Astana qalasy mäslihatynda tūrǧyn üi-kommunaldyq şaruaşylyq salasyndaǧy jobalardy ıske asyru turaly köpşılık tyŋdaular öttı. Sonyŋ ışınde eskı tūrǧyn üilerdı süru, jalǧa berıletın tūrǧyn üi, tūrǧyn üi-kommunaldyq infraqūrylymdy jaŋǧyrtu mäselelerı talqylandy.
Aldymen baiandama jasaǧan qalalyq Tūrǧyn üi jäne tūrǧyn üi inspeksiiasy basqarmasynyŋ basşysy Änuar Saipovtyŋ mälımetınşe, osy jyly 5993 päter beru josparlanǧan. Äleumettık kömek retınde nesielık baspana satyp aluǧa bastapqy jarna bolyp esepteletın ärqaisysy 1,5 mln teŋgenı qūraityn 277 tūrǧyn üi sertifikaty berıldı. Jūmys ısteitın jastarǧa satyp alu qūqyǧynsyz biyl 1000 päter beru josparlanyp otyr.
Al apatty eskı üilerden tūrǧyndardy köşıru jospary jyldarǧa bölıngen. Atalmyş baǧdarlama 2013 jyldan berı ıske asyrylyp jatyr. Sol uaqyttan berı osyndai üilerdıŋ 4,5 myŋnan asa tūrǧyny jaŋa üilerge köşırılgen. Jalpy būl baǧdarlama 2029 jylǧa deiın eseptelgen. Biyl 4 apatty üidıŋ tūrǧyndaryn köşıru josparlanǧan. Osy uaqytqa deiın 2 üidıŋ tūrǧyndary jaŋa baspanaǧa köşırıldı, qalǧan ekeuı jyl soŋyna deiın köşırıledı.
Elordada tūrǧyn üi qoryn jaŋǧyrtu jūmysy 2011 jyly bastalǧan. Biyl 26 köppäterlı tūrǧyn üidı kürdelı jöndeuden ötkızıp, 29 lift jabdyqtaryn auystyru josparlanǧan.
Taǧy bır baiandamaşy «Örken qala» JŞS direktory Ramazan Äsıp basqarma basşysynyŋ sözın tolyqtyra kettı. Būl mekeme tūrǧyn üi qoryn jaŋǧyrtumen ainalysady. Osy ūiym 2011 jyldan berı osy uaqytqa deiın 202 tūrǧyn üidı jöndep, 272 lifttıŋ jabdyqtaryn auystyrǧan.
Qalalyq mäslihat deputattary baspanaǧa qatysty tūrǧyndardan özderıne ötınışter tüsıp jatqanyn aita kele, osy saladaǧy problemalardy köterdı. Deputat Azamat Aithojin Qoşqarbaev daŋǧyly, 80/1 mekenjaiyndaǧy tūrǧyn üi päterlerın jekeşelendıru mäselesın qozǧady. Onyŋ aituynşa, üidıŋ tūrǧyndary üige ortaq tehnikalyq pasporttyŋ joqtyǧyn jetkızıp, jertölelerdıŋ zaŋsyz satylǧanyna qatysty bırneşe ret şaǧymdanǧan. Deputat jauapty mekemelerdıŋ basşylaryna tūrǧyndarmen jinalys ötkızıp, tuyndaǧan mäselelerdı talqylap, üilerıne qatysty problemalar qalai jäne qandai retpen şeşıletının tüsındırudı ūsyndy.
Onyŋ ärıptesı Vladislav Sergeev Tūrǧyn üi jäne tūrǧyn üi inspeksiiasy basqarmasy qasbetterdı jöndeu jūmysyn bastaǧanyn atap ötıp, üilerdıŋ qasbetterın jöndeu kezegın, minimaldy tarifter mäselesın aiqyndau üşın jūmys tobyn qūrudy ūsyndy. Sondai-aq tariftı qaita qarau mäselesı boiynşa Qoǧamdyq keŋes müşelerımen otyrys ötkızudı ūsynyp, osy mäsele boiynşa tolyq aqparat beru kerektıgıne toqtaldy.
Deputat Säule Samidin liftterdı auystyruǧa ötınım beru algoritmı boiynşa aqparat daiyndaudy ūsyndy. Onyŋ aituynşa, köptegen MİB töraǧalary ötınım beru tärtıbın bılmeidı. Sonymen qatar, kelısımşartta liftke qyzmet körsetu kepıldıkterın eskerudı sūrady.
Deputat Qanat Estek «Favorit» tūrǧyn üi keşenı maŋyndaǧy üilerdıŋ tūrǧyndarynan köptegen şaǧymdar tüsıp jatqanyn aita kele, soŋǧy jaŋbyrlar kezınde joǧary qabattardaǧy köp päterdı şatyrdan aqqan su basqanyn jetkızdı. Deputat atalmyş azamattardyŋ tūrǧylyqty jerınde jinalys ötkızıp, olardyŋ barlyq sūraqtaryna jauap berudı ūsyndy. Al Deputat Mädina Äjıkenova «Baǧystan» tūrǧyn üi keşenın paidalanuǧa beru merzımderı jäne bölıngen päterler sanyn sūrady. Deputat Kendebai Adambekov renovasiia jospary, ony ıske asyru qandai satyda tūrǧanyn sūrai kele, onyŋ 2029 jylǧa deiın oryndaluy jäne biudjetı jönınde sūraqtardy qoidy. Al deputat Bekzat Joljaqsynov «Örken qala» basşysyn otandyq öndıruşılerdı qoldauǧa şaqyrdy. Onyŋ aituynşa, qazırgı uaqytta Qytai liftterı satyp alynyp jatyr.
Qalalyq mäslihat töraǧasy Erlan Kanalimov tūrǧyn üi-kommunaldyq şaruaşylyq mäselelerı öte maŋyzdy ekenın atap öttı.
– Memlekettık organdar ülken jūmys jasady, bıraq qasbetterdı jöndeu boiynşa bırqatar ūsynys bar. Audandardyŋ äkımdıkterınde dekorativtı jaryqtandyru baǧdarlamasy äzırlendı. Osy baǧdarlamany qasbetterdı jöndeumen bırıktırudıŋ oryndylyǧyn qarastyrudy ūsynamyn. Ötken jyldan berı «Şaŋyraq» tūrǧyn üi keşenı boiynşa şaǧymdar köp tüsude. Ondaǧy liftter jūmys ıstemeidı, köptegen biudjettık päterler jalǧa berılgen, üidıŋ abattandyryluy da naşar jaǧdaida, – dedı Erlan Kanalimov.
Onyŋ aituynşa, qalada iesız qalǧan üiler, päterlerı az, şaǧyn otbasylyq üiler bar. Olarda MİB qūru mümkın emes. Mäslihat töraǧasy osy üiler boiynşa şeşım qabyldau qajettıgın, jauapty basqarma būl üilerdıŋ bolaşaǧy turaly ūsynystar engızuı tiıstıgın aitty.
– Jaqynda ıKomek 109 qyzmetı osy jyldyŋ 8 aiynda sumen jäne elektrmen jabdyqtau boiynşa kelıp tüsken ötınışterge taldau jasady. Būl mäseleler boiynşa köptegen şaǧym tüsken. Mäselen, bır üiden 400-470 şaǧym tüskenı belgılı boldy. Qys tüskenşe şaǧym tüsken üilerdıŋ daiyndyq pasporttaryn tekseru kerek, – dedı mäslihat töraǧasy.
Qalalyq MİB ortalyǧynyŋ basşysy Gülvira Äbetova Tūrǧyn üi jäne tūrǧyn üi inspeksiiasy basqarmasy men «Örken qala» JŞS-nıŋ tūrǧyn üidı jaŋǧyrtu baǧdarlamasyn ıske asyru barysyna köŋılı tolmaitynyn jetkızdı. Onyŋ pıkırınşe, tiıstı qūjattamany daiyndau räsımı tym ūzaq.
«Stepnoi-2» Tūrǧyn üi keşenı MİB töraǧasy Erlan Qarbaev kerısınşe, «Örken qala» JŞS jūmysy üşın alǧysyn jetkızdı. Degenmen, bırqatar kemşılıkter baryn da atap öttı. Sonyŋ ışınde tehnikalyq qabattardy PİK alyp, päterler retınde satyp jıbergen. Sondai-aq soŋǧy uaqytta «Uprav.dom» qosymşasy ūsynyluda. Alaida barlyǧy tegın eGov portalymen jūmys ısteuge daǧdylanǧan. «Astanaenergosbyt» qyzmetıne ülken narazylyqtar bar. Mekeme eŋ tömengı somamen bolsa da, jazda da jylytu aqysyn esepteidı. MİB töraǧasy pıkır almasu üşın barlyq audandardyŋ MİB töraǧalaryn jinap, otyrys ötkızudı sūrady. Otyrysty jürgızgen deputat Vladislav Sergeev barlyq müddelı organdar men ūiymdardyŋ kezdesuı üşın ortaq platforma qūrudy ūsyndy.
