Kün jylynyp, qys qamytynan bosaǧan jer jüzı busanyp, qar erıp, elordaǧa köktem kelgelı berı tabiǧat erekşe küige bölenude. Aua raiynyŋ osynau qolaily sätın paidalanyp, qalalyq kommunaldyq qyzmet ainalany qystan qalǧan kül-qoqystan aryltyp, ırılı-ūsaqty qaldyqtardan tazartu jūmystaryna kırıstı.
Kögıldır köktemnıŋ jaima-şuaq künınde elordanyŋ basqa barlyq audandary sekıldı Saryarqa audanynyŋ äkımdıgı de ekologiialyq tazalyq şarasyna belsene atsalysty. Jyldaǧy dästür boiynşa audan aumaǧyndaǧy kommunaldyq sala qyzmetkerlerı, mekeme, käsıporyn ūjymdary audan aumaǧynda ornalasqan köpırlerdı, eskertkışter men trotuarlardy, jol belgılerı men qorşaulardy juyp, ainaladaǧy qystai qar astynda jatqan kül-qoqysty, būta tübın tazalap, üiılıp qalǧan şyny bötelkeler, plastmass qūtylar, sellofan qapşyq-qaltalar men jer-jerde üiılgen tūrmystyq qaldyqtardy jinady. Sondai-aq gülzarlar, saiabaqtar, qoǧamdyq keŋıstıkter qoqystan tazartylyp, qoqys jäşıkterı boialdy. Osylaişa är mekeme özınıŋ ainalasyn tap-tūinaqtai etıp tazartyp, nätijesınde qala köşelerı bırşama tazalanyp qaldy.
«Aua raiy jylynǧan uaqyttan bastap Saryarqa audanynyŋ köşelerın sanitarlyq tazalau jūmysyna kırıstık. Oǧan 431 jol jūmysşysy jäne 159 bırlık arnaiy tehnika jūmyldyryldy. Tazartu jūmystary täulık boiy jürgızıledı. İgı ıstıŋ nätijesınde audandaǧy trotuarlar men asfalt, qorşaular, jerasty ötkelderı, jol belgılerı, qoqys jäşıkterı jäne aialdamalar kırden tazartylyp, osy jūmystar üşın suaru-juu jäne sypyru-jinau maşinalary ıske qosyldy» dedı Saryarqa audany äkımı apparaty kommunaldyq şaruaşylyq bölımınıŋ basşysy Temırlan Arinov.
Jyl saiyn köktem aiy kelısımen jer-jerde sanitarlyq tazalyq şaralary keŋ kölemde jüzege asyrylyp, tūrǧyn üilerdıŋ kıreberısterı men alaŋqailaryn taza ūstau jäne ainalany kögaldandyru jūmystary üzdıksız jürgızılude. Arnaiy tehnikalardyŋ kömegı arqyly trotuarlar men jol tösemderı tazalanyp, kögaldy tūstar men özge de aşyq alaŋdardaǧy kül-qoqys qolmen tazartyldy. Sol siiaqty kommunaldyq qyzmet küşterı erıgen qar suyn arnaiy tehnika kömegımen soryp aldy.
Kün jylynǧaly berı atalmyş audan äkımınıŋ apparaty sanitarlyq tazalau jūmystaryn küşeitılgen rejimde jürgızıp jatqanyn jetkızgen bölım basşysy bügıngı taŋda audandaǧy kommunaldyq sala qyzmetkerlerımen jol tösemderın, trotuarlardy, jol qorşaularyn jäne şaǧyn säulet nysandaryn juu jūmystary bastalǧanyn aitty.
«Qorşaǧan ortanyŋ tazalyǧyna jauapkerşılıkpen qarau – ärbır azamattyŋ basty mındetı. Qalanyŋ taza, ädemı ärı jasyl jelekke oranyp tūruy ärbır adamnyŋ süiıspenşılıgı men janaşyrlyǧyn qajet etedı. Sondyqtan tazalyq mäselesı aldyŋǧy orynda tūruy kerek dep esepteimın. Soŋǧy jyldary elordanyŋ auqymy keŋeiıp, kün sanap qaryştap damuda. Būl rette audanymyzdyŋ ärbır tūrǧyny ainalamyzdyŋ körkeiıp, güldenuıne bei-jai qaramai, tūrmystyq qaldyqtardy kez kelgen jerge laqtyrmai, taza ūstauǧa atsalysuy qajet» dedı T.Arinov.
Rasynda da, kez kelgen damyǧan eldıŋ basty aiqyndauşysy – qalanyŋ tūraqty türde taza boluy. Būl rette özen jaǧalauyndaǧy töbe-töbe bolyp üiılgen jabaiy qoqys alaŋşaqtary menmūndalap köŋılge kırbıŋ tüsırıp qana qoimaidy, eŋ qiyny qorşaǧan ortaǧa ülken zalalyn tigızetını aqiqat. Al kül-qoqystan şyǧatyn jaǧymsyz iısten bölek densaulyqqa ziianyn tigızer türlı mikrobtardyŋ ainalaǧa tarauy asa qauıptı ekenı aitpasa da belgılı. Saiyp kelgende, qalaǧa sol qoqysty syrttan bıreu äkelmeidı. Ainalany lastaityn da özımız. Sondyqtan tazalyqty är tūrǧyn öz aulasynan bastauy kerek. Bala-şaǧamyzǧa tuǧan jerdıŋ qadır-qasietın sezındıre otyryp, qorşaǧan ortany lastamaudy, köktı jūlmaudy, aǧaşty kespeudı, köşege kül-qoqys tastamaudy üiretsek, künı erteŋ olar da bas qalamyzdy aialap, ainala tazalyǧyn saqtai bıluge daǧdylanar edı.
Säuır aiynyŋ ortasynda elordada dästürlı ekologiialyq ailyqtar men jalpyqalalyq senbılıkter bastalady. Osy jūmys aiasynda qalanyŋ barlyq audanynda äkımdıkterdıŋ jauapty qyzmetkerlerı bekıtılgen kvartaldar men sektorlar boiynşa tazalyq jūmystaryn jürgızetın bolady. Saryarqa audany äkımı apparaty kommunaldyq şaruaşylyq bölımınıŋ basşysy osyǧan orai barlyq tūrǧyndardy, audan aumaǧyndaǧy jekemenşık päter ielerınıŋ kooperativterı men menşık ielerınıŋ bırlestıkterın, sondai-aq biznes pen mekeme ökılderın jalpyqalalyq senbılıkterge qatysuǧa şaqyrdy. Būl rette qai-qaisymyz da tuǧan qalamyzdyŋ tazalyǧy eŋ aldymen özımızge, ärbır tūrǧynnyŋ sana-sezımıne, elıne, jerıne degen süiıspenşılıgı men jauapkerşılıgıne bailanysty ekenın esten şyǧarmaiyq.
Gülbarşyn ÖKEŞQYZY
