Astana qalalyq sotynda sot organdaryn zamanaui aqparattyq tehnologiialarmen tanystyru maqsatynda döŋgelek üstel jiyny öttı. Oǧan Halyqqa qyzmet körsetu ortalyǧy men ükımettık emes ūiymdardyŋ ökılderı qatysty.
Şara aiasynda «Astana qalasy boiynşa Sottar äkımşısı» RMM basşysynyŋ mındetın atqaruşy Aibol İbragimov sot jüiesındegı jaŋalyqtyŋ bırı «Sot kabinetı» aqparattyq servisınıŋ jūmysy jaily aityp berdı.
–Sottarǧa qoljetımdılıktı qamtamasyz etude «Sot kabinetı» servisın dara aityp ötken jön. Onyŋ erekşelıgı, tūrǧyndar özderıne yŋǧaily kez kelgen uaqytta üiınen, keŋsesınen şyqpai-aq, internet jelısı arqyly sotqa talap-aryzdar, ötınışter, apelliasiialyq şaǧymdardy elektrondy türde joldai alady. Ärı sot qūjatyn, ıstegı märtebesın qarap, sot aktısın şyǧaryp qana qoimai, ötınışterdı sottyŋ qarau merzımderın de baqylauǧa mümkındıgı bar, – deidı Aibol İbragimov.
Resmi derekterge süiensek, biylǧy jyldyŋ basynan berı «Sot kabinetı» aqparattyq servisı arqyly 32 135 talap aryz ben 2 325 sotqa jügınuler kelıp tüsken. Būl jüie sot prosesıne qatysuşylardyŋ ǧana emes, sottyŋ da materialdyq şyǧystaryn qysqartuǧa, uaqytyn ünemdeuge septıgın tigızgen. Jiyn soŋynda Halyqqa qyzmet körsetu ortalyǧynyŋ ökılderı atalmyş aqparattyq servistıŋ tiımdı tūstaryn atap ötıp, servistı paidalanuǧa qajettı elektrondy sandy qoltaŋbany aludyŋ joldaryn tüsındırıp berdı. Jaŋa qyzmet qaǧazbastylyqtan qūtyludyŋ bırden-bır joly ekenın de qatysuşylar basa aitty.
Qymbat NŪRǦALİ
