Apat aityp kelmeidı, bıraq qaityp keluı mümkın. Būl tūrǧyda köşelerdı su basu qaupıne bailanysty Astanada biyl qandai saqtyq şaralary atqarylyp jatyr? Jauapty mekemeler tabiǧattyŋ būl maşaqatyna daiyn ba? Özektı mäselenıŋ aldyn alu jönındegı jūmystar jaily köşpelı brifing öttı.
Bırneşe nysandy aralaǧan jūmys toby tılşılerdı atqarylyp jatqan jūmystarymen tanystyrdy. TJD qyzmetkerlerı tötenşe jaǧdai tötesınen kelse de tötep beremız deidı.
– Bügıngı uaqytta Astana qalasynyŋ äkımdıgımen bırlese otyryp, köktemgı su tasqynynyŋ aldyn alu jönındegı jūmys jospary qūryldy. Onda 255 tarmaq bar. Astanada köbınese qar suynan mäsele tuyndaitynyn bılesızder. 2017-2018 jyldary bolǧan jaǧdailardy taldai otyryp, qar suy alyp ketuı mümkın degen 34 aumaqty belgılep otyrmyz. Ol aumaqtarǧa tūrǧyn üiler, öndırıs aimaqtary jatady, – deidı Astana qalasy Tötenşe jaǧdailar departamentı bastyǧynyŋ mındetın atqaruşy Marǧūlan Amanbaev.
Astana qalasy Tötenşe jaǧdailar departamentı bastyǧynyŋ mındetın atqaruşy Marǧūlan Amanbaevtyŋ aituynşa, qazırgı taŋda Astana su qoimasynda 245 mln tekşe su bar. Qoimanyŋ maksimaldy sudy ūstap tūru mümkındıgı – 410 mln tekşe metr.
– Qoimadan keletın su elordadaǧy kontrreguliatorǧa kelıp tüsedı. Ol jerde qazır su joq. Iаǧni sudyŋ orny bos. Qazır Astana su qoimasynan jıberılıp jatqan sudyŋ kölemı – 4 mln tekşe metr ǧana. Bırınşı beket arqyly ol su Esıl özenıne jıberıledı. Jalpy, Astana qalasynyŋ äkımdıgı men Tötenşe jaǧdailar departamentı jäne basqa da qūrylymdar elordada su tasqynynyŋ aldyn alu üşın ülken jūmys atqardy. Elordada ötken «Köktem-2019» respublikalyq oqu-jattyǧuda Astana qalasy şaruaşylyqtarynyŋ tehnikalaryn, adamdarynyŋ daiyndyǧyn pysyqtap aldyq. Myŋnan asa adam men 600 tehnikanyŋ daiyn tūrǧanyn kördık, – deidı ol.
TJD mälımetınşe, osy uaqytqa deiın elordadan qala syrtyndaǧy poligonǧa 2 mln tonnadan asa qar şyǧarylǧan. Būl körsetkış byltyrǧydan şamamen 300-400 myŋ tekşege artyq körınedı. Qazır qar şyǧaru jūmysyna 500-den asa tehnika men 300-ge juyq jūmysşy jūmyldyrylypty.
– Astana qalasy boiynşa aryqtar men nöser qūbyryn tazartu jūmystary da qyzu jürgızılude. 22 myŋ şaqyrymdyq aryq tazartylyp, qatqan mūzdardyŋ bärı alynyp jatyr. Ärbır jeke tūrǧyn üidegı azamattar auladaǧy qardy syrtqa şyǧarsa, kommunaldyq ūiymdar qala şetındegı poligonǧa tasidy. Elordada ondai 4 poligon bar, – deidı M.Amanbaev.
Sarybūlaq özenınıŋ arnasyn 1,1 şaqyrymǧa keŋeitu jūmystary jürgızılıp jatqanyn söz etken Otyn-energetikalyq keşenı jäne kommunaldyq şaruaşylyq basqarmasy basşysynyŋ orynbasary İgor Alekseev tūrǧyn alaptar men su qoimasynyŋ qataŋ baqylauda ekenın atap öttı.
– Maibalyq kölınen Nūra-Esıl arnasyna deiıngı 5,4 şaqyrymdyq jerge tazalyq jūmystary jürgızıldı. Özennıŋ arnasymen jürıp ötıp, tar uchaskelerdı de anyqtadyq. Sonymen qatar Gazmaşapparatura audanynda barlyq jūmystar aiaqtaldy. Qazır ol jer su jıberuge daiyn, – deidı ol.
Jalpy, qalanyŋ är audanynda tasqynnyŋ aldyn alu şaralary qarqyndy türde jürgızılude. Almaty audanyna qarasty 76 äleumettık nysannan (26 balabaqşa, 25-ı – orta mektepter men 21 densaulyq saqtau nysany, 4 äleumettık nysan) qar şyǧarylǧan. Al Baiqoŋyr audanyndaǧy jauyn-şaşyn suyn qabyldaityn kärız jüiesı bar 40 köşenıŋ 16-syndaǧy aryq jelılerı tazartylǧan. Sonymen qatar Saryarqa audanyndaǧy adamdar köp jinalatyn saiabaqtar men demalys oryndarynyŋ, avtovokzal, temırjol vokzaly aumaqtarynyŋ jäne bılım ordalarynyŋ aumaǧy tazartylyp, PİK töraǧalary üilerdıŋ şatyryndaǧy qardy tazalau, özderınıŋ menşıktı aumaqtaryndaǧy qardy şyǧaru jönınde tüsındırme jūmystarymen ainalysuda. Esıl audanynda da qar şyǧaru, aryq jelılerın tazartu jūmystary bekıtılgen kestege säikes jürgızılude.
