Qala äkımı Altai Kölgınov azamattardy kezektı ret onlain qabyldady. Osylaişa biyl bır jylda elorda äkımı ärıptesterımen bırge 5 myŋnan astam qala tūrǧynyn qabyldady.
«Qala öz tūrǧyndarynyŋ qatysuymen damyp keledı. Azamattardy qabyldauda, kezdesulerde, qalany aralau barysynda, äleumettık jelıler arqyly tūrǧyndardyŋ elordamyzdy damytuǧa qatysty ūsynystaryn qabyldaimyz. Sūraqtar äleumettık nysandar qūrylysyna da, jol infraqūrylymyna da, abattandyruǧa, tūrǧyn üi alaptaryn damytuǧa jäne t. b. qatysty. Biyl bırqatar mäsele şeşıldı. 10 myŋ äleumettık päter, 40 myŋ oquşy ornyna arnalǧan 15 mektep salyndy, «üi maŋyndaǧy därıger» nysandary aşyldy, oŋaltu ortalyqtary men aula klubtarynyŋ jelısı keŋeitıldı, 100-den astam köşe salynyp, jöndeldı, 9 eldı mekenge gaz taratu jelılerı jürgızıldı jäne t. b. Azamattardy qabyldau kezınde kelıp tüsken mäselelerdı eskere otyryp, kelesı jylǧa aldyn ala jospar daiyndalady» dedı qala äkımı.
Memleket basşysynyŋ «Halyq ünıne qūlaq asatyn memleket» tūjyrymdamasy aiasynda özara bailanysty nyǧaituǧa äleumettık ortalyqtar da kömektesedı. Olardyŋ qatarynda «Janūia» otbasy institutyn qoldau ortalyǧy, tūrǧyn üi salasynda qyzmet körsetetın bıryŋǧai ortalyq, iQala ortalyǧy, jastarǧa qyzmet körsetu ortalyǧy bar. Biyldyŋ özınde atalǧan ortalyqtar qala tūrǧyndarynyŋ 150 myŋnan astam ötınışın öŋdedı.
