aqqala, Nindzia tasbaqa, Örmekşı adam men Supermen… Tızımı osylai jalǧasa beretın ertegı men kino keiıpkerlerı Oquşylar saraiynda ötken jaŋajyldyq merekede bas qosty.
Ekı künge sozylǧan şyrşatoiǧa jalpy sany 500-den asa elordalyq oquşy qatysty. Olardyŋ bırazy – köpbalaly, tūrmysy tömen otbasylardan şyqqan, jetım nemese ata-ana qamqorlyǧynsyz qalǧan balalar, sondai-aq oqu üzdıkterı.
Erteŋgılık barysynda söz alǧan qala äkımı Altai Kölgınov şäkırtterdı jäne olardyŋ ata-analary men ūstazdaryn Jaŋa jyl meiramymen qūttyqtai kele:
– Biyl elordalyq oquşylar tamaşa tabystarǧa jettı. Atap aitsaq, balalarymyz respublikalyq olimpiadada 103 medalǧa ie boldy. Onyŋ 21-ı – altyn, qalǧany – kümıs pen qola. Al halyqaralyq olimpiadada 53 medaldı qorjynǧa toǧytty. Onyŋ 9-y – altyn. Kelesı jyly būdan da ülken jetıstıkterdı baǧyndyra berıŋder. Būl üşın bızder, ülkender, senderge barlyq qolaily jaǧdaidy jasaimyz, – dedı.
Jalpy qala boiynşa qaraşa aiynyŋ soŋynan bastap äleumettık osal toptarǧa jatatyn otbasylardan şyqqan 15 myŋnan asa astanalyq bala üşın ärtürlı deŋgeidegı qaiyrymdylyq ıs-şaralary ūiymdastyrylǧan.
Onyŋ ışınde jetkınşekterdı teatr men kinoteatrǧa, delfinder şouyna, syrǧanaqqa aparu sekıldı bırqatar oiyn-sauyq türı qarastyrylǧan. Sondai-aq erekşe qajettılıktı talap etetın balalar men jasöspırımder üşın arbalar men 10 invataksi syiǧa tartylǧan.
