Tariftıŋ özgeruı jeŋıldıkpen jüretınderge äser etpeidı

Qalalyq mäslihattyŋ kezektı sessiiasynda elorda halqyn jūmyspen qamtu, jaŋa jūmys oryndaryn qūru, jeŋıldıkpen berıletın därı-därmektıŋ jaiy, taǧy basqa özektı mäseleler talqylandy. Parlament Mäjılısınıŋ deputaty Sapar Ahmetov, Astana äkımınıŋ bırınşı orynbasary Sergei Horoşun, qala basşysynyŋ orynbasary Malika Bektūrova qatysqan sessiiada mäslihat deputattary qoǧamdyq kölıkte engızılgelı otyrǧan saralanǧan tariftı bırauyzdan bekıttı.

ELEKTRONDY EŊBEK BİRJASY ENGIZILDI

«Halyqtyŋ ömır süru sapasy, memlekettıŋ ekonomikalyq äleuetı kez kelgen qoǧamda jetekşı orynǧa ie. Mūnda jūmyspen qamtu faktory äleumettık indikator retınde belgılengen. Ärine, Astana elımızdegı eŋ qarqyndy damyp kele jatqan qala bolǧandyqtan, būl mäsele airyqşa maŋyzdy jäne qala äkımınıŋ jıtı baqylauynda tūr» degen M.Bektūrova osy ba­ǧytta atqarylyp otyrǧan jū­mystarmen tanystyrdy.
Onyŋ baiandamasyndaǧy mä­lımet­terge jügınsek, biylǧy 1 mamyrǧa deiın qala halqynyŋ sany 1 mln 41 myŋ adamdy qūrady. Ötken jyldyŋ säikes kezeŋımen salystyrǧanda tūrǧyndar 4,3 paiyzǧa ösken. Sonyŋ ışınde ekonomikalyq belsendı halyqtyŋ sany – 532 myŋ. Jūmyspen naqty qamtylǧandar 507 myŋnan asady.
«Eŋbek naryǧyndaǧy jaǧ­dai tūraqty. Astanada el boiyn­şa jūmyssyzdyq deŋgeiı­nıŋ eŋ tömengı körsetkışı tırkel­dı. Būl 4,6 paiyzdy qūrap, jalpy­respublikalyq körsetkış­ten 0,3 paiyzǧa az» dedı qala basşy­sy­nyŋ orynbasary.
Halyqty jūmysqa ornalas­tyru mümkındıkterın keŋeitu maqsatynda köptegen şaralar qabyldanǧanyn aityp ötken M.Bektūrova şahardyŋ Jūmyspen qamtu ortalyǧy jaŋa formatqa köşkenın jetkızdı. Eŋ aldymen atalmyş ortalyq kadrlardy sapaly ırıkteuge den qoidy. Būryn būl ortalyq ötınış bergen adamǧa jūmys ızdegen bolsa, qazır jūmys beruşınıŋ özıne kadrdy ızdeu qajet.
«Ötken jyldyŋ qazan aiynan bastap elektrondy eŋbek birjasy engızıldı. Būl – Eŋbek jäne halyqty äleumettık qorǧau ministrlıgınıŋ jasaǧan jobasy. Bıraq bız ony «Smart Astana» jobasyna beiımdep, tolyǧymen igerdık. Ötınış beruşı men jūmys beruşınıŋ arasynda özara ıs-qimyl elektrondy formatqa köşırıldı» dedı M.Bektūrova.

JYL BASYNAN 10 MYŊǦA JUYQ ADAM JŪMYSPEN QAMTYLDY

Onyŋ aituynşa, qalada «Eŋbek» nätijelı jūmyspen qamtudy jäne jappai käsıpkerlıktı damytudyŋ 2017-2021 jyldarǧa arnalǧan baǧdarlamasyn jüzege asyruǧa biyl 3,7 mlrd teŋge bölındı. Sonyŋ ışınde respublikalyq biudjetten – 691 mln, maqsatty jalpy transfertterden – 2,2 mlrd jäne jergılıktı biudjetten 814 mln bölınıp otyr. Būl somanyŋ qazırge deiın 707 mln teŋgesı igerıldı.
Baǧdarlamany ıske asyru ba­ǧyttaryna toqtalǧan baiandamaşy tiıstı bazada 5 myŋnan astam bos jūmys orny bar ekenın jetkızdı. «Jūmyspen qamtu mümkındıkterın keŋeitu maqsatynda ünemı bos jūmys oryndary järmeŋkelerı ötkızılude. Jyl basynan berı osyndai 6 järmeŋke, būǧan qosa, şaǧyn 2 järmeŋke ūiymdastyryldy. Halyqty önımdı jūmyspen qamtu jäne elorda ekonomikasynyŋ negızgı sektorlarynda sapaly jaŋa jūmys oryndaryn qūru maqsatynda arnaiy basqaruşy komitet qūryldy» dedı qala basşysynyŋ orynbasary.
Sonyŋ nätijesınde jyl basy­nan 10 myŋǧa juyq adam jū­mys­­pen qamtyldy. Onyŋ ışınde memlekettık jäne salalyq baǧ­darlamalardy jüzege asyru baǧy­tynda 968 adam ekı qolyna bır jūmys tapsa, käsıpkerlık jäne önerkäsıp salasynda 9 myŋnan astam jaŋa jūmys oryndary qūryl­­dy. Jalpy, jaŋa nysan­dardy ıske qosu, öndırısterdı ­damytu arqy­ly biyl 19 myŋ 200 tūraqty ­ jūmys ornyn qūru ­jos­­parlanyp otyr.

DEPUTATTAR NE DEIDI?

Qalalyq mäslihat deputaty Miras Şekenov özın-özı jūmyspen qamtyǧan adamdardyŋ nemese beiresmi jūmyspen qamtylǧandardyŋ mäselesın şeşu kerektıgıne nazar audardy. «Qalai desek te, mūndai adamdar köleŋkelı ekonomikanyŋ paida boluyna sebep bolyp, būl faktor naqty ekonomikanyŋ damuyn tejeidı. Özın-özı jūmyspen qamtyǧandar äleumettık saqtandyru jüiesıne qatyspaidy. Zeinetaqy qoryna aqşa salmaidy. Olardyŋ köp jaǧdaida tūraqty tabysy bolmaidy. Sondyqtan, negızınen, mansaptyq ösudı oilamaidy. Osy sebepten bılıktılıgın köteru, önımdılıktı arttyru turaly da oilary joq. Būl jaǧdaidy jeŋuımız kerek» dedı M.Şekenov.
Onyŋ pıkırınşe, dualdı oqy­tudyŋ nasihaty az bop tūr. Deputat juyrda halyqty jūmyspen qamtu mäselesıne arnalyp ötkızılgen döŋgelek üstel mäjılısınde ärıptesı Almaz Kimnıŋ ūsynystary men Ramziia Umerbaevanyŋ bılım mäselesıne qatysty eskertulerın eske aldy. Qalalyq mäslihat deputaty Aqylbek Kürışbaev qaladaǧy joǧary oqu oryndarynyŋ potensialyn jūmysşy mamandardy daiyndauǧa paidalanudy ūsyndy.

KARTAMEN JÜRETINDER ÜNEMDEIDI

Qoǧamdyq kölıkte saralanǧan tariftı engızu qajettılıgı qandai sebepterden tuyndaǧany Kölık jäne jol-kölık infraqūrylymyn damytu basqarmasynyŋ basşysy Ashat Qaraǧoişinnıŋ baiandamasynda aityldy.
Jolaqy tarifı soŋǧy tört jyl boiy özgermegenı belgılı. Al osy aralyqta dizel otyny, kölıkterdıŋ qosal­qy bölşek­terınıŋ baǧasy ösken. Būl jaǧdai jolauşy tasymal­dauşylardyŋ şyǧynyn arttyryp, avtobus parkterı biyl tariftı qai­ta qarau turaly ötınışpen şyq­qan. Tiıstı esepterın de ūsynǧan. Būl esepterdıŋ tiıstı talaptarǧa säikestıgı tek­serıl­gen. Qorytyndysynda sara­lan­ǧan tariftı engızu turaly şeşım şyǧarylǧan. Kartamen jüretınderge būrynǧysynşa – 90 teŋge, qolma-qol aqşamen – 180 teŋge, «ekspress» baǧdarlarda, säikesınşe, 180 jäne 250 teŋge bolyp bekıtıldı. «Būl jaǧdai jolau­şylardy kartany paidalanuǧa şaqyryp, «jasyruly» jolauşylar aǧynyn anyqtap, qarjynyŋ köleŋkelı aǧymyn joiady. Osydan soŋ salyq türınde tüsetın qarjy kölemı ūlǧaiyp, biudjettı toltyrady» degen A.Qaraǧoişin saralanǧan tariftı engızudı qa­la­nyŋ Qoǧamdyq keŋesı maqūl­daǧanyn eske saldy. Astana äkımdıgı äleumettık maŋyzdy tasymaldauǧa subsidiia böletının, mūndai 60 avtobus baǧdary bar ekenın jetkızdı.
Astana äkımınıŋ bırınşı orynbasary Sergei Horoşun mäselenı tolyqtyra kettı. Tariftıŋ öz­ge­ruı avtobusta jeŋıldıkpen jüretın adamdarǧa eş äser et­peitının aitqan ol osy sanatqa jatatyndarǧa soŋǧy bır jyl boiy aqysyz negızde karta berılıp jatqanyn jetkızdı. «Bügıngı taŋda 120 myŋnan astam adamnan 90 myŋǧa juyq adam kartany aldy. Jyl boiy osy mäselenı tüsındırıp kelemız. Äleumettık topqa jatatyn kez kelgen adam qazır ke­lıp, kartany ala alady» dedı S.Horoşun. Onyŋ aituynşa, basynda kartany toltyru jaǧynan mäseleler tuyndady. Al jalpy saralanǧan tariftı engızu jospary 15 şıldege deiın belgılendı. Bıraq būl naqty emes, tüitkılder tuyndaityn bolsa, merzım keiınge şegerıledı.
«Bız bır saǧat ışınde avtobus­ty auystyrǧanda tegın jüretın jalǧyz aimaq şyǧarmyz. Özge öŋırlerdegıler mūndai jaǧdaida taǧy jolaqy tölese, Astanada, kerısınşe, qarjy ünemdeledı. Bylaişa alǧanda, ekı baǧdarda 45 teŋgeden töleidı» dedı qala äkımınıŋ bırınşı orynbasary.
Sessiia barysynda Qoǧamdyq densaulyq saqtau basqarmasy basşysynyŋ orynbasary Äliia Rüstemovanyŋ jeŋıldıkpen berıletın därı-därmek jaily, Jergılıktı polisiia qyzmetınıŋ bastyǧy Baqytjan Malybaevtyŋ atqarylǧan jūmys jönınde, Qūrylys jäne tūrǧyn üi saiasaty basqarmasynyŋ bastyǧy Ruslan Ahmetovtıŋ memleket mūqtajdyǧy üşın alyp qoiumen bailanysty jer telımderın nemese basqa mülıktı satyp alu turaly baiandamalary tyŋdaldy.