Keşendı josparǧa säikes su tasqynyn boldyrmau jönınde elorda aumaǧynda biylǧy köktemde su basuy yqtimal 27 uchaske belgılenıp, olardyŋ ärqaisysyna qajettı materialdar men qarjy kölemı anyqtalǧan. Su tasqynyn aldyn alu maqsatynda qala äkımı Äset İsekeşev astanalyq su rettegışte bolyp, jūmys barysyn baqylady.
Qala äkımı aldymen gidrotehnikalyq qūrylystardyŋ daiyndyǧyn qadaǧalap, «Astana» su qoimasynyŋ jaǧdaiyn öz közımen kördı. Qar qorynyŋ kölemın bılu maqsatynda monitoring jürgızu jäne alynǧan derekterdı taldau turaly jūmys rejimınıŋ josparly kestesı bekıtılgen bolatyn. Äkım orynbasary Qosman Aitmūhametov su qoimasynyŋ 14 nauryzdaǧy jaǧdaiy turaly baiandady. Onyŋ mälımetınşe, atalmyş su qoimasynyŋ kölemı 283 mln şarşy metrdı qūraidy. Al «Qazgidromet» RMK men Astana qalasy TJD qyzmetkerlerınıŋ boljauynşa, tasqyn sudyŋ kölemı 280 mln şarşy metrden aspaidy dep kütılude.
Astana qalasyn Esıl özenıne qūiylatyn qar suynan qorǧau nysanynda bögenderdı nyǧaitu jūmystary jürgızılgen eken. Nätijesınde keşen su qabyldauǧa jäne aǧyzuǧa tolyq daiyn körınedı. Sondai-aq, Nūrsūltan Nazarbaev atyndaǧy halyqaralyq äuejai audany men Maibalyq kölınen su aǧyzatyn arnanyŋ zerttelgenın aitady mamandar.
Qazırgı uaqytta Maibalyq kölındegı su kölemı şamamen 62 mln şarşy metrdı, al tolyq kölemı 80 mln şarşy metrdı qūraidy.
Jergılıktı bilıktıŋ tapsyrmasy boiynşa Maibalyq kölınen «Nūra–Esıl» arnasyna baǧyttalǧan ūzyndyǧy 5,4 şaqyrymdy qūraityn arnany tazalau jūmystary aiaqtalypty. Būl uchaske mol su ötkızuge daiyn körınedı.
Gaz apparaturasy audanyndaǧy Esıl özenınıŋ arnasyn keŋeitu turaly mäsele de nazardan tys qalmady. Esterıŋızge salsaq, ötken jyly Talapker auylyna aǧatyn özen boiyndaǧy su basu qaupı joǧary uchaskeler anyqtalǧan bolatyn.
Äkımnıŋ tapsyrmasymen «KJBİ-56» jäne «Iýbileinoe» baǧbandy qoǧamdastyq audanyndaǧy özennıŋ eskı arnasyna qūm aralas tas töselgen. Ol 50 taiau saiajai uchaskelerın su basu qaupınen saqtamaq. Sonymen qatar, özennıŋ arnasyn keŋeitu jūmystary da jürgızılude. «Kışı Taldyköl» audanyna da erekşe nazar audaryldy. Qala äkımı Äset İsekeşev bastaǧan jūmys toby Ürker tūrǧyn alabyna da at basyn tıredı. Keibır bögetterdı qalypqa keltırıp, köktemgı su tasqynyn aldyn alu şaralaryn qadaǧalaǧan qala basşysy audan äkımderıne tūrǧyn üi alaptarynan qar şyǧarudy tez arada aiaqtaudy jäne kärız jüielerın qar suyn qabyldauǧa daiyndaudy tapsyrdy.
