Altai men Atyrau arasyndaǧy ūşqan qūstyŋ qanatyn taldyrar Ūly dala Qazaq handyǧynyŋ 550 jyldyǧyna arnalǧan ūlan-asyr toi dübırımen terbelıp tūr. Astanada bastalyp, jer-jerde jalǧasyp kete barǧan merekelık ıs-şaralar talaiǧy Taraz törınde tüiındelıp, arnasynan asyp-tasyǧan şattyq şeruı şaryqtau şegıne jettı.
Talas jaǧasyndaǧy tamaşa qalada «Qazaq handyǧy» monumentınıŋ aşylu saltanatyna Elbasy Nūrsūltan Nazarbaev qatysyp, qūttyqtau söz söiledı. Aumaǧy äjeptäuır jerdı alyp jatqan alyp keşende keremet kompozisiialyq şeşımder kelısım tapqan. Aspanmen astasqan appaq baǧannyŋ qos qanatynda Alaş jūrty ardaq tūtar alǧaşqy handarymyz Kerei men Jänıbektıŋ taqta otyrǧan tamaşa eskertkışterı qonys tepken.
Arqa-jarqa quanǧan toişyl qauymnyŋ aldynda aǧynan jarylǧan Prezidentımız «Bızdıŋ tarihymyz bastauyn saq, ǧūn, türkılerden alyp, Kerei men Jänıbek handardyŋ Şu alabyna köşıp, Qazaq handyǧynyŋ tuyn köteruımen jalǧasady. Bız būl merekenı tarihymyzdyŋ tereŋ ekendıgın bükıl älemge tanytu üşın, öskeleŋ ūrpaqqa jetkızu üşın ötkızıp otyrmyz» dep, tolymdy oi tolǧady.
Būdan keiın Memleket basşysy aşyq aspan atyndaǧy mūrajai ıspettı «Köne Taraz» tarihi-mädeni ortalyǧyn aralap, osyndaǧy arheologiialyq sabaqtyŋ san türlı eksponattarymen tanysty. Talai ǧasyrlyq tatynan arylǧan eskı jädıgerler eldıgımızdıŋ ejelgı däuırlerınen syr şertkendei. Qūm jūtqan qalalarymyzdy arşyp jatqan arheologtarymyzdyŋ aldynda auqymdy jūmystar tūrǧanyn aitpasaq ta tüsınıktı. Bız batystyq «bılgışter» aityp-jazyp jürgendei «airan ūrttap, qoi qūrttaǧan», artynda qolmen ūstap, közben köretındei materialdyq mūralar qaldyrmaǧan köşpelı mojantompai malşylardyŋ ūrpaǧy emespız. Aqyldy ata-babalarymyz samaladai şaharlar da salǧan, ken balqytyp, altyn-kümısten aişyqty būiymdar da soqqan. Qyştan kırpış qūiyp, kelıstı keseneler tūrǧyzǧan. Erınbei egın ösırıp, su qūbyrlaryn tartqan. Endıgı mındet – osylardyŋ bärın dünie jüzı moiyndaǧan adamzattyq qūndylyqqa ainaldyru.
…Erte zamandardan-aq arly-berlı aǧylǧan atyşuly jihankezderdıŋ jazbalary arqyly ataq-daŋqy jer-jahanǧa jaiylǧan Taraz būl künderı taŋǧajaiyp sän-saltanatqa bölenıp, törtkül dünienıŋ tükpır-tükpırınen kelgen şeteldık meimandardy da jatsynbai, törıne şyǧardy. Būiyrsa, olar öz otandastaryna «Mäŋgılık el» qaǧanatynyŋ altyn qazyǧyn qaqqan täuelsız Qazaqstan turaly maqtanyşpen aityp baratyn bolady.
Talǧat BATYRHAN
