Bügın Astanada «EKSPO-2017» halyqaralyq mamandandyrylǧan körme aiasynda Qostanai oblysynyŋ mädeni künderı bastalady. Tobyl-Torǧai öŋırınıŋ mädenietı 9 tamyzǧa deiın elorda törınde saltanat qūrady. Būl künderı suretşıler, müsınşıler, qolöner şeberlerı, änşı, ärtıster, önerpazdar, sportşylar öner körsetedı.
Öŋırdıŋ mädeni baǧdarlamasyna tolyǧyraq toqtalsaq, 5 tamyzda keşke «EKSPO» qalaşyǧyndaǧy amfiteatrynda oblys künderınıŋ aşylu saltanaty jäne öŋırdıŋ üzdık şyǧarmaşylyq ūjymdarynyŋ gala-konsertı ötedı.
6 tamyzda tusten keiın «Etnoauyl» ūlttyq-mädeni keşenınde «Şyrqar änım tuǧan ölkem – Qostanai!» konsertınde halyq änderın oryndauşylardyŋ jäne E. Ömırzaqov atyndaǧy oblystyq filarmoniiasy şyǧarmaşylyq ūjymdarynyŋ önerın, al «Qolönerşıler» sektorynda 20 qolöner şeberınıŋ «Tuǧan jer qūşaǧynda» ekspozisiialyq körmesın tamaşalauǧa bolady.
Osy künı saǧat 18.00-de Q. Quanyşbaev atyndaǧy memlekettık akademiialyq qazaq muzykalyq drama teatrynda I. Omarov atyndaǧy oblystyq qazaq drama teatrynyŋ Ybyrai Altynsaringe arnalǧan «Dala şamşyraǧy» spektaklı qoiylady.
7 tamyzda saǧat 19.00-de M.Gorkii atyndaǧy memlekettık akademiialyq orys drama teatrynda ūlt ūstazy Ahmet Baitūrsynūly men onyŋ zaiyby Bädrisafaǧa arnalǧan «Aq kelınnıŋ mahabbaty men ölımı» qoiylymyn tamaşalai alasyzdar.
Qalanyŋ ortalyq alaŋynda «Slavianskaia pesnia» orys halyq aspaptar orkestrı men ansamblınıŋ «Muzyka – duşa naroda» baǧdarlamasy ūiymdastyrylady.
Al 8 tamyzda osy jerde «Kostanaiskie zori» bi ansamblınıŋ «Siqyrly bi älemı» horeografiialyq şouy bolady.
5 jäne 6 tamyz künderı «Qazanat» atşabarynda sporttyŋ ūlttyq türlerı boiynşa jarystar ötedı: Qyz quu, Audaryspaq, Jamby atu, Toǧyzqūmalaq, Qazaq küresı, Alaman bäige, Qūnan bäige syndy ūlttyq oiyndardy tamaşalaisyzdar.
Al bügın jäne erteŋ «Qazaqstan» sport keşenı maŋaiynda ūiymdastyrylatyn Qostanai oblysynyŋ auyl şaruaşylyǧy önımderın öndıruşılerınıŋ järmeŋkesınde aimaqtyŋ 14 audany men qalalarynyŋ önımderı ūsynylady.
Amanǧali QALJANOV
