Tıleuǧali QYŞQAŞBAEV: Elorda mädeniet ordasyna ainaldy

10 mausymda Astananyŋ halyq­aralyq tūsaukeserı ötkenıne 20 jyl toldy. Tarihqa ainalǧan būl aituly oqiǧany ūiymdas­tyru elordanyŋ Mädeniet basqarmasynyŋ alǧaşqy basşysy Tıleuǧali Qyşqaşbaevtyŋ da enşısıne tidı. Bügınderı bas qalanyŋ Tılderdı damytu jäne arhiv ısı basqarmasynyŋ tızgının ūstap otyrǧan Tıleuǧali Äşırbekūlymen Astana mädenietınıŋ bastapqy qalyptasu kezeŋı turaly, qaladaǧy ataular jaiynda sūhbattastyq.

BASTYSY, MAMANDAR KEREK BOLDY

– Tıleuǧali aǧa, äŋgımemızdı özıŋızdıŋ Mädeniet basqarmasynyŋ basşysy bolyp taǧaiyndalǧan uaqyttan bastasaq. Būl qyzmetke kelgen bette jū­mysty neden bastadyŋyz?
– Qazırgı Astana, sol kezdegı Aqmolaǧa qala äkımdıgınıŋ şa­qyruymen 1998 jylǧy 10-şy qaŋtarynda keldım. Ol kezde men Mädeniet ministrlıgınıŋ bas basqarmasynyŋ basşysy qyzmetın atqaryp jürgen edım.
Odan bır ai būryn ǧana iaǧni 1997 jylǧy 15 jeltoqsanda astana ortalyǧy Alataudan Arqaǧa köştı. Ūly köştıŋ qūrmetıne qaladaǧy «Jastar» saraiynda saltanatty konsert ūiymdastyryldy. Oǧan tört memlekettıŋ prezidentterı qatysyp, Elbasyn qūttyqtady. Atauly şaraǧa sol uaqyttaǧy Mädeniet ministrı­nıŋ bırınşı orynbasary, Qazaq­stannyŋ halyq ärtısı Esmūhan Obaev ekeumız tört-bes vagonǧa lyq toly ärtısterdı bastap alyp kelgen bolatynbyz. Qazırgı Beibıtşılık köşesı men Bögenbai batyr daŋǧylynyŋ qiylysyndaǧy politehnikalyq kolledjınıŋ maŋyndaǧy jataqhanaǧa ornalasyp, «Jastar saraiynda» konserttı joǧary därejede ötkızdık.
Osydan jiyrma jyl būryn kelgenımde baiqaǧanym, qalada Mädeniet basqarmasy joq eken. Jaŋa şaharda alǧaşqylardyŋ bırı bolyp Qarjy jäne Bılım basqarmalary aşyldy. Odan keiın Mädeniet basqarmasy qūryldy. Osy mekemenıŋ bırınşı basşysy bolyp taǧaiyndaldym. Ştatqa 25 adamdy berdı. Alaida qyzmetke jūmystyŋ tetıgın jaqsy bıletın, ısker, bılımdı, talantty kadrlardy tartu kerek boldy. Sonymen mädeniet salasynyŋ bel ortasynda būrynnan jürgen Aqmola qalasyndaǧy 4-5 mädeni qyz­metkerdı aldym. Almatydan, özge de öŋırlerden maitalman mamandardy jinadym. Söitıp, bırte-bırte ūjym qalyptastyr­dym. Qazırgı taŋda solardyŋ köpşılıgı qaladaǧy mädeni ūiymdardy basqaryp otyr.
Sol tūsta qala äkımınıŋ oryn­basary, Memlekettık syilyq­tyŋ laureaty kompozitor Tölegen Mūhamedjanovpen bırge qoian-qoltyq jūmys jasadyq. Jūmysymyzdy taŋǧy saǧat 7-de bastap, tüngı 12-de «Jastar» saraiynda jinalys ötkızıp jürdık. Sonda bızge kıtaphanaşy­lardyŋ kömegı köp tidı. Öit­kenı, qaladaǧy mädeni qyzmetkerlerdıŋ köpşılıgı osy salanyŋ mamandary edı.

– Astananyŋ halyqaralyq tūsaukeserıne daiyndyq qalai jürdı?
– Būl şaraǧa daiyndyqty qoldaǧy bar mümkındık Aqmola oblysynan qalǧan körkemönerpazdarmen bastadyq. Uaqyt öte tyǧyz naiqaludy kütpeidı. Öit­kenı tūsaukeserge deiın nebärı alty aidai ǧana uaqyt qaldy. Äsırese, bişıler jetıspedı. Sodan Almatydan rejisserlerdı, baletmeisterlerdı, ssenaristtı şaqyrtyp päter jaldauǧa tura keldı. Onyŋ syrtynda arnaiy daiyndalatyn oryn da joq. Ol kezde qazırgıdei ırı-ırı mädeni ortalyqtar mülde bolmady. Qys­tyŋ közı qyrauda qatty qinaldyq. Äitse de, tyǧyryqtan şyǧudyŋ amalyn tauyp, mektepterdıŋ sportzaldarynda daiyndyq jürgızdık. Daiyndyqqa joǧary synyp oquşylaryn, studentterdı jūmyldyrdyq. Äiteuır, bärı sätımen kelıp Qajymūqan Mūŋaitpasov atyndaǧy stadionda ülken merekelık maŋyzdy şarany ötkızdık. Baǧdarlamanyŋ bas ssenarisı Baqyt Qaiyrbekov boldy.
Kezınde Tyŋ igeruşıler saraiy atyn iemdengen «Kongress-holǧa» (qazırgı «Astana» kon­sert zaly – A.Q.) kürdelı jöndeu jūmystaryn jürgızıp, būl ǧimaratta 9-11 mausym künderı, şetelderde iaǧni Resei, İtaliia, Ukraina, Sankt-Peter­burg, AQŞ qazaqtyŋ daŋqyn as­qaq­tatyp jürgen önerpazdarynyŋ konsertın üş kün boiy ūiymdastyr­dyq. Ekınşı künı qazaqstandyq jeztaŋdai änşıler E.Serkebaev, Ä.Dınışev, R.Rymbaeva, Q.Baibosynov, N.Esqalieva, B.Tıleu­hannyŋ qatysuymen tamaşa konserttık keş öttı.
Sonymen qatar, Qajy­mūqan-Täuelsızdık köşelerınıŋ qiylysyndaǧy qazırgı «Otan-Ana» monumentı tūrǧan alaŋda ülken sahna qūrylyp, «Na-Na» ansamblı jäne elımızge tanymal otandyq änşıler konsert qoidy. Sol künı aua raiy būltty bolyp, jauyn se­belep tūrǧanyna qaramastan ha­lyq nöpırınde tolas bolǧan joq.
Aita keteiın, säuır aiynda tūsaukeserge Reseidegı ärtıs qazaq qandastarymyzdy şaqyraiyq dep Mäskeu qalasyna bardyq. Ol uaqytta ärbır ärtıske pälenbai myŋ dollar töleitındei qala biudjetınıŋ şamasy kelmeitın. Sodan Mäskeuden 22 ärtıstı alyp keldım. Olardyŋ arasynda Müsılım Magomaev, Sofiia Rotaru, Nadejda Babkina, Evgenii Matveev, Erık Qūrmanǧaliev, Tamara Siniavskaia t.b. osy siiaqty tanymal änşıler, belgılı kinoakterler de boldy. 10 mausym künı keşkı saǧat 9-00-den taŋǧy 05-00-ke deiın Abai eskertkışı tūrǧan alaŋda keremet konsert bolyp, ony Elbasy, Ukraina, Qyrǧyzstan prezidentterı tamaşalady.
Mädeniettı köteru maqsatynda şeruler de ūiymdastyryldy. Ūlttyq aspaptar, ürmelı aspaptar orkestrlerınıŋ süiemeldeuımen qaladaǧy sol kezdegı eŋ ülken köşe sanalatyn Res­publika daŋǧylynyŋ basynan bastap vokzalǧa deiın, sodan berı qarai demalys künderı taŋerteŋgı 10-nan bastap 11-12-ge deiın adamdar legı jürıp ötetın. Halyqtyŋ bärı sonda sondai jaqsy köŋıl-küide bolatyn. Demalys künderı «Jastar» saraiynyŋ aldynda üzdıksız konsertter, bi keşterı, demalys parkınde balalarǧa arnalyp oiyn-sauyq ūiymdastyrylatyn.

– Astana mädenietınıŋ bas­tap­qy qalyptasu kezeŋı köz aldyŋyzda öttı. Özıŋız sonyŋ basynda boldyŋyz. Sol kezde jūmys qalai jürgızıldı?
– Bızge eŋ bastysy, mamandar kerek boldy. Qalada bi ansamblın, jaqsy ūlttyq aspaptar orkestrın, estradalyq orkestrdı, ürmelı, simfoniialyq orkestrlerdı aşu qajet edı. Aqmola oblysy kezınde ūlttyq aspaptar orkestrı bolǧan. Bıraq qala astana märtebesın alǧan soŋ orkestrdı keŋeitıp, ūjymdy käsıbi deŋgeige köteretındei ärtısterdı şaqyru qajettılıgı tuyndady.
Ärine, är öner ūjymyna jeke ǧimarat qajet edı. Opera jäne balet teatryn aşu maqsaty qoiyldy. Ol būrynǧy Temırjolşylar saraiynan aşylatyn boldy. Qala äkımınıŋ orynbasary Farid Galimov būl ǧimaratta taŋǧy 7-de lezdeme ötkızetın. Jan-jaqta qūrylys, jöndeu jūmystary jürıp jatady. Kün qaqap tūrsa da, sahna qandai boluy kerek, qandai jaryq, qūral-jabdyqtar qajet, osy jaily aqyldasatynbyz. Mäskeu­den de mamandar şaqyrtyldy. Nätijesınde Küläş Baiseiıtova atyndaǧy Opera jäne balet teatry, «Naz» bi teatry, «Astana» estradalyq-simfoniialyq orkestrı aşyldy.

Bi mamandarǧa kelsek, Aqmoladan üş-aq adam taptyq. Ekeuı körkemönerpazdardyŋ arasynan tabyldy. Al bıreuı horeografiia­lyq uchilişenı bıtırgen eken. Osy üşeuınen ansambl qūrdyq. Ekı-üş aidan keiın özım Almatyǧa baryp, horeografiia uchilişesınen ekı top alyp keldım.
Kıtaphanalardyŋ deŋgeiın köterıp, kıtap qoryn qalyptastyru, baspagerlermen jūmys ıstep, jaŋadan şyǧyp jatqan kıtaptardy aldyrtu siiaqty jūmystar da josparǧa qoiyldy. «Jastar» saraiyndaǧy öner ūjymdarynyŋ käsıbilıgın köteru, şeberlıgın qalyptastyru jaǧy nazardan tys qalmady.

ŪLTTYQ MUZEI ÜZDIK ÜLGIMEN SALYNDY

– «Şabyt» şyǧarmaşyl jastardyŋ halyqaralyq fes­tivalı sız Mädeniet basqarmasyna jetekşılık etken tūsta bastalǧan joq pa? Būl baiqau­dyŋ tarihyn aityp berseŋız.
– Bızder 1998 jyly jastardy jaŋa Astanaǧa qalai aldyr­tamyz dep oilana bastadyq. Almatyda kezınde jastarǧa arnalǧan «Jıger» atty festival ötıp tūratyn. Sonyŋ jolymen sol jyldyŋ küzınde «Şabyt» festivalın ūiymdastyrdyq. Qorytyndysynda Tūrsynbek
Qabatov, Arman Jüdebaev, Äigerım Äbıldina siiaqty talai talanttardyŋ joly aşylyp, halyqqa tanyldy.
Däl osy uaqytta Astanada Aiman Mūsahodjaevanyŋ ūiym­das­tyruymen muzyka akademiiasy aşyldy. Būdan būryn qalada bır ǧana muzykalyq kolledj bolatyn. Sonyŋ ornyna Jeŋıs daŋǧylynda muzyka akademiiasy boi köterıp, mamandardy daiyndai bastady.

– Astanada qazaq teatryn salu mäselesı köpten köterıldı. Jaqynda qala äkımı Äset İsekeşev teatrdyŋ salynatyny turaly habarlady. Al osydan 20 jyl būryn ondai qajettılık bolǧan joq pa? Jalpy būl mäselege közqarasyŋyz qandai?
– Aşyǧyn aitqanda, qazaq teatryna Küläş Baiseiıtova atyndaǧy Opera jäne balet teatry ǧimaraty berılgende uaqytşa sonda köşe tūru kerek edı. Beibıtşılık jäne kelısım saraiy da ūsynyldy. Bıraq, teatr basşylyǧy jaŋa teatr salyp beredı dep eskı ǧimarattan köşpei otyrdy. Teatr tarihyna şirek ǧasyrdan asty. Mūnda 25 jasar bolyp kelgen ärtıster qazır 45 jastan asty. Olar ülken sahnada beinelerdı somdauy kerek. Bügıngı qala basşylyǧy būl mäselege ülken män berıp otyr. Astana qalasynda qazaq teatry salynyp, ol eŋ myqty teatrlardyŋ bırıne ainalatynyna senemın.

– Özıŋız Täuelsızdık saraiy, Ūlttyq muzei ǧimarattarynyŋ qūrylysynyŋ bastauynda tūrǧanyŋyzdy estıgenbız. Astananyŋ körkıne körık qosyp tūrǧan būl nysandar qalai salynǧanyn aityp berseŋız.
– 1998 jyldyŋ 10 qaŋtarynan 2000 jyldyŋ 16 aqpanyna deiın Astananyŋ Mädeniet basqarmasynyŋ basşysy, odan keiın Temırbek Jürgenov atyndaǧy Öner akademiiasynyŋ rektory boldym. Toǧyz jyldan keiın elordaǧa oraldym. Ol uaqytta Täuelsızdık saraiynyŋ ırgetasy qūiylyp jatyr eken. Menı osy mädeni oşaqqa direktor etıp taǧaiyndady. Maŋaiynda eşqandai ǧimarat joq, midai dala eken. Sony körıp, «qaida keldım?» dep oiladym. Bır jyldyŋ ışınde salynǧan Täuelsızdık saraiy qazır halyqaralyq, respublikalyq deŋgeidegı ülken şaralar ötetın ǧimaratqa ainaldy. Saraida alǧaşqy şara bolyp Şanhai yntymaqtastyq ūiymynyŋ sammitı öttı. Odan keiın 2010 jyly Europalyq qauıpsızdık jäne yntymaqtastyq ūiymynyŋ sammitı ūiymdastyryldy. Täuelsızdık saraiynyŋ qūrylysyn Elbasynyŋ özı qadaǧalap, atyn qoidy. Batasyn berıp, tūsauyn kestı. Sol jerde üş jarym jyl jūmys ıstedım.
Odan keiın menı Ūlttyq muzeige auystyrdy. Onyŋ ırgetasy salynyp, qabyrǧalary qūiylǧan eken. Işın ǧana muzeige laiyq­tap ısteu qajet edı. Ärine, är za­ly­nyŋ män-maǧynasy aşyluy da eskerıldı.
Japoniiaǧa, Amerikaǧa, Oŋ­tüstık Koreiaǧa, Singapurge jıberdı. Men muzei salasyn bıletın 4-5 jıgıttı ertıp alyp, bır jarym ai boiy şetelderdı aralap, 67 muzeidı qaradym. Solardyŋ bärın beinetaspaǧa tüsırıp aldyq. Olardyŋ zaldaryn, qor ji­naluyn, ärbır jädıgerdıŋ orna­lasuyn, temperaturasyn, ornalasu qabatyna deiın zerttedık. Aqyry Oŋtüstık Koreia mamandarymen aqyldasyp, solarǧa jobany syzdyrttyq. Ūlttyq muzei üzdık ülgımen salyndy. Ǧimarattyŋ edenı, qa­byr­ǧasy, terezesınıŋ materialyna deiın män berıldı.

– Astana Arqaǧa köşken soŋ qala bıraz qazaqylanyp qaldy. Mäselen, köşenıŋ aty auystyrylǧanda tūlǧany tanyta tüsu üşın köşe merekesı ūiymdas­tyrylatyn. Būl üderıstıŋ közı­ŋızdıŋ aldynda ötkenı sözsız. Sonyŋ kuägerı retınde ne aitasyz?
– Eŋ basynda Elbasynyŋ ideia­symen är oblystyŋ künderın ötkızetın boldyq. Alǧaşqy bolyp 1998 jyldyŋ säuır-mamyr ailarynda Qyzylorda oblysy­nyŋ künderı öttı. Ol uaqytta oblys äkımı Berdıbek Saparbaev.
Būl kısı Syr elınde ne bar, so­nyŋ bärın alyp keldı. Qazırgı «Jas­tar» teatry, ol uaqyttaǧy Temırjolşylar sarai aldynda kiız üiler tıgılıp, järmeŋke ötkızıldı. Oblystyŋ küşımen köşeler merekesı de ūiymdastyrylǧany bar. Jalpy köşelerdıŋ toiyna är oblys atsalysty.
Är etnostyŋ öner ūjymdary konsertke belsendı qatysatyn. Bärımız bır jūdyryq bolyp jūmyla, jūmys ıstedık. Sodan da bolar köşenıŋ atauyn auystyru mäselesı qozǧalǧan kezde eşkım qarsylyq bıldırmeitın.

ESKI ATAULARDY HALYQTYŊ SANASYNAN
ARYLTU KEREK

– «Astanadaǧy köşelerdıŋ 90-92 paiyzy – taza ūlttyq ataular» degen statistika bar. Degenmen, qala ösıp jatyr. Köşe ataularyna qatysty älı de olqylyqtar joq emes. Mä­selen, osydan bırneşe jyl būryn gazetımız Oktiabrdıŋ 70 jyldyǧy köşesı mäselesın kötergen edı. Sol köşe atauy älı özgermedı…
– Qalanyŋ bas josparyna säikes Oktiabrdıŋ 70 jyldyǧy köşesı elordada bolmaidy. Jalpy bızde osy köşenı Alaş ardaqtylarynyŋ bırınıŋ atyna auystyru oiymyzda bolǧan. Alaida «Astana Bas jospary» mekemesınıŋ basşysy Särsenbek Jünısovpen aqyldastyq. Ol kısı: «Erteŋ būl köşe joiylady. Özı de künnen künge qysqaryp barady. Ornynda basqa ǧimarattar boi köteredı. Sodan köşenıŋ aty da joiylady. Tiıspei-aq qoiyŋyzdar» dedı.
Qazır qalada sifrmen belgılengen köşeler de köp. Onyŋ sebebı, qala ösıp jatyr. Qazır mäselen, atau berılgen 950 köşe bar. Al 200-300 köşe sifrmen belgılengen. Būl mäselenı saiasilandyrmau kerek. Onyŋ bärı bırte-bırte retteledı. Osyǧan qatysty jaŋa josparlarymyz, jaŋa jobalarymyz bar. Jaqynda Elbasy da köşelerge qatysty mındetterdı jüktep kettı. «Aqyldasyp pışken ton kelte bolmaidy» degendei, bärın aqyldasyp şeşuımız qajet.

– Astanaǧa bügınde būl ömırde joq talai tūlǧa eŋbek sı­ŋırdı. Solardyŋ attaryn el ja­dyn­­da mäŋgı qaldyru maqsa­tyn­­da belgılı bır jūmystar ja­­sa­lyp jatyr. Bıraq, baiau. Mä­se­len, bırneşe jyl būryn №54 mektep-liseige Aqseleu Seidım­bektıŋ atyn beru turaly qalalyq onomastikalyq komis­siianyŋ şeşımı şyq­ty. Qalalyq mäslihat ta ony qoldaǧan. Osy siiaqty taǧy bır­neşe ūsynys qoldau tapty. Alaida būl şeşımder nege oryn­dalmai keledı?
– Qazır jiyrmaǧa juyq Alaş qairatkerınıŋ, dünieden ozǧan körnektı aqyn-jazuşylar, mem­leket jäne qoǧam qairatkerlerınıŋ attary berıletın mektepterge qatysty ūsynystar onomastikalyq komissiiadan ötken. Endı tiıstı jūmys jürıp jatyr. Aita ketetın närse, būl bır kündık jūmys emes. Mektepterge tūlǧalardyŋ aty berıledı.
Köşege atau beru nemese atauyn özgertu bızge oŋai timeidı. Onyŋ aldynda halyq arasynda tüsındıru jūmystaryn jürgızemız. Qoǧamdyq keŋes müşelerı men qalalyq mäslihat deputattarynyŋ aldyna baramyz.

– Keibır tūlǧalarymyzǧa köşe berılgenmen, ūzyndyǧy nemese ornalasqan jerı ülken atyna laiyq kelmeitın köşeler bar. Mäselen, jaqynda ga­zetımız «Promyşlennyi» tūr­ǧyn alabynda ornalasqan Mūs­tafa Şoqai köşesınıŋ mäse­lesın köterdı. Būl jaǧyn da retteu kerek dep oilaimyz.
– Būl jaǧy da bırte-bırte ret­teledı. Mysaly, būryn oŋ jaǧa­lauda Alaş kösemı Älihan Bökeihannyŋ kışkentai ǧana köşesı boldy. Akademikter, jazuşylar, ǧalymdar, jalpy ziialy qauym Älihanǧa ülken köşe beru kerek dep jazdy. Nätijesınde sol jaǧalauda atyna ülken köşe berıldı.

– Qalada «Promyşlennyi», «Silikatnyi», «Kirpichnyi», taǧy osy siiaqty eskırgen ataular özgermei kele jatqanyn da jazǧanymyz bar. Öz basym būl ülken olqylyq dep esepteimın.
– Negızı mūndai ataular da qalanyŋ bas josparynda joq. Būlardyŋ barlyǧy būryndary Aqmola oblysynyŋ şetkerı aimaǧynda ornalasqan eldı mekender ǧoi. Astana elorda märtebesıne ie bolyp şekarasy ūlǧaiǧan soŋ olar qalaǧa qosylyp kettı. Qazır halyq ta qalyptasyp qalǧan eskı ädetpen älı de solai atap jür. Jalpy Astanada tört audan bar. Būl audandar kentterge bölınbeidı. Tek qana köşelerge, oramdarǧa ataular berılgen. Eskı ataulardy halyqtyŋ sanasynan aryltu kerek. Mäsele sonda bolyp otyr.
– Käsıpkerlık nysandar atau­laryn kım retteidı? Mäselen, qala äkımdıgınıŋ tübınde bır meiramhana bar. Būryn ol «Evropa Palas» bolyp atalǧan. Keiın «Aqsūŋqar» bolyp özgertılgen. Būl – tamaşa atau ǧoi. Endı qarasaq, qaitadan «Evropa Palas» bolypty…
– Bız käsıpkerlık nysandardyŋ ataularyn özgerte almaimyz. Būl jūmyspen ädılet organdary ainalasady. Ataudy da solar bekıtedı. Jalpy, dünie jüzınde brend ataular bolady. Keibıreuler ataularyna osy brendtı alady. Sosyn qalai özgertsın? Eger Ädılet departamentınen atauǧa qatysty kuälıkterı joq bolsa, bız käsıpkerlermen äŋgımelesemız. Qany barlar ataularyn jöndep jatady.

– «Astanada qazaq köbeigenmen, qala qazaqşa söilemei otyr» degen pıkır jiı aitylady. Elordadaǧy tıldık jaǧdaidy qalai baǧalaisyz?
– Adamnyŋ sana-sezımı biıkke köterılmei, kez kelgen mäsele şeşılmeidı dep oilaimyn. Būl tılge de qatysty. Ärbır adam özınıŋ kım ekenın bıluı kerek. Qazaq bolǧannan keiın, onyŋ memleketı bar, tılı bar. Sondyqtan öz ana tılın bıluı mındettı. Ärı qarai qosymşa qanşa tıl bılgısı keledı, özıne bailanysty. Menıŋşe, «tärbie otbasynan bastalady» demekşı, ärbır adam özınıŋ şaŋyraǧynda, janūiasynda ana tılınde söileuı kerek. Ol – öte maŋyzdy tärbie qūraly. Osy oraidaǧy endı bır özektı mäsele – kögıldır ekrannan körsetıletın möltek jäne körkem filmderdı, baǧdarlamalardy, ǧalamtor jelılerın tolyqtai qazaqşalau kerek.

– Astananyŋ mädenietıne qazırgı kezeŋ biıgınen qaraǧanda, nenı baiqaisyz?
– Jiyrma jyl būryn qala halqynyŋ sany 250 myŋ bolsa, qazır bır millionnan asty. Būryn özge ūlttar sany basym bolsa, bügınderı özımızdıŋ qara közderımızdıŋ ülesı 85 paiyzǧa jettı. Būl – köŋıl süisınterlık jäit. Qazır Astana mädeniettıŋ ortalyǧyna ainaldy. «Astana Opera» teatry, Astana qalasy Memlekettık akademiialyq filarmoniiasy, teatrlar, zamanaui kıtaphanalar sözımızge dälel. Osynyŋ bärı oŋailyqpen bola salǧan joq, Elbasynyŋ, halyqtyŋ ülken eŋbegınıŋ, tynymsyz jūmysynyŋ arqasynda jüzege asty.

– Özıŋız kompozitorsyz. «Astana jyry» atty änıŋızdı sättı şyqqan tuyndy dep baǧalaimyn. Astananyŋ 20 jyldyǧyna tartuyŋyz joq pa?
– Än emes, simfoniia jazdym. Täuelsızdıkke, Astanaǧa arnalǧan. «Şattyq elı» dep atalady. Tuyndyny simfoniialyq orkestr oryndaidy.

Äŋgımelesken
Amanǧali QALJANOV