Jalǧan terrorşylar köbeiıp keledı. Juyrda, dälırek aitsaq, 14 qaraşada Astanadaǧy №22 mektepte bolǧan tötenşe oqiǧa jūrttyŋ zäresın ūşyrǧany ras. Ai-künnıŋ amanynda mektepke telefon soqqan bır er adam «Bügın saǧat 11-de mektepte bomba jarylady» dep habarlaǧan.
Tūtqany köterıp, suyt habardy estıgen direktordyŋ orynbasary Vera Razdobreeva jedel direktorǧa, qalalyq Bılım beru basqarmasyna jäne «102»-ge telefon şalady. Bırneşe minuttarda ǧimaratqa kelgen qūtqaruşylar 20 minutta 1806 adamdy syrtqa şyǧarady. Mektep basşylyǧy joǧary synyp oquşylaryn üilerıne qaitarady. Al bastauyş synyp oquşylary ata-analaryn äkımdık jıbergen arnaiy avtobusta küttı. Mūǧalımder ata-analardy şoşytpas üşın «mektepte oqu-jattyǧular jürıp jatyr» degen habar jıbergen. Alaida jarty saǧattan keiın «bomba jarylady» degen aqparattyŋ jalǧan ekenı rastaldy. Eşqandai jarylǧyş zat tabylǧan joq.
Būl jolǧy jalǧan terrorşy 15 jastaǧy oquşy bolyp şyqty. Ol mūndai äreketke būzaqylyq piǧylmen barǧan körınedı. Polisiia departamentınıŋ qyzmetkerlerı terrorlyq aktı turaly jalǧan aqparat taratu faktısı boiynşa (QR Qylmystyq kodeksınıŋ 273-baby) sotqa deiıngı tergeu amaldaryn jürgızuge kırıstı. Qalalyq IID-nıŋ baspasöz qyzmetınıŋ jetekşısı Sofia Qylyşbekova būl oqiǧany bylai tüsındırdı: «Jedel ızdestıru şaralary barysynda 15 jasar jasöspırım qolǧa tüstı. Onyŋ aituynşa, jedel äreket etu jüiesın synap körmekşı bolǧan. Sondai-aq, būzaqylyq faktısı da qarastyryluda. Mūndai qylmystardy anyqtau men aşuǧa baǧyttalǧan jaŋa tehnikalyq qūraldardyŋ kömegımen jalǧan terrorşylardy anyqtau men qolǧa tüsıru köp qiyndyq tuǧyzbaidy».
Poliseiler mūndai qylmys jasaǧan adamdardyŋ äkımşılık jäne qylmystyq jauapkerşılıkke tartylatynyn mälımdedı. Mäselen, Qylmystyq kodekstıŋ 273-baby boiynşa 6 jylǧa deiın bas bostandyǧynan aiyru qarastyrylǧan. Sonyŋ ışınde adam öltıru, adam densaulyǧyna qasaqana ziian keltıru, adam zorlau, būzaqylyq, ūrlyq, tonau, bopsalau, terrorlyq aktısı, terrorizm turaly jalǧan habar taratu siiaqty qylmystary üşın balalar 14 jastan bastap jauapkerşılıkke tartylady. Eger de jalǧan terrorşy balanyŋ qylmysy däleldenetın bolsa, ol 6 jylǧa türmege qamalady. Aitpaqşy, 2018 jyldyŋ basynan berı elordada mūndai 9 oqiǧa tırkelıptı. Sonyŋ ışınde 7-euınıŋ bet-beinesı telefon şalǧannan keiın bır täulık ışınde anyqtalyp, tiıstı jazasyn alǧan.
Jūrtty jalǧan aqparatpen qorqytamyn dep barmaǧyn şainap, temır torǧa toǧytylǧandardyŋ tırlıgı özgelerge sabaq bolsa, qaneki!
