Tergeu qyzmetınde eŋ keregı – ar aldyndaǧy adaldyq. Aqiqattyŋ aq jolynan auytqymai qyzmet atqaru. Būl o bastan ata tärbiesın körgen jıgıttıŋ ömırlık qaǧidasy bolyp qalyptasqan. Adam söileskenşe… Astana qalasy Saryarqa audany Işkı ıster basqarmasy bastyǧynyŋ orynbasary Nūrlan Mūsanbekovpen käsıbi merekesı qarsaŋynda äŋgımemız bırden jarasa kettı. Qazaqy auylda, ūlttyq tärbienıŋ şynaryn emıp ösken polisiia qyzmetkerımen şüirıkelese kele kökeiımızge osyndai oi tüidık…
Qazaq memlekettık universitetınıŋ zaŋ fakultetın bıtıretın jyly menı öndırıstık täjıribeden ötuge Almaty qalasy Medeu audanynyŋ ışkı ıster basqarmasyna jıberdı. Mıne, osy jerde men özımnıŋ qalaǧan mamandyǧymnyŋ qūrmetın sezındım. Organ qyzmetkerlerımen qarym-qatynas, aiaǧyn şalys basyp, qylmys jasaǧan adamdarmen betpe-bet kelu, olardyŋ ıstegen ısterın saralap, taldau maǧan erekşe äser ettı. Tergeuşılık mamandyǧyna degen süiıspenşılıgım tereŋdei tüstı. Men sol sätten bastap jüregıme etene jaqyn käsıptı taŋdaǧanyma köz jetkızdım. Sodan bolsa kerek, universitet bıtırerde maǧan joldama prokuraturaǧa kelgen bolatyn. «Joq, tergeuşılıkke baramyn» dep Astana qalasyna jol tarttym» dep esıne alady Nūrlan Baidosūly alǧaşqy eŋbek jolyn bastaǧany turaly.
Elordasyna taudai talap arqalai jetken jıgıttıŋ aiy oŋynan tudy. Baǧyna qarai qaiyrymdy da, kışıpeiıl, parasatty tälımgerge jolyqty.
«Asa maŋyzdy ıster boiynşa tergeuşı Sergei Viktorovich Girun degen kısı boldy. Qazır zeinet demalysynda. Mıne, sol kısı alǧaşqy künnen-aq «tergeuşı sauatty jäne kez kelgen saladan habary boluy kerek. Sebebı qylmys ärtürlı baǧytta jasalady. Būǧan qosa, oi ūşqyrlyǧy, ışkı tüisık pen sezımtaldyq qasietter öte qajet. Ol saǧan – qylmystyq ıske jüielı taldau jasap, aqiqatqa köz jetkıze bılu üşın taptyrmas temırqazyǧyŋ. Adamdarmen tez tıl tabysa bılu de tergeuşınıŋ ısın alǧa bastyrady. Endı ol bır kezde aǧalarynan alǧan tälımın özınen keiıngı jastarǧa sıŋıruge küş saluda. Ūrpaq sabaqtastyǧy degen osylai jalǧasyn tapsa kerek…
Nūrlan Baidosūly kün demei, tün demei uaqytpen sanaspai, damyl tappastan eŋbek etıp jürgende halyq polisiiaǧa köbırek senım artsa eken deidı. Öitkenı qazır qylmystyŋ türı köbeigenı bylai tūrsyn, qylmyskerler neşe türlı qūityrqylyqqa, aila-şarǧyǧa baruda. Alaiaqtyq, aldau-arbau azaimai otyr. Oǧan sebepşı bolatyn da adamdardyŋ özderı. Mäselen, Tarazdan kelgenıne bır ai bolǧan adamǧa «Astanadan tamyr-tanystyqpen päter alyp beremın» degenge senıp, barlyq jiǧan-tergenın qolyna ūstatatyndar bar. Ärı olar ūzaq uaqyt jalǧan uädege maldanyp, polisiiaǧa jaqyndamai jürıp alatynyn qaitersıŋ. Eŋ soŋynda amaly tausylǧandyqtan jylap-eŋırep tergeuşınıŋ aldynan bır-aq şyǧady.
Zaiyby Gülsım ekeuı bır ūl, bır qyz tärbielep otyrǧan ol bala tärbiesıne de asa män beredı eken. «Ärine, polisiia qatarynda qyzmet etu – asqan jauapkerşılık. Ol otbasynan da körınuı kerek. Balalarymnyŋ qatarynan kem qalmai, öz ortasynda bılımdı, tärbielı azamat bolyp öskenın qalaimyn. Osyǧan köp köŋıl böluge tyrysamyn» deidı podpolkovnik.
Adam boiyndaǧy adaldyqty, şynaiy dostyqty, qarapaiymdylyqty qadırleitın keiıpkerımızdıŋ eŋbegı ädıl baǧalanyp, bırneşe ret Işkı ıster ministrı tarapynan qūrmet gromatalary men alǧys hattarǧa ie bolǧan. Täjıribe jinap, özı de būl künde jastar tälımgerıne ainalǧan.
«Qazır qūqyq qorǧau organy qyzmetkerlerıne memleket tarapynan ülken qamqorlyq jasalyp otyr. Äsırese, jastardyŋ osy salada tūraqtap qaluy üşın äleumettık-tūrmystyq jaǧdailaryna aitarlyqtai kömekter körsetıledı. Soǧan säikes, polisiiada da köpke ülgı bolar, antyna adal, sertıne berık talai azamat ösıp keledı. Bız de ūjymymyzda osy jerge tūraqtap eŋbek etemın degen jastarǧa barynşa mümkındık tuǧyzamyz» dedı podpolkovnik.
Taŋatar TÖLEUǦALİEV
