Ötken senbıde Ädılbek Jaqsybekov pen Sergei Sobianin Astana äkımdıgı men Mäskeu ükımetı arasyndaǧy 2016-2018 jyldarǧa arnalǧan Yntymaqtastyq baǧdarlamasyna qol qoidy.
Qazaqstan men Resei astanalary basşylarynyŋ dostyq räuıştegı kezdesuınde ekı jaqty tiımdı bailanystardy odan ärı tereŋdetu töŋıregınde özektı äŋgıme örbıdı. Astanaǧa resmi saparmen kelgen delegasiia qūramynda bolǧan Mäskeu merınıŋ qūrylys mäselelerı jönındegı orynbasary Marat Husnullin, qala basşysynyŋ taǧy bır orynbasary, Kölık jäne jol-kölık infraqūrylymyn damytu departamentınıŋ basşysy Maksim Liksutov jäne Mäskeu ükımetınıŋ ministrı, Syrtqy ekonomikalyq jäne halyqaralyq bailanystar departamentınıŋ jetekşısı Sergei Cheremin ıskerlık jaǧdaiynda senımdı ärıptestık kökjiegın keŋeitudıŋ mäiektı mäselelerı talqylanǧan osy jiynǧa qatysyp otyrdy. Tarihi tatu körşılestık pen saliqaly saiasi qarym-qatynasqa negızdelgen Qazaqstan -Resei yqpaldastyǧy qyzu qarqynmen damu üstınde ekendıgı ämbege aian. Osy oraida, Astana äkımdıgı men Mäskeu ükımetı 2000 jyly ekı qala arasyndaǧy sauda-ekonomikalyq, ǧylymi-tehnikalyq jäne ruhani-mädeni bailanystardy nyǧaituǧa baǧyttalǧan kelısımge qol qoiǧan bolatyn. Sonyŋ aiasynda qos astanany jan-jaqty jaqyndastyra tüsetın bırqatar igı şaralar jüzege asyryldy.
«Halyqtarymyzdyŋ ǧasyrlar boiǧy tarihi tamyrlastyǧy, sondai-aq, ekı eldıŋ qaşannan qalyptasqan senımdı serıktestıgı Astana men Mäskeudı ortaq maqsat oraiynda toǧystyrary sözsız. Bız bauyrlas qala Mäskeumen andalastyqty ärı qarai nyǧaita beruge airyqşa nazar audaramyz» dedı qūrmettı qonaqtardy quana qarsy alǧan Ädılbek Jaqsybekov.
Salmaqty sözın sabaqtaǧan elorda basşysy būǧan deiıngı saparlar nätijesınde aldaǧy uaqyttaǧy ıskerlık jäne gumanitarlyq saladaǧy yntymaqtastyqqa berık negız qalaǧanyn atap öttı.
Öz kezegınde Mäskeu merı Astanadaǧy örkendı özgerısterge taŋdanysyn jasyrmady. «Men mūnda bırazdan berı kelmegen edım. Az uaqyttyŋ ışınde Astana körgen közdı süisındırer äsem şaharǧa ǧana emes, ırı megapoliske ainalypty. Būl aradan qala qūrylysy men säulettık sän-saltanattyŋ nebır üzdık ülgılerın tamaşalai alasyz. Şynymdy aitsam, sızderden üirenetın ürdıster jeterlık eken» dep süisınısın bıldırdı Sergei Sobianin.
Qala şaruaşylyǧyn qaita jaŋǧyrtu jönındegı Mäskeude S.Sobianinnıŋ basşylyǧymen jüzege asyrylyp jatqan auqymdy baǧdarlamalar Qazaqstannyŋ jas elordasy üşın de qyzyǧuşylyq tudyratyn ıs-täjıribe ekendıgı anyq. Būlardyŋ qataryna «Menıŋ köşem» keşendı baǧdarlamasyn da, kölık jüiesın jetıldıru ısın de, jaǧalaulardy rekonstruksiialau jobalaryn da, būrynǧy öndırıs aimaqtaryna abattandyru täsılderın de jatqyzuǧa bolady. Osyǧan bailanysty jūmys barysynda ekı astananyŋ jergılıktı atqaruşy organdary bır-bırımen täjıribe bölısıp, aqparat almasuda. Mäselen, juyrda ǧana saiabaqtar aumaǧyn abattandyru täjıribesın zertteu maqsatynda astanalyq mamandar Mäskeuge baryp qaitty.
Mäskeu merınıŋ pıkırınşe, yntymaqtastyqtyŋ 2016-2018 jyldarǧa arnalǧan myna jaŋa baǧdarlamasy ärtürlı salalardaǧy, atap aitqanda, qalany basqaru, densaulyq saqtau, jaŋa aqparattyq tehnologiialardy jetıldıru mäselelerı boiynşa elordalar arasyndaǧy enşılestıktı joǧary deŋgeige köteruge oŋ äserın tigızbek. Endeşe, barys-kelıs jäne alys-berıs talaptary qaǧaz jüzınde qalmaq emes. Qazırgı uaqytşa ekonomikalyq qiyndyqtar būrynnan berık aralas-qūralastyq arqauyn bır sätke de bosatpaityndyǧyna senımımız mol.
Ä.Jaqsybekov märtebelı meimandarǧa Mäskeumen bırlese jūmys ısteudıŋ jaŋa kezeŋıne Astananyŋ tolyqtai äzırlıgın jetkızdı. Ol «EXPO-2017» Halyqaralyq mamandandyrylǧan körmesı kezınde Mäskeudıŋ Astanadaǧy künderın ötkızu jönınde ūsynys bıldırdı. Būl ūsynysty qoldaǧan S.Sobianin özderınıŋ Turizm departamentıne qos qalanyŋ turistık firmalarymen bırlese otyryp, «EXPO» kezınde Astanaǧa saiahattap keludıŋ baǧdarlamasyn jasau jönınde tapsyrma beretındıgın eskerttı.
Mäskeu merı sonymen qatar, taiau uaqyttarda Resei ortalyǧyndaǧy ataqty Halyq şaruaşylyǧy jetıstıkterı körmesınde Qazaqstannyŋ öz alaŋy paida bolatynyn habarlady. Sözınıŋ soŋynda bügınde jasaqtalyp bıtken osynau pavilonda Astananyŋ tūraqty ekspozisiiasyn aşu turaly öz ūsynysyn aitty.
Kelelı kezdesuden keiın qadırlı qonaqtar Astananyŋ aişyqty nysandaryn aralap, elordamyzdyŋ eŋ körıktı mädeni-köpşılık oryndarymen tanysty.
