Qys bıtıp, qalyŋ qar eri bastaǧan kezde su basu qaupı arta tüsetını belgılı.
Sol sebeptı elordada seldıŋ aldyn alu jūmystary bastalyp kettı. Keşe Astana qalasy Tötenşe jaǧdailar departamentınıŋ ūiymdastyruymen «Köktem-2017» respublikalyq komandalyq-ştabtyq oqu-jattyǧulary aiaqtaldy.
Biyl qalada qar men jauyn-şaşynnyŋ mölşerı ädettegıden ekı ese köp. Osy oraida, tötenşe jaǧdai qyzmetkerlerınıŋ basty mındetı – qalany qardan tazalap, tasqyndy boldyrmau. Qazırgı taŋda qala boiynşa tasqyn jüruı mümkın 37 aumaq belgılı. Olardyŋ törteuı Saryarqa audanyna qarasty. Künnıŋ kürt jyluynan 300-ge tarta jekemenşık üiı bar Köktal kentın su şaiyp ketu qaupı joǧary. Eldı mekendegı Mügedekter men qarttarǧa arnalǧan medisinalyq äleumettık mekemesı Esıl özenıne jaqyn ornalasqan. Sol sebeptı mamandar arnaiy oqu-jattyǧu jūmystaryn däl osy jerden bastady.
Astana qalasy Tötenşe jaǧdailar departamentınıŋ basşysy, azamattyq qorǧanys polkovnigı Barat Dūzaqbaev saqtyq şaralary turaly baiandap berdı:
– Bızdıŋ bölımge Köktal-1 yqşam audanynda su basu qaupı tuyndaǧany turaly dabyl kelıp tüstı. Soǧan säikes naqty tapsyrmalar berılıp, daiyndyq jūmystary pysyqtaldy. Mäselen, №3 ört söndıru bölımşesınde arnaiy ştab qūrylyp, oǧan qalanyŋ barlyq jedel qyzmetterı men apatty-qūtqaru jasaǧy tartyldy. Olardyŋ ärqaisysy öz baǧyty boiynşa jaǧdaidy qadaǧalaidy. Qala boiynşa su tasqynyna daiyndyq jūmystary jaqsy jürıp jatyr.
Taktikalyq oqu-jattyǧulary barysynda qūmǧa toly qaptardan qorǧanys üiındılerın jasau, qardy tazalap, şyǧaru, tasqyny bolǧan jerlerden sudy soryp alu jūmystary jürgızıldı. Sondai-aq, zardap şekkenderge jylytu men tamaqtandyru punktterın ūiymdastyru, adamdardy qauıpsız jerge köşıru siiaqty su tasqynyna qarsy äreketter josparlanǧan.
Köktaldaǧy qūtqaru şaralaryna 117 maman qatysyp, 36 tehnika tartyldy.
Güldana TALǦATQYZY
