«Astana Opera» teatrynyŋ Ülken zalynda II halyqaralyq «Jıbek joly» festivalınıŋ jabylu saltanatyna arnalǧan Gala-konsert boldy.
Körermenge köterıŋkı köŋıl-küi syilaǧan keremet keşte antikalyq däuırlerden-aq örelı önerımen aty şyqqan İtaliiadan arnaiy şaqyrylǧan ataqty syrnaişy Nello Salsa men däulesker dirijer Massimo Skapin bastaǧan sahna saŋlaqtary baryn salyp baqty. «Astana Opera» teatrynyŋ simfoniialyq orkestrı oinauǧa öte kürdelı pesa sanalatyn J.B.Arbannyŋ «Venesiia karnavaly» taqyrybyndaǧy varmasiiasyn oryndady. Bügınde elordamyzdaǧy eŋ ırgelı mädeniet ordasynda eŋbek etıp jürgen Reseidıŋ Halyq ärtısı Altynai Asylmūratovanyŋ jetekşılıgındegı balet truppasynyŋ jaŋa horeografiialyq nömırlerı de köpşılık közaiymyna ainaldy. Konserttık baǧdarlamada sondai-aq, klassikalyq muzyka jauharlary da keŋınen qamtyldy.
Osy oraida airyqşa aita keterlık bır jait, 25 qyrküiekte şymyldyǧy türılgen būl festival elımızdıŋ mädeni-ruhani ömırındegı eleulı oqiǧa retınde este qaldy. Bır jarym ai boiy altyn saraidai «Astana Opera» teatrynyŋ samaladai sahnasynda jahandyq operanyŋ jaryq jūldyzdary italiialyq Djulio Bosketti, japoniialyq Akiko Hoiakava, almaniialyq Mihail Agafonov, reseilık Mihail Veku, özbekstandyq Näjmiddin Mavlianov jäne basqalar äueletıp än şyrqady. Astanalyqtar men qala qonaqtarynyŋ nazaryna ūzyn-sany 14 qoiylym, 9 konsert ūsynyldy.
Qazaqstandyq önerpazdar özderınıŋ şeteldık ärıptesterımen täjıribe almasyp, oryndauşylyq erekşelıktıŋ qyr-syryn meŋgerdı. Mūndai käsıbi şyŋdalu mektebınıŋ şeberlık därısterı kım-kımge de paidaly bolsa kerek.
Astanaǧa at basyn būrǧan märtebelı meimandarymyz da aǧynan jarylyp, jyly pıkırlerın bıldırıp jatty. Köptegen muzykanttar «Jıbek joly» festivalınıŋ arqasynda qazaq önerınıŋ asyl qazynalarymen tanysuǧa mümkındık tuǧanyn asa rizaşylyqpen atap öttı. «Festivalǧa şaqyrylǧanymda, jergılıktı halyqtyŋ töl tuyndylaryn oryndaǧym keldı. Aldyn ala aqyldasu arqasynda qazaqstandyq ärıptesterım körnektı kompozitorlaryŋyz Mūqan Tölebaevtyŋ «Poema» atty şyǧarmasyn berdı. Onymen tanysqan boida kökeiıme qona kettı» deidı äigılı japoniialyq skripkaşy Ken Aiso.
Al, polşalyq opera änşısı Katajina Maskevich Qazaqstanda opera men baletke ülken qyzyǧuşylyqtyŋ barlyǧyna quanatynyn jasyrmady. Onyŋ dälelı retınde ärbır körsetılımı tolyq anşlagpen ötetın ǧajaiyp teatr ǧimaratyn alǧa tarta söiledı.
«Astana Opera» teatrynyŋ mūryndyq boluymen ūiymdastyrylǧan mūndai ırı ıs-şaralar täuelsız memleketımızdı dünie jüzıne keŋırek tanytuǧa igı äserın tigızerı anyq.
Talǧat BATYRHAN
