Qazaqtyŋ tūŋǧyş ǧaryşkerı, Keŋes Odaǧynyŋ Batyry, Halyq qaharmany Toqtar Äubäkırov «Egemen Qazaqstan» gazetı redaksiiasynda qonaqta bolyp, jurnalisterman jüzdestı.
Kezdesu barysynda tūŋǧyş ǧaryşker turaly «Er Toqtar» dep atalatyn jaŋa kıtaptyŋ avtory belgılı qalamger Talǧat Süiınbai äŋgımelep berdı. Esse, syr-sūhbat, qūjat-qorjyn atty üş bölımnen tūratyn kıtap Respublika künıne orai baspadan şyqqaly tūr. Emen-jarqyn küide ötken kezdesu barysynda memleket jäne qoǧam qairatkerı Oralbai Äbdıkärımov, «Qazaq gazetterı» mediaserıktestıgınıŋ basşysy Dihan Qamzabekūly batyr turaly oilaryn aityp, kıtap avtoryna rizaşylyqtaryn bıldırdı.
«Būl kıtapty baspaǧa jıbermes būryn qarap, oqyp şyqtym. Basynan aiaǧyna deiın bolǧan oqiǧalardy tızbektep jazyp, baiandap şyqqan. Avtor tarihi datalardy da qamtyǧan. Barlyǧy da – ömırde bolǧan jaittar. Menıŋ oiymşa, būl men üşın emes, egemen elımnıŋ tūrǧyndaryna qajet kıtap bolady dep oilaimyn, – dedı Toqtar Äubäkırov.
Qazaqtyŋ tūŋǧyş ǧaryşkerıne jurnalister san aluan sūraq qoidy. Halyq qaharmany ärbır sūraqqa asyqpai, tūşymdy jauap berdı.
1991 jyldyŋ 2 qazany – qazaq balasynyŋ ǧaryşqa ūşqan künı. Däl osy Toqtar Äubäkırov «Soiuz TM» ǧaryş kemesımen «Mir» orbitalyq keşenıne kosmonavt-zertteuşısı retınde ūşty. «Soiuz TM» ekipajynda odan bölek, sovet ǧaryşkerı Aleksandr Volkov pen avstriialyq kosmonavt Frans Fibek boldy. Ǧaryşkerler «Mir» keşenınde bır aptadan astam uaqyt jūmys ıstedı. 10 qazanda ekipaj jerge oraldy.
