Bıraz adamdar, onyŋ ışınde äsırese jastar «Qarttyq şaqta qalai kün köremın, zeinetke şyqqanda alatyn aqşam jetkılıktı bola ma?» degen mäselege män bermei jatady. Al özım jūmys barystaryn qadaǧalap qaitqan «BJZQ» AQ Nūr-Sūltan qalasyndaǧy filialynyŋ qyzmetkerlerı bolsa, būl jäitqa qazırden bastap jauapkerşılıkpen qarap, zeinetaqy jarnalaryn tūraqty ärı barynşa qomaqty mölşerde audaruǧa keŋes beredı…
Bıryŋǧai jinaqtauşy zeinetaqy qorynyŋ Nūr-Sūltan qalasyndaǧy filialynyŋ operasiialyq zaldary Bigeldinov köşesı, 12 jäne Respublika daŋǧyly, 4 mekenjailary boiynşa ornalasqan. Kıre berısten keluşılerdı qarsy alyp, elektrondy kezektı retteitın talon ūstatady. Tabloda kezek nömırı janǧan sätte Qor qyzmetkerı otyrǧan üsteldıŋ janyna barasyz. Ol jeke elektrondyq sifrlyq qoltaŋba nemese jeke kuälıgıŋızdı sūraidy. Sosyn mälımetter bazasyna jeke säikestendıru nömırıŋız (JSN) boiynşa sūrau jıberedı. Bırer sätte barlyq mälımetterıŋızdı qaǧazǧa basyp şyǧarady. Osylaişa zeinetaqy şotyŋyzǧa qanşa aqşa jinalǧanyn, tıptı bolaşaq zeinetaqyŋyzdyŋ mölşerın de eseptetıp ala alasyz.
Operasiialyq zalda özı-özıne qyzmet körsetu terminaly da bar. Onyŋ kömegımen erıktı zeinetaqy salymdary, zeinetaqy şotynyŋ bar/joǧy turaly anyqtama, şottaǧy qarajattyŋ jyljuy turaly aqparat, kelısım-şarttaǧy özgerıster turaly barlyq mälımetterdı jeke säikestendıru nömırıŋız (JSN), qūpiia söz, nemese elektrondyq sifrlyq qoltaŋbaŋyzdyŋ kömegımen basyp şyǧara alasyz.
– Halyqqa körsetıletın qyzmetterdıŋ barlyǧy elektrondyq formatqa auystyrylǧan, – deidı maǧan qyzmet körsetken maman. Bügınde Qordyŋ enpf.kz saity arqyly jeke derektemelerıŋızdı, şot turaly aqparat alu täsılın özgertuge, zeinetaqy şotyndaǧy aqşa ainalymy turaly aqparat aluǧa bolady.
Būdan bölek, mamandardyŋ aituynşa, zeinetaqy jarnalarynyŋ barlyq türlerı boiynşa şot aşu üşın Qorǧa barudyŋ qajetı joq. Alǧaşqy jarna tüsken sätten bastap, zeinetaqy şoty avtomatty türde aşylady. «E-notariat» pen Qordyŋ aqparattyq jüielerı de tyǧyz bailanystyrylǧan. Sonyŋ arqasynda notariustar men şeteldegı konsuldyq mekemeler olardyŋ qoldanysyndaǧy mūragerlık ıster boiynşa (mūragerlerdıŋ aryzdanuy boiynşa) qaitys bolǧan salymşylardyŋ Qordaǧy jeke zeinetaqy şoty men ondaǧy qarajaty turaly aqparatty aluǧa bolady. Būl mūragerlerdıŋ uaqytyn ünemdeidı jäne qaǧazbastylyqtan aryluǧa mümkındık beredı.
– Zeinetaqymen qamsyzdandyru mäselelerıne auqymdy özgerıster engızılgennen keiın, qazaqstandyqtarǧa öz zeinetaqy jinaqtaryn bırqatar qajettılıkterıne jaratuǧa mümkındık berıldı. Tūrǧyn üi jaǧdaiyn jaqsartu jäne emdeluden basqa salymşylar investor bolu üşın investisiialyq portfeldı basqaruşyny taŋdap, oǧan zeinetaqy jinaqtarynyŋ bır bölıgın audara alady. Mūndai mümkındık zeinetaqy salymdarynyŋ jüiede qalyp, investisiialyq tabys esebımen bolaşaqta qomaqty zeinetaqy aluǧa jol aşady, – deidı filialdyŋ baryp qyzmet körsetu bölımınıŋ bastyǧy Aq-Maral Saǧieva.
Ärine, būl bölım qyzmetkerlerınıŋ jūmysyn erekşe atap ötuge bolady. Olar qyzmetterın «Mobildı agent» jobasynyŋ aiasynda jüzege asyryp keledı. Öitkenı mümkındıgı şekteulı jandar Qor filialyna tıkelei özderı kele almaityn bolǧandyqtan mamandar olarǧa yŋǧaily uaqytta üi-jailaryna özderı baryp, barlyq qyzmet türlerın ūsynady.
Filial mamandary sondai-aq, türlı ūiymdarǧa, oqytu, emdeu ortalyqtaryna, äskeri uchilişe nemese jazany öteu oryndary siiaqty jabyq ülgıdegı mekemelerge baryp, Qazaqstanyŋ zeinetaqy jüiesı turaly maŋyzdy aqparatty jetkızıp otyrady. Olarǧa qajettı qyzmetterdı körsetedı. Aqparattyq-tüsındıru şaralary studentter arasynda da belsendı türde ötkızıledı. Olarǧa jinaqtauşy zeinetaqy jüiesı turaly mälımet berılıp, bolaşaq zeinetaqysyna qarajatty qazırden bastap qolǧa alu kerektıgı tüsındırıledı. Öitkenı, bügıngı jastardyŋ 1998 jyldyŋ 1 qaŋtaryna deiıngı 6 aidan kem emes eŋbek ötılderı joq. Sondyqtan olar tek özderı jinaqtaǧan qarajat pen memleketten berıletın bazalyq zeinetaqyǧa ǧana ümıt arta alady. Baryp qyzmet körsetu bölımınıŋ jūmys aiasyna Nūr-Sūltan qalasy ǧana emes, oǧan jaqyn ornalasqan Aqmola oblysynyŋ auyldyq jerlerı de kıredı. Osyǧan orai mamandar internet jelısı joq şalǧai auyldarǧa da barady. Sebebı, maqsat – halyqqa zeinetaqy jüiesı turaly barynşa tolyq ärı tüsınıktı aqparat beru.
Bız barǧan tūsta bölımnıŋ bas mamany Mūrat Qūrmanǧaliev qala şetınde ornalasqan «Qaraqat» bala baqşasynyŋ ūjymymen kezdesu üşın jolǧa qamdanyp jatty.
– Bız kez kelgen mekemenıŋ basşylyǧymen ūjymmen kezdesu turaly aldyn ala kelısıp alamyz. Osyndai basqosularda äielderdıŋ zeinetke şyǧu jasynyŋ bırtındep ūlǧaityluyna bailanysty bıraz sūraqtar qoiylady. Köbısı zeinetaqynyŋ qalai esepteletının bılgılerı keledı. Keide adamdar jaŋaşyldyqtardy qabyldauǧa daiyn bolmai, tüsınbeuşılıkter de tuyndap jatady. Mūndai sätte zeinetaqy jüiesınıŋ mamany ǧana emes, psiholog boluǧa da tura keledı. Bız zeinetaqynyŋ qalai esepteletını turaly barynşa saralap, tüsındırıp beruge tyrysamyz. Sondai-aq, «Mobildı agent» degen arnaiy jabdyqtalǧan qondyrǧymyz bar. Onyŋ qūramyna noutbuk, 4G fleşka men jyljymaly şaǧyn printer kıredı. Osy qūraldyŋ kömegımen salymşyǧa qajettı barlyq qyzmet türlerın körsetemız. Şynynda da «Mobildı agent bızdıŋ jūmysymyzdy edäuır jeŋıldettı. Men jinaqtauşy zeinetaqy jüiesı turaly ǧana äŋgımelep bermei, adamdardyŋ ūialy telefondaryna Qordyŋ mobildı qosymşasyn ornatyp beruge de kömektesemın. Sol arqyly azamattar özderınıŋ zeinetaqy jinaqtary turaly barlyq aqparatty ala alady, – deidı Marat Qūrmanǧaliev.
Jalpy Nūr-Sūltan qalasyndaǧy filialdyŋ baryp qyzmet körsetu bölımınıŋ mamandary biylǧy jyldyŋ bırınşı jartysynda türlı ūiymdarda 1371 tanystyrylym ötkızgen eken. Olarǧa otyz myŋǧa juyq adam qatysypty. Sonyŋ ışınde 527 kezdesu audan ortalyqtary men şalǧai auyldarda ūiymdastyrylyp, mamandardyŋ därısın tyŋdaǧan on myŋnan astam adam elımızdıŋ zeinetaqy jüiesındegı jaŋaşyldyqtardy estıp, rizaşylyqtaryn bıldırıptı.
Bız de öz tarapymyzdan tolassyz kelgen salymşylar aǧynyna mınsız qyzmet körsetken Qor mamandarynyŋ alǧyrlyǧy men bılgırlıgınıŋ kuäsı bolyp, filial ǧimaratynan alǧys sezımımen attandyq…
M. İSKAKOV
