Keşe Almatydaǧy bır tanys aqsaqal habarlasyp «töŋıregımızdegı jūrttyŋ bärı «Qazaqstannyŋ qūrmettı azamaty», «Qazaqstannyŋ qaharmany», «Jaŋa Qazaqstannyŋ parasatty tūlǧasy» deisıŋ be, ärtürlı ataq alyp, keudesıne medal taǧyp jatyr. «Tüie mıngen Qūdaiǧa bır taban jaqyn» deidı, elordada jürsıŋ ǧoi, sol medaldan maǧan da bıreu alyp berseŋşı, toiǧa barǧan şaldardyŋ janynda ūialmai otyraiyn» degen ötınış bıldırdı.
Soŋǧy kezderı auyldaǧy aŋqau aǧaiynǧa medal satyp aqşa tabatyn qular köbeidı. Būryn qyzmet ıstegen zeinetkerlerdı, jūrtqa bet-bedelı bar aq saqal, qara saqaldary, odan qalsa arzan ataqqa jany qūştar jastardy jaǧalaityn olar ärtürlı qoǧamdyq bırlestık atynan at ürketın türlı ataq pen medal taratyp, aqşa jasap jür. Al ötırık ataqqa esı auǧan aǧaiyn ol ataq pen medaldy qandai ūiym berıp jatqanymen şaruasy joq, keudesıne jyltyraǧan temır taqqanyna mäz bolyp, aldy sol kök tiyn qūny joq marapatty «juyp», toi jasauǧa deiın barady. Şyn marapatqa laiyq, äbden ırıkteuden ötken adamdarǧa marapat qūzyrly organdardyŋ būiryq-qaulysymen, tıptı Memleket basşysynyŋ Jarlyǧymen berılmei me, joq, älde medal satudy käsıp etkender oŋai qarjyǧa kenelıp jüre bere me?! Qazır auylda da, qalada da keudesıne medal taqqandar jäne sony taqqysy keletınder barǧan saiyn köbeiıp keledı.
Ärine, elımızdıŋ zaŋdarynda qoǧamdyq ūiymdar atynan türlı marapat beruge tyiym joq. Bıraq «Qazaqstannyŋ qūrmettı azamaty», «Qazaqstanyŋ qaharmany», «Qazaqstanǧa eŋbegı sıŋgenı üşın» jäne är salanyŋ üzdıgı ataǧyn kım körıngen berıp, ittıŋ ūly baiqotanǧa medal taǧa berse, Aqordanyŋ arnauly būiryǧymen berıletın joǧarydaǧy şyn ataqtardyŋ ne qadır-qasietı qalady?! Qoǧamdyq ūiymdar «Qazaqstannyŋ qūrmettı azamatyn», «Qaharmanyn» qalai, nenı ölşem etıp anyqtaidy?
Marapat pen medaldy kım körıngen, kez kelgen ūiym bere berse, şynaiy marapatqa köleŋkesın tüsırıp, bedelın tömendetedı. Sondyqtan memleket būl mäselege nazar audarǧany dūrys. Bır auyz sözben aitqanda, «Qazaqstannyŋ Eŋbek Erı», «Qazaqstannyŋ qaharmany», «Qazaqstannyŋ qūrmettı azamatty» ataqtaryn satuǧa, qoǧamdyq ūiymdardyŋ beruıne zaŋmen şekteu qoimasa, erteŋ şyn marapatty taǧudan da ūialatyn küige tüsemız.
