Su qoimasyndaǧy tazalau jūmystarynyŋ nätijesınde jaǧymsyz iıs tolyǧymen joiylyp, aqqular mekenıne ainaldy. Būl turaly Astana qalasy äkımdıgınıŋ media ortalyǧy habarlady.
Astana qalalyq Kommunaldyq şaruaşylyq basqarmasy mamandarynyŋ aituynşa, Taldyköldı tazalau jobasy erekşe täjıribe bolǧan. Öitkenı alǧaş ret elımızde jaǧymsyz iısı bar köl kırşıksız tazalanyp, qūstar qaityp oralǧan orynǧa ainaldy.
– Qazaqstan – TMD elderı ışınde aǧyndy sulardy tazalau boiynşa zamanaui ädıs-täsılderdı qoldanǧan alǧaşqy el. Su tazalaudyŋ klassikalyq tehnologiiasy bırneşe kezeŋnen tūrady: mehanikalyq, biologiialyq, flotofiltrasiia, ultrakülgın, zalalsyzdandyru. Barlyq kezeŋnen keiın möldır zalalsyzdandyrylǧan su Esılge qūiylady. Jer jūmystary men su tübındegı sazdy soru jūmystaryn Kommunaldyq şaruaşylyq basqarmasynyŋ tapsyrysymen «Alsim Alarko» JŞS jürgızıp jatyr. Ekı jyl būryn Taldykölge qaldyq sulardy qūiu toqtatyldy. Elorda basşylyǧy aumaqty qalpyna keltıru boiynşa auqymdy jūmystaryn bastap, aǧyndy su jinaqtauşyny retke keltıru mäselesın şeştı, – deidı basqarma ökılderı.
Qazırgı taŋda jer jūmystary 3 kezeŋ boiynşa jürgızılude. Bes balşyq sorǧyş keme tübın tereŋdetu jūmystaryn jüzege asyruda. Al köl tübınen alynǧan qūrǧatylǧan sor kädımgı topyraqpen aralastyrylyp, qaita qalpyna keltıru jūmystaryna paidalanyluda. Sondai-aq, köl kölemınıŋ tabiǧi şekarasyn qalypqa keltıru jūmystary jürgızılıp, su aidynynyŋ audany 2 myŋnan 450 gektarǧa deiın, iaǧni 4 ese kışıreiedı. Ekı jyldan keiın aǧyndy su audanyn körıktendıru jäne abattandyru josparlanǧan. Būl Taldyköldı tūrǧyndardyŋ uaqytyn ötkızetın orynǧa ainaldyrady.
