Gazetımızde «Teletereze» aidary aşylǧaly qazaq telearnalary, telebaǧdarlamalar töŋıregınde mazmūndy materialdar jaryq körıp kele jatqany jalpy oqyrmanǧa belgılı. Solardyŋ qatarynda «Diktorlar nege tıstenıp söileidı?» (5 mausym, 2018 j.), «Diktorlar dūrys söilesın desek…» (19 şılde, 2018 j.) degen atpen telejürgızuşıler turaly da maqalalar jariialanǧan edı.
Telearnalar – el ainasy. Är üidegı kök jäşık jai aqparat nemese körıp, tamaşalap, uaqyt ötkızetın qūral ǧana emes, ūlttyq ideologiia jarşysy, tärbie men mädeniet oşaǧy ekenı de barşaǧa aian. Sol sebeptı är körermennıŋ telearnalar turaly aituǧa, jazuǧa, öz ūsynys-talabyn ortaǧa saluǧa tolyq haqysy bar.
Būl oraida «Astana aqşamy» gazetınıŋ redaksiiasyna kelıp jatqan hattar da az emes. Atalǧan maqalalardy da bız, negızınen, osyndai talǧampaz, talapşyl, sanaly körermenderdıŋ oi-pıkırı negızınde daiyndaǧan bolatynbyz. Aty aityp tūrǧandai, ekı maqalada da qazırgı köpşılık telejürgızuşılerdıŋ söileu mänerı, diksiiasy, aqparat jetkızudegı közge oǧaş körınıp tūratyn qatelıkterı synalǧan edı.
Arada ai ötkende Zeiın Älıpbek, Aigül Mükei, Gauhar Kerımova syndy 90-jyldardyŋ soŋynda telearnalar arqyly elge esımı keŋınen tanylǧan täjıribelı diktorlardyŋ efirge qaita oralatyny jönınde aqparat tarady. Telearna mamandary būl jaŋalyqty feisbuk paraqşalarynda süiınşılep jazypty.
Qyrküiek aiynan bastap, iaǧni jaŋa mausymda «Habardyŋ» negızgı jaŋalyqtaryn endı Zeiın Älıpbek pen Gauhar Kerımova jürgızetınge ūqsaidy. Al belgılı telejurnalist Aigül Mükei «Davaite, govorit» atty tok-şoudy jürgızbekşı.
«Qazaqstan» ūlttyq arnasynyŋ diktory, belgılı tūlǧa Qymbat Dosjan būl jaŋalyqqa orai «Men quanyştymyn. Maitalmandar oraluda» dep pıkır qaldyrǧan eken.
