Elordada Erkeǧali Rahmadiev atyndaǧy Memlekettık akademiialyq filarmoniiasynyŋ konsert zalynda respublikalyq bauqaulardyŋ laureaty Tolqyn Nūrtasqyzy «Altyn besık – tuǧan jer» atty şyǧarmaşylyq keşın ötkızdı. Konsertte «Qorqyt» etno ansamblı, «Naz» bi teatry, «ALEM» zamanaui bi baletı, estradalyq vokal, halyq än bölımderınıŋ änşılerı öner körsettı. Konsert anşlagpen öttı, zalda ine şanşar oryn bolmady. Halyq estı ändı saǧynǧan eken.
Qazaq önerı aspanynda ūlttyq aspaptarymen taŋǧajaiyp muzykasymen tanylyp jürgen «Qorqyt» etno ansamblı jeke oryndauda, belgılı änşılermen bırge halqymyzdyŋ jyr-jauharyn ūsyndy. Ginnestıŋ rekordtar kıtabyna engen «Qorqyt» etno ansamblınıŋ körkemdık jetekşısı – Mädeniet qairatkerı, Bılım salasynyŋ qūrmettı qyzmetkerı Şolpan Qorǧanbek.
Tolqyn Nūrtasqyzy – Kökşe öŋırı, Ualihan audany, Saryadyr auylynda düniege keldı. 1995 jyly mektep bıtırgen soŋ L.N.Gumilev atyndaǧy Euraziia ūlttyq universitetınıŋ mädeniet jäne öner fakultetınde oqyǧan. Än jazudy universitet qabyrǧasynda oqyp jürgende bastady. Sodan berı öner jolynda bıraz jetıstıkterge jettı. Qazaqtyŋ belgılı aqyndary F.Oŋǧarsynova, S.Tūrǧynbekūly, M.Aitqoja, N.Orazalin, M.Bektemırova, S.Rahymbek, Q.Jünısov, E.Tılepberdımen tyǧyz şyǧarmaşylyq bailanysta köptegen änder jazdy. Būl künde Tolqynnyŋ köptegen änderı halyq jüregınen jol tauyp, ystyq yqylasyna bölendı. Eŋbek jolynda jas önerpazdardy önerge baulyp, körkemdık jetekşı, Qazaq radiosynda muzykalyq aǧa redaktor boldy.
Keşte Tolqyn Nūrtasqyzynyŋ töl tumalary oryndalyp, änderı şyrqaldy. İnterpritasiialarynan tūratyn konsertte kompozitordyŋ «Baldauren», «Äje äldiı», «Altyn besık – tuǧan jer», «Nostalgiia», «Ömır nūry», «Saryadyr», «Atamekenım Qazaqstan» änderı oryndaldy. QR eŋbek sıŋırgen qairatkerlerı Klara Tölentaeva, Medet Salyqov, Gülmira Sarina, Baǧdat Sämedinova, halyqaralyq baiqaulardyŋ laureattary Perizat Tūrarova, Daniiar Saǧyntai, Aijan Kerımqūlova, Şaharizat Seidahmet, Ǧaliia Esqūlova, Asylhan Şalqarov, Zinat Qasymova, Alua Qalymbekova, Nūrjan Meiırhan, Jandos İmanbai, Özgerıs Şerıkbai, Parasat Otan, Mūratbek Hairolda, Diana Mai, Aidyn Jūmabai öner körsettı.
Änşı, Qazaqstan Respublikasyna eŋbek sıŋırgen qairatkerı Svetlana Aitbaevanyŋ oryndauynda alǧaş oryndalǧan än Mūqaǧali Maqataevtyŋ sözıne jazylǧan «Pai-pai, ömır!» änı jürekterge jetse, änşı Aijan Kerımqūlovanyŋ oryndauyndaǧy «Otan» änı, Aidyn Jūmabaidyŋ oryndauyndaǧy sözın Smaǧūl Rahymbekov jazǧan «Şaǧala arman» änın körermender zor yqylaspen qabyldady. Halyqaralyq baiqaulardyŋ jeŋımpazy Arailym Boiarina oryndaǧan «Qazaqstan» änımen konserttık keş qorytyndylandy. Zaldaǧy körermen oryndarynan tık köterılıp, du qol şapalaqtap, keş avtoryna airyqşa qūrmet körsettı. Qazaq än önerındegı näzık bolmysty, keŋ jürektı Tolqyn Nūrtasqyzynyŋ özı dombyranyŋ süiemeldeuımen oryndaǧan änderı Otanǧa, tuǧan jerge, anaǧa, äkege degen mahabbattan tuǧan keremet öner tuyndylary edı. Zalda otyrǧan anasyna da qūrmet körsetılıp, «Yqylas gülı» tartyldy. Aiazdy künı Astanada bolǧan konserttık keş, jüregımızge jylylyq ūialatyp, sanamyzdy serpılttı.
