Keşe Astanadaǧy Q.Quanyşbaev atyndaǧy Memlekettık akademiialyq qazaq muzykalyq drama teatrynyŋ jaŋa XXVIII mausymy jyldaǧy dästürge sai Qazaqstannyŋ eŋbek sıŋırgen qairatkerı, rejisser Älımbek Orazbekov qoiǧan «Abai» tragediiasymen aşyldy. Būl mausym teatr esımın enşılep otyrǧan sahna saŋlaǧy, qazaq ūlttyq käsıbi teatr önerınıŋ negızın qalauşylardyŋ bırı, KSRO halyq ärtısı, KSRO Memlekettık syilyǧynyŋ laureaty Qalibek Quanyşbaevtyŋ tuǧanyna 125 jyl toluymen tūspa-tūs kelıp otyr.
Jylda teatr mausymynyŋ «Abai» spektaklımen aşyluynyŋ özındık ülken sebebı bar. Abai beinesın sahnaǧa alǧaş alyp şyqqan Qalibek Quanyşbaev bolatyn. Zamandastary Qalleki atap ketken äigılı ärtıstıŋ osy rölın tuyndy avtory, zaŋǧar jazuşy Mūhtar Äuezovtıŋ özı joǧary baǧalady. Sondyqtan qoiylymdy sahnalau qallekilıkterge ülken jauapkerşılık jükteidı.
Spektaklden ekı Abaidy köruge bolady. Tolysqan, kemeldengen Abai beinesın – Qazaqstannyŋ halyq ärtısı Tılektes Meiramov somdasa, jastau, albyrttau Abaidy – Qazaqstannyŋ eŋbek sıŋırgen qairatkerı Nūrken Öteuılov oinaidy.
Jalpy biyl Qalleki teatry elordanyŋ 20 jyldyq mereitoiyna arnalǧan Astana qalasynyŋ el öŋırlerındegı mädeni künderı kezınde aimaqtar tūrǧyndaryna repertuaryndaǧy üzdık qoiylymdaryn ūsyndy. Sonyŋ ışınde Almatyda «Otello», «Şie» jäne «Qaraş-Qaraş» qoiylymdaryn qoidy. Osy şaharda Tılektes Meiramovtyŋ 70 jyldyǧyna orai ärtıstıŋ şyǧarmaşylyq keşı ötıp, «Qardaǧy kögerşınnıŋ ızı…» qoiylymynyŋ premerasy öttı. Spektakldıŋ alǧaşqy körsetılımı Qazaqstan Teatrlary assosiasiiasy qoldauymen mereitoi iesınıŋ alǧaşqy ülken sahnasy – M.Äuezov atyndaǧy Qazaq memlekettık akademiialyq drama teatrynda öttı. Premeranyŋ arnaiy körsetılımı Tılektes Meiramovtyŋ tuǧan jerı Qaraǧandy öŋırınde jalǧasty. Elorda törındegı mereitoi qaraşa aiyna josparlanyp otyr.
Al qallekilıkter ötken mausymda Serık Tūrǧynbekūlynyŋ «Şämşı» elegiiasy (rejisserı QR eŋbek sıŋırgen qairatkerı Bolat Ūzaqov), Aidyn Salbannyŋ «Oiynşyqtar oianǧanda» ertegısı (Farhat Moldaǧali), Uiliam Şekspirdıŋ «Otello» tragediiasy (Qazaqstannyŋ halyq ärtısı Talǧat Temenov) jäne Ken Kizidıŋ «7+1» dramasy (Qazaqstannyŋ eŋbek sıŋırgen qairatkerı Älımbek Orazbekov) syndy tört premera ötkızdı.
Jaŋa mausymda da būl ūjym qyzyqty premeralar ūsynbaq.
