Keide qol-aiaǧy sau, densaulyǧy jaqsy adamdardyŋ qolynan kelmegen ıstı mümkındıgı şekteulı azamattar döŋgelete ainaldyryp, öz janyn baǧumen qatar, qoǧamǧa da ülesın qosyp, töŋıregıne ülgı körsetıp jatady. Sondai azamattyŋ bırı – Halyqaralyq aqparattyq tehnologiialar mektebınıŋ negızın qalauşy, marketing jäne IT salasynyŋ mamany Ämır Süleimenov.
Būl künde IT salasyndaǧy jas maman retınde tanymal bolǧan Ämır Süleimenovtıŋ talaby men talanty, talǧamy men taǧdyry tūstastarynan özgeşe. Jastaiynan fizika jäne matematika pänderıne äues bolǧan Ämır köptegen olimpiadalarǧa qatysyp, san märte bas jüldenı jeŋıp alypty. Alaida eŋ soŋǧy ret Baianauylda ötetın halyqaralyq olimpiadaǧa qatysqaly bara jatqan jolda, oilamaǧan jerden jol apatyna ūşyrapty. Sol künnen bastap Ämırdıŋ taǧdyry da, taŋdauy da özgerıptı. «Kürdelı otadan keiın qaterden qūtyldym. Alaida menıŋ aldymda «endı ne ısteuım kerek, taǧdyrdyŋ salǧanyna könıp, mügedekpın dep jata beruım kerek pe, joq taǧy da talmai talpynuym qajet pe?» degen ülken taŋdau tūrdy. Soŋynda boiymda janym barda talmai talpynam dep şeştım de, qaşyqtyqtan oqudyŋ jäne jūmys ısteudıŋ mümkındıkterın ızdedım. Sebebı ol kezde köptegen bılım beru oryndarynyŋ ǧimarattarynda lift joq jäne olar mümkındıgı şekteulı adamdardyŋ paidalanuyna yŋǧaisyz edı. Oqyp jürgen kezımde IT salasy menı qatty qyzyqtyrǧan bolatyn. Jol apatynan keiın bos uaqytym köp boldy. Kündız-tünı kompiutermen alysyp, IT salasynyŋ qyr-syryna üŋıldım. Onlain kurstarǧa qatysyp, baǧdarlamalau tılı men täsılın Google, Samsung, Cisco kurstarynda igerıp, sertifikat aldym» deidı Ämır özınıŋ IT salasyna aralasu barysyna aialdaǧanda.
Halyqaralyq därejedegı diplomǧa ie bolǧannan keiın Ämırdı jūmysqa şaqyrǧan oryndar da köbeiıptı. Alaida Ämırdıŋ taŋdauy 20 kompaniianyŋ arasynan Reseidıŋ IT kompaniiasyna tüsıptı. Osy arada öz jūmysyn web baǧdarlamasyn äzırleuşı boludan bastaǧan ol qaşyqtyqtan jūmys ısteu arqyly TMD kölemınde köptegen jobalardy äzırleu jūmystaryna atsalysypty.
Bıraq öz maqsatyna jetkenımen, közı aşyq, kökıregı oiau Ämırdı tolǧandyratyn mäseleler de az emes edı. Sonyŋ bırı – mümkındıgı şekteulı jandardyŋ jaǧdaiy. Olardyŋ köbı eŋbekke jaramdy bolsa da, jūmys ısteuge mümkındıgı joqtyǧy ony köp oiǧa salatyn. «Elımızde 600 myŋnan asa mümkındıgı şekteulı azamat bar, olardyŋ 439 myŋy eŋbekke jaramdy, bılımı, jūmys täjıribesı bar bolsa da, järdemaqyǧa süienıp kün köruge mäjbür. Qazaqstanda mügedekterdıŋ memleketten alatyn qarjysy 54 myŋ teŋge şamasynda. Būl olardyŋ bastapqy deŋgeidegı qajetın öteuge jetpegen soŋ, basqa eşteŋege moiyn būra almaidy. Elımızde baiqalatyn taǧy bır qūbylys – densaulyǧynan aqau baiqalǧan azamattardan bölek, oǧan kütım jasaityn otbasynyŋ taǧy bır müşesı jūmysynan qosa aiyrylyp, qoǧamnan qol üzedı. Balasy ärtürlı auyr syrqatqa şaldyqqan analar balamnyŋ kütımı, emı dep üide otyrady. Demek, mümkındıgı şekteulı jandardy qoǧamdyq jūmysqa tartu olardyŋ tabys tabuyna mümkındık berıp qana qoimai, özderın qoǧamnyŋ bır müşesı retınde sezınuıne de tiımdı» dep tereŋ bır tynystap alǧan Ämır Halyqaralyq aqparattyq tehnologiialar mektebın aşudaǧy maqsaty da sol mümkındıgı şekteulı jandarǧa ümıt syilap, şabyt beru ekenın aitty.
Ämırdıŋ IT salasyndaǧy artyqşylyǧy men bılım alu jolyndaǧy talpynysy tūtas qoǧamnyŋ nazaryn audardy. Sonyŋ nätijesınde Ämırdıŋ mektep aşu jospary QR Eŋbek jäne halyqty äleumettık qorǧau ministrlıgı tarapynan qoldau tapty. Sonymen 2018 jyly sifrly oqytu jobasy bastau alyp, öz tiımdılıgın körsettı. Sebebı ol TMD elderı kölemınde aşylǧan alǧaşqy äleumettık mektep edı. Mümkındıgı şekteulı azamattardy, köpbalaly analardy, jūmyssyzdardy, mügedek bala tärbielep otyrǧan analardy tegın oqytu maqsatynda aşylǧan būl mektepte qazır SMM menedjerlerı, SEO mamandyǧy, kontekstı jarnama, JAVA äzırleuşıler, baǧdarlamalau jäne mobildı qosymşalardy äzırleu mamandyqtary boiynşa oqytu jürıp jatyr. Būl mamandyqtardy elımızdıŋ kez kelgen jerınde otyryp-aq qaşyqtyqtan oquǧa bolady.
Statistika boiynşa SMM marketingı mamandyǧy boiynşa oqytu AQŞ-ta 10 jyldyŋ aldynda, Europada 7 jyl būryn jüzege asyrylǧan. «AQŞ-ta 20 mln studenttıŋ üşten bır bölıgı onlain formatynda oqidy. Bızdıŋ elde de qaşyqtyqtan oqytudyŋ mümkındıgın keŋeitu kerek. Äsırese, būl mümkındıgı şekteulı jandar üşın öte qajettı» dep Ämır qaşyqtyqtan oqytudyŋ qajettılıgın de atap öttı.
2018 jyldyŋ 28 jeltoqsanynda QR Eŋbek jäne halyqty äleumettık qorǧau ministrlıgınıŋ qoldauynda, BŪŪ damu baǧdarlamasy men Ämır Süleimenovtıŋ Halyqaralyq aqparattyq tehnologiialar mektebı arasynda kelısımge qol qoiyldy. Osy kelısımge säikes, mümkındıgı şekteulı jandardyŋ bılım aluyna granttar beru qarastyrylǧan. Qazırgı taŋda būl bılım beru ornynan 100-ge juyq adam bılım alyp, onyŋ 80 paiyzy jūmysqa ornalasqan. 200-ge juyq adam keŋes alyp, öz mümkındıgın aşudyŋ jolyn tapqan. Atap aitqanda, atalǧan oqu ornynan bılım alǧan är 10 adamnyŋ 8-ı öz betınşe aqşa taba bastaǧan nemese jūmysqa ornalasqan.
Ötken aida «Biznestıŋ jol kartasy-2020» baǧdarlamasy boiynşa Ämırdıŋ aldaǧy maqsattaryn jüzege asyruyna qoldau körsetu maqsatynda memleketten 3 million teŋge qarjy bölındı. «Memleket tarapynan körsetılgen būl qoldau bızdıŋ jūmysymyzǧa tyŋ serpın beredı dep oilaimyn. Sebebı bız būl qarjyǧa kompiuter, fotoapparat siiaqty beinebaiandy sabaqtar jasauǧa, oqytuǧa qajettı qūral-jabdyqtardy satyp alamyz. Tūrmanymyz tügel bolsa, qaşyqtyqtan oqytu sapasy arta tüsedı» dedı Ämır.
