«Digital System Servis» JŞS kompaniiasy telekommunikasiialyq naryqta 2005 jyldan bastap tūraqty qyzmet körsetıp keledı. Osy kezeŋ ışınde ol Mitel, Aastra, Ericsson, Advantech Wireless jäne t. b. siiaqty jetekşı älemdık öndıruşılermen tabysty jūmys ıstep, özın senımdı serıktes retınde moiyndatty.
Kompaniia telekommunikasiialyq jabdyqtardy jobalaudy, jetkızıp berudı, montajdaudy, keşendı integrasiialaudy jüzege asyrady jäne önımderın paidalanuǧa beredı. Būl salada tek Qazaqstanda ǧana emes, alys-jaqyn şeteldık käsıporyndarǧa da servistık qyzmet körsetedı.
IT salasyndaǧy autsorsingtı qamtityn telekommunikasiialyq jobalardy äzırleidı jäne osy baǧytta basqa da qyzmetterdıŋ tolyq spektrın ūsynady.
– «Digital System Servis» JŞS ärdaiym damuǧa jäne özın-özı jetıldıruge ūmtylady, ol tolassyz damu üstınde, – dedı käsıporyn direktory Marat Mūsabekov. – Bız körsetetın qyzmetterdıŋ barlyǧynyŋ sapasy joǧary bolyp tabylady. Oǧan älemdık deŋgeidegı kompaniialardyŋ bızdı serıktes retınde moiyndauy jäne atqarǧan jobalarymyzdyŋ tabystylyǧy kepıl.
Kompaniia alǧaş telekommunikasiialyq jabdyqtar men onyŋ baǧdarlamalyq jasaqtamasyn äzırlei bastaǧanynda ūiymda tek üş-aq adam bolǧan. Odan öndırıstı örkendetu jäne şyǧarylatyn önımder kölemın ūlǧaitu maqsatynda zauyt salu qajet boldy. 2016 jyly Nūr-Sūltan qalasynyŋ äkımdıgı «Astana – jaŋa qala» arnaiy ekonomikalyq aimaǧynyŋ №1 industrialdy parkı aumaǧynan telekommunikasiialyq jabdyqtar –modemder, kommutatorlar şyǧaratyn zauyt qūrylysyna jer uchaskesın böldı. Degenmen käsıporyn qoryndaǧy qarajat zauyt saluǧa jäne öndırıstı ärı qarai damytuǧa jetkılıktı emes edı.
Käsıpker M.Mūsabekov bizneske memlekettık qoldau alu üşın «Damu» qorynyŋ astanalyq filialyna jügındı. Qajettı qūjattar paketın jinap, oiǧa alǧan ısıne bel şeşe kırıstı. Sodan 3-4 aidyŋ ışınde memleketten bırneşe baǧdarlama boiynşa keşendı qoldau tapty. Zauyt qūrylysyn investisiialauǧa 14,25 paiyz nesie bölındı, onyŋ 40 paiyzy «Biznestıŋ jol kartasy-2020» memlekettık baǧdarlamasy şeŋberınde subsidiialanatyn boldy. Qalǧan bölıgın käsıpkerdıŋ özı töledı. Nesie merzımı – 5 jyl.
Nesie aluǧa qoiylatyn kepıl mülıktıŋ jetkılıksızdıgıne bailanysty «Damu» qory onyŋ 30 paiyz mölşerın öz tarapynan kepıldendırdı. Sondai-aq memlekettıŋ öŋdeuşı önerkäsıptı qoldau baǧdarlamasy aiasynda öndırıstık stanoktardy jeŋıldıkpen satyp aluǧa 6 paiyzben qaryz berıldı. Sonyŋ nätijesınde 2018 jyldan bastap kompaniia kelesıdei telekommunikasiialyq jabdyqtardy öndıruge kırıstı: modemder, kommutatorlar, telefon stansalary. 2019 jyly kompaniia jinaqtauşylardy satyp alu üşın «Forte Bank» AQ bankınen qosymşa taǧy nesie aldy.
Bügınde «Digital System Servis» JŞS-te 70-ke tarta adam jūmys ısteidı. Mamandar Qazaqstannyŋ maqtauly tehnikalyq universitetterınen basqa, Ūlybritaniianyŋ, Mäskeudıŋ joǧary oqu oryndarynda oqyp kelgen. Zauyt aiyna 3 myŋ türlı qūrylǧylar şyǧarady. Keler jyly jabdyqtar sanyn aiyna 40 myŋǧa jetkızu jospary bar.
– Oǧan käsıporyn quatynyŋ jäne mamandarymyzdyŋ bılıktılıgı tolyq jetedı. Zauyttyŋ älı de ıske qosylmai jatqan öndırıstık sehtary bar. Sol kezde jūmysşylar sanyn da arttyratyn bolamyz. Tıptı qazır de qosymşa jūmys qolyna zärumız. Äzırge zauytta jūmys ısteuge qūlşynyp otyrǧan jastardy köp kezdestıre qoimadyq, – deidı Marat Mūratūly.
Aita keteiık, kompaniia qyzmetkerlerınıŋ ortaşa jalaqysy – 178 myŋ teŋge. Jūmysşylar üşın ekı jataqhana salynǧan. Qyzmetkerler zauyt ashanasynan tegın tamaqtanady. Odan bölek, 2-3 jylda ozat mamandarǧa päter syilau dästürge ainalǧan. Sondai-aq jyl saiyn şetelde demalyp keluge 10 adamǧa tegın joldama berıledı.
