Elorda äkımı Jeŋıs Qasymbek «Qazaqstan» sport keşenınıŋ qūrylysy kelesı jyly aiaqtalatynyn mälım ettı. Qala basşysy ekı jyl būryn ülken nysandy jaŋǧyrtudy bastaǧan investor qūrylys jūmysyn tolyqtai jürgıze almaǧanyn, qazır ony aiaqtauǧa qosymşa qarajat qarastyrylyp jatqanyn jetkızdı.
«Elordada sport mekemelerıne degen qajettılık bar. Qalaǧa qajettı qūrylys nysandaryna da jeke investisiialar tartamyz. Mäselen, Almaty audanynyŋ Qajymūqan Mūŋaitpasov köşesınde «Qazaqstan» sport keşenı qaita salynyp jatyr. Nysannyŋ jalpy audany 10 myŋ şarşy metrden asady. Jospar boiynşa onda futbol, basketbol, voleibol zaldary, üstel tennisı, IT üiırmelerı – lego jäne kibersport, qyş şeberlıgı mektebı, şahmat, küres, boks zaldary jäne taǧy basqalar bolady. Sport keşenı kelesı jyly aşylady dep josparlanyp otyr» dep jazdy äkım äleumettık jelıdegı paraqşasynda.
Jeŋıs Qasymbek qalany aralau barysynda «Qazaqstan» sport keşenıne arnaiy barǧanyn, ondaǧy ahualdy közımen körgenın aitty.
«Elorda tūrǧyndary men qonaqtary mūndai sport ortalyǧyna bır emes, bırneşe ret baryp, bos uaqytyn ötkızedı, sportpen şūǧyldanady dep oilaimyn. Nysan Almaty audanynyŋ tartymdy ornynyŋ bırı sanalady. Sport keşenı apatty jaǧdaida bolǧan soŋ, ekı jyl būryn nysandy jaŋǧyrtu jūmysy bastalǧan. Ökınışke qarai, investor qūrylys jūmysyn tolyq jürgıze almady. Jūmys bır orynda toqtap tūrdy. Degenmen bır kezderı tanymal bolǧan nysannyŋ osyndai küide tūruyna bız jol bermeimız. Sondyqtan qosymşa qarjylandyru közın qarastyryp jatyrmyz» dep tüsındırdı mäselenıŋ mänısın äkım.
Sondai-aq Jeŋıs Qasymbek qalada būqaralyq sportty damytu üşın dene şynyqtyru-sauyqtyru keşenderı salynyp jatqanyn tılge tiek ettı.
«Balalar men jasöspırımderge arnalǧan sport mektepterı men federasiialardy qoldaimyz, aulalar men qoǧamdyq keŋıstıkterdı (saiabaqtar, gülzarlar, jelekjoldar) jäne taǧy basqalaryn abattandyramyz» dep tüiındedı sözın elorda äkımı.
