Nūr-Sūltan qalasyndaǧy Kültegın tūiyq köşesınıŋ tūrǧyndary qalalyq äkımdıkten özderın qauıpsız jerge köşırudı sūrap dabyl qaǧuda. Öitkenı üi ırgesınen ötetın «AREK» AQ-qa tiesılı joǧary kerneulı tok jelısınıŋ kesırınen densaulyqtaryna aitarlyqtai ziian kelıp, sozylmaly auru türlerıne ūşyrauda.
Qar erıp, kün jylyǧanda, üidıŋ qabyrǧasyna qol tigızuge qorqamyz. Baiqausyzda tiıp ketse tok soǧady deidı tūrǧyndar. Būl maŋdaǧy üiderdıŋ köbı eskı bolǧandyqtan, ömır süruge öte qolaisyz. Osyǧan orai Nūr-Sūltan qalalyq qoǧamdyq keŋesınıŋ müşesı B.Smaiylov jauapty mekemelermen bırge tūrǧyndardyŋ tılegın tyŋdau üşın atalǧan mekenjaiǧa bardy. Mejelegen uaqytta jinalǧan tūrǧyndar jylarman küide şaǧymdaryn aityp jatty.
«Tok mūnarasyn qūru üşın ekı üi sürılgen. Keiın qauıpsız dälız üşın qos qaptalynan 20 metr aumaqtaǧy üiler sürıledı, äuelı tok mūnara baǧanyn qoiyp, jelını jürgızıp alaiyq degen jeleumen myna mūnarany ornatqan. Sodan dälız jasalmai, üiler de sürılmegen küiı 25 jyl öttı. 110 myŋ volttan keletın ziiandy barlyǧymyz bılemız. Syrqatymyz jinala-jinala sozylmaly aurǧa ūlasty. Balalardyŋ densaulyǧyna alaŋdaimyz. Bız joǧary kerneulı tok jelısın alyp tastasyn demeimız. Odan ümıt üzılgen. Osynda 25 jyldan berı tūryp jatqan bızderdı basqa jerge köşırıp, üilerımızdı sürudı sūraimyz. Mümkın JKT jelısın auystyruǧa qyruar aqşa ketetın şyǧar. Sondyqtan bızdı köşırgen arzan şyǧady dep oilaimyn» deidı №36 üidıŋ tūrǧyny Raihan İbraeva.
Sanitarlyq-epidemiologiialyq sala qyzmetkerlerı bırınşı qalalyq emhanaǧa sūrau salyp, Kültegın köşesı tūrǧyndarynyŋ densaulyǧyn körşıles köşedegılerdıŋ saulyǧymen salystyrudy sūraǧan. Emhananyŋ mälımetınşe, Syrdariia taǧy da basqa köşelerınıŋ tūrǧyndarymen salystyrǧanda kültegındıkterdıŋ 70 paiyzy sozylmaly auru türıne ūşyraǧan. Mūnda şamamen 240 tūrǧyn bolsa, sonyŋ 170-ınde kınärat bar degen söz.
Negızgı talap boiynşa joǧary kerneulı tok jelısınen 20 metr oŋǧa jäne solǧa qarai üi saluǧa bolmaidy. Al mūnda talap saqtalmaǧan. Eŋ alys degende 3 metr, jaqyny 1 metr jaqyndap tūr. Temır şatyry bar üilerde ünemı tok soǧu jaǧdailary bolyp tūrady. Mūndai jaǧdaidan mezı bolyp, äbden qajydyq. Tez arada mäselemızdı şeşudı sūraimyz degen ötınışterın qoǧamdyq keŋes müşesıne taǧy bır märte jetkızdı. Mūqiiat tyŋdaǧan B.Smaiylov keŋes müşesı retınde mäselenı tūraqty baqylauyna alatynyn mälımdedı.
«Qūjattar tügelımen köterılıp, bekıtılgen talap boiynşa jelınıŋ ekı jaǧynan 20 metr jerdı süru mäselesın zerdeleudemız. Bügıngı taŋda 113 üidıŋ tızımı jasaqtalyp jatyr. Aulalarǧa jeke-jeke kırıp mülıktı baǧalau sekıldı jūmystar jürgızıletın bolady. Barlyǧyn rettep, qūjattardy jüielep, qalalyq äkımdık pen mäslihatqa ūsynamyz. Qauly qabyldanǧan soŋ ıske köşetın bolamyz» deidı Baiqoŋyr audany äkımdıgınıŋ ökılı T.Hasen.
Baijan EMBERDI
