Köppäterlı tūrǧyn üi qoryn tiımdı basqaru mäselesı qoǧamda qaşan da özektı. Osydan ekı jyl būryn qaladaǧy biık baspanalardyŋ basym bölıgı basqarudyŋ jaŋa türıne köşe bastaǧanda pısıp-jetılmegen reformaǧa kümänmen qarap, älıptıŋ artyn baqqandar da boldy. Solardyŋ bırı – elordadaǧy «Astana su servis» PİK-ı. Özderıne qarasty üilerdıŋ tazalyǧy men ūqyptylyǧyn basty ūstanym ete otyryp, jūmysty jüielı jalǧastyryp kele jatqan kooperativ müşelerınıŋ belsendı ıs-qimyly bügınde köpke ülgı.
2023 jyldyŋ 1 şıldesıne deiın elımızdegı barlyq PİK menşık ielerınıŋ bırlestıkterıne nemese jai serıktestıkterge ötuı kerek bolǧan edı. Alaida, reforma jüzege aspai, bügınde päter ielerınıŋ kooperativterı öz jūmystaryn būrynǧyşa jürgızude. Keibır tūrǧyn üi basşylary qūjattaryn qaita räsımdep, MİB-ke üdere köşe bastaǧanda, Ş.Qūdaiberdıūly men Abai köşelerındegı 8 üige qyzmet körsetetın «Astana su servis» PİK-ınıŋ tūrǧyndary basqarudyŋ jaŋa türıne ötuge asyqpady. Ädettegı qalyptan taimai, üirenşıktı jūmystaryn jalǧastyruda.
Bız kelgende tūrǧyn üi maŋynda jürgen jūmysşylardyŋ bırı aula tazalap, ekınşısı esık aldynda ösıp tūrǧan gülderdı suarumen ainalysyp jatyr eken. Aumaq tap-taza, aǧaştar da erekşe kütımde, jaiqalyp tūr. Bastapqyda osy PİK-te esepşı bolyp jūmys ıstegen Talşyn Ramazanqyzy soŋǧy üş jyldan berı tūrǧyndardyŋ ūsynysymen päter ielerı kooperativınıŋ töraiymy qyzmetıne kırıstı.
– Bızdıŋ PİK qazır 488 päterden tūratyn segız üige qyzmet körsetedı. 2020 jyly tūrǧyn üi-kommunaldyq şaruaşylyǧyn jaŋǧyrtu baǧdarlamasy boiynşa Abai köşesındegı 101-üide kıreberıstı jöndeu jürgızılıp, 2021 jyly şatyr jabyny jöndeldı. Ş.Qūdaiberdıūly köşesındegı №2, №2a üilerde nasostar auystyrylyp, 7 jylu almastyrǧyş juyldy. Sol jyly Ş.Qūdaiberdıūly köşesındegı №2/4 üide ystyq jäne suyq sudyŋ barlyq qūbyrlary auystyrylsa, şatyr jabynyn jöndeu jūmystary da ışınara jasaldy. Qazırgı taŋda sol köşedegı №2 üide jöndeu jūmystary jürgızılıp jatyr. Aumaqty kögaldandyru maqsatynda özımızge qarasty üilerdıŋ maŋyna 35 şyrşa, 10 qaiyŋ, 15 qara aǧaş otyrǧyzyldy. Jyl saiyn 400-ge juyq tüp gül egemız. Aldaǧy uaqytta audan äkımdıgınıŋ kömegımen balalar alaŋyn abattandyryp, futbol oinaityn alaŋqai salu josparlanyp otyr, – dedı Talşyn Ramazanqyzy.
Kooperativte öz ısın jetık bıletın mamandar jeterlık. Atap aitsaq, injener Qianbek Sadenov, elektrik Gazez Tapeev, santehnikter Mūrat Qapasov jäne İsliam Ahmetbaev, aula sypyruşy Berkimbai Qūsaiynov tūrǧyn üilerge kütım jasauda uaqytpen sanaspaidy. Qūbyrlardy aǧymdaǧy jöndeu, jaryqtandyru, şamdardy auystyru jäne basqa da şarualardy mınsız atqaryp keledı.
– PİK şyǧyndary päter ielerınıŋ jinalysynda bekıtıledı, sol sebeptı üi tūrǧyny ai saiynǧy maqsatty alym ne üşın alynatynyn jäne PİK qandai jūmystardy oryndaitynyn bılu üşın jinalysqa qatysuy tiıs. Qys boiy bızdıŋ mamandar qar şyǧaru, jürgınşı joldaryndaǧy qoqystardy joiumen, jaz şyǧa gülzarlardy tazalap, aramşöpterdı jūlumen ainalysady. Būl rette «senıŋ jūmysyŋ» nemese «menıŋ jūmysym» degen tüsınık joq. Basty ūranymyz – tazalyq pen ūqyptylyq. Qandai jūmysty bolsyn tūrǧyndarmen keŋesıp atqaruǧa tyrysamyz, – dedı Talşyn Ramazanqyzy.
Jalpy, PİK-te tuyndaǧan kürdelı mäsele joqtyŋ qasy. Būl, ärine jūmysty dūrys üilestırudıŋ nätijesı bolsa kerek. Qazır tūrǧyndar päterınde jaryqtyŋ sönbeuın, sudyŋ täulık boiy toqtausyz aǧyp tūruyn, üi maŋynyŋ qoqystan arylyp, ǧimarattyŋ qasbetı men ainalasynyŋ sanitarlyq normalarǧa säikes boluyn, aumaqtyŋ zaman talabyna sai kögaldandyryluyn, tıptı balalarynyŋ alysqa barmai-aq esık aldynda alaŋsyz oinaǧanyn qalaidy. Būl mäsele «Astana su servis» PİK-ınde būrynnan-aq şeşılıp qoiǧan. Elordalyqtardyŋ jaily ärı qauıpsız ortada ömır süruıne atalmyş PİK ökılderı qoldan kelgenşe jaǧdai jasap keledı.
Ärbır tūrǧyn özderı ömır sürıp jatqan ortaq mülıkke – tūrǧyn üige būl tek kommunaldyq qyzmetterdıŋ jūmysy dep qaramai, jan-jaqty qamqorlyq jasauy kerek.
