Adamnyŋ immun tapşylyǧy virusy turaly dūrys ärı tolyqqandy aqparat taratu jaǧynan astanalyq jurnalister alda kele jatyr eken. Būl jönınde elordadaǧy JİTS-tyŋ aldyn alu jäne oǧan qarsy küres ortalyǧynda ötken döŋgelek üstel jiynynda aityldy.
– Jūrtşylyq AİTV-nı ölımnıŋ ükımındei köretını ras. Qoǧam būl syrqatqa qorqynyşpen qaraidy. Sol sebeptı auru jūqtyryp alǧandar syrqatyn jasyryp jürıp, asqyndyryp alady. Sondyqtan virus turaly halyqqa dūrys aqparat berudyŋ maŋyzy ülken, – deidı ortalyqtyŋ bas därıgerı Säbit Äbdıraiymov.
Mamandardyŋ aituynşa, AİTV tym jyldam taralyp keledı. Mūnyŋ bırden-bır sebebı, adamdardyŋ oǧan nemqūraily qarauynda eken. Köpşılık virusqa «men būl dertten saumyn, onyŋ maǧan eşqandai qatysy joq» degen közqaraspen qaraidy. Şyntuaitynda, qazırgı taŋda būl derttıŋ qūryǧyna esırtkıqūmarlar men jezökşeler ǧana emes, salauatty ömır saltyn ūstanatyn adamdar da ılınıp jür. Tıptı, olardyŋ arasynda auqattylar da, lauazymdy jūmys atqaratyndar da bar. Sondyqtan AİTV/JİTS turaly ärkımnıŋ qaperınde jürgenı artyq bolmaidy. «Al virusty jūqtyryp alǧandardyŋ saǧy synbasyn. Ony jūqtyrǧan alǧaşqy kezeŋde aurudy asqyntpai, sindromǧa jetkızbei ūstap tūruǧa bolady. Ol üşın eşqandai emşı-täuıpke jügınbei, bırden ortalyqqa kelıp, arnaiy därı-därmek qabyldau qajet» deidı mamandar.
QR Prezidentınıŋ biylǧy 15 qaŋtardaǧy Jarlyǧymen densaulyq saqtau salasyn damytudyŋ 2016-2019 jyldarǧa arnalǧan «Densaulyq» memlekettık baǧdarlamasy bekıtılgenı belgılı. Atalmyş baǧdarlamada BAQ ökılderın AİTV/JİTS taqyryby boiynşa oqytu mäselesı atap körsetılgen. Osyny negızge ala otyryp, jiyn ötkızgen Astana qalalyq JİTS-qa qarsy küres ortalyǧy jurnalisterge AİTV jönınde bırtalai aqparat berdı. Ortalyqtyŋ mälımetı boiynşa, Astana qalasynda bügınge deiın AİTV jūqtyrǧan 1108 oqiǧa anyqtalǧan. Olardyŋ 39 paiyzy – äielder. Dertke şaldyqqandardyŋ 80 paiyzy 20 men 39 jas aralyǧyndaǧy azamattar eken.
Jalpy, adam densaulyǧynyŋ 90 paiyzy – öz qolynda. Sondyqtan ärbır adam salauatty ömır saltyn ūstanyp, dūrys jüru kerek. Eger özıŋızdı AİTV jūqpasyna teksertkıŋız kelse, osy ortalyqqa baryp, qan saraptamasyn tapsyruǧa bolady. Mūnda tekserılu, nätijenı alu jasyryn türde jürgızıletının esterıŋızge salamyz.
Qymbat TOQTAMŪRAT
