Qazaq ūǧymynda nauryz aiy qūt-berekenıŋ, jaqsylyqtyŋ aiy sanalady. Halqymyz būl aida amal merekesın toilap, äz-Nauryzdy qarsy alyp, jaqsy tılekter tıleidı. Ata-babamyzdan jalǧasqan osy bır dästür täuelsız Qazaqstanda da öz jalǧasyn tauyp, amal, nauryz meiramdaryn elımızdegı basqa etnos ökılderı de toilap keledı.
Jaqynda Astana qalasynyŋ Tılderdı damytu jäne arhiv ısı basqarmasy «Ruhaniiat» KMM ūiymdastyruymen «Yrys aldy – yntymaq» atty ıs-şara öttı. Otbasylyq tärbienıŋ üzdık ülgılerın därıpteu, etnos ökılderınıŋ memlekettık tıldı qūrmettep, qazaq halqynyŋ salt-dästürı men ädet-ǧūryptaryn köŋılge toqyp, jürekpen tüisınıp, kündelıktı tūrmysta qoldanuǧa, otbasyndaǧy ūl-qyzdaryna osy tälım-tärbienı sıŋırıp, otbasy qūndylyqtaryn saqtai otyryp, memlekettık tıldıŋ qadır-qasietın ūǧynuǧa nasihattau maqsatynda ötkızılgen būl şaraǧa bas qaladaǧy armian, orys, kürd ūlttarynyŋ ökılderı qatysty.
Is-şara barysynda özge ūlt ökılderı nauryz köje daiyndap, körısu dästürın atap ötumen qatar, qazaq salty boiynşa balanyŋ tūsauyn kesıp, şaşu şaşyp, bata berdı.
Kürd ūltynda tūsaukeser salty joq. Bıraq ūzaq uaqyt qazaq halqymen bırge jasap kele jatqan etnos ökılderıne qazaqtyŋ būl dästürı jat emes. Sondyqtan da amal merekesı künı Ailazovtar äuletındegıler Salimnıŋ ūly Saladinnıŋ tūsauyn aqyn, jazuşy filologiia ǧylymdarynyŋ kandidaty Serıkzat Düisenǧazyǧa kestırıp, atasy Sulhadin Ailazov aq dastarqanǧa qazaq salty boiynşa bata berdı. «Qazaqstan syndy ūly şaŋyraq astynda berekelı tūrmys keşıp jatqan barlyq ūlt ökılderı memlekettık tıldı bılıp, memleket qūruşy tūlǧalyq ūlt – qazaq halqymen bıte qainasyp, onyŋ salt-dästürıne qūrmet etse, elımızdegı barlyq ūlttyŋ berekesı bekemdele tüser edı. Bügıngı mynau kürd aǧaiyndar siiaqty qazaq dästürın bılıp, ony qūrmettep jatsa, ol da berekenıŋ belgısı bolmaq» dedı S.Düisenǧazy.
Soŋynan armian, orys ūltynyŋ ökılderı de memlekettık tılde än şyrqap, öleŋ oqyp, qazaqtyŋ biın bilep, mereke ajaryn kırgızdı.
