Qalalyq qoǧamdyq keŋes töraǧasy Sansyzbai Esılov jürgızgen Astana äkımınıŋ bırınşı orynbasary Sergei Horoşunnyŋ eseptık kezdesuınde halyq üleskerlık qūrylys, jolauşylar kölıgı, äleumettık nysandar men tūrǧyn üi qūrylysynyŋ sapasy, eskı jäne apatty jaǧdaidaǧy baspanany süru mäselelerı boiynşa özderın tolǧandyratyn sūraqtarǧa jauap alu mümkındıgıne ie boldy. Osyndai formattaǧy kezdesu elordany ärı qarai damytu, halyqtyŋ tüitkıldı mäselelerın şeşu maqsatynda alǧaş ret ūiymdastyrylyp otyr.
«JAǦALAU – 4» JYRY
Kezdesude qoiylǧan sūraqtardyŋ denı üleskerlık qūrylys turaly boldy. Elorda tūrǧyny Bauyrjan Äbdıhalyqov kezınde «Jaǧalau-4» tūrǧyn üi keşenınen päter alamyn dep qarjy salǧan. Alaida qūrylys sozylyp ketken soŋ, qazır aqşasyn qaitaryp alǧysy keledı. Būl nysan qūrylysyn «Jaǧalau» tūrǧyn üi-qūrylys kooperativı bastap, aiaqtai almai qalǧan. Qazır qūrylysty aiaqtaudy basqa kompaniia moinyna aldy. «Keiıngı kompaniia ielerı ainyp ketken üleskerlerge aqşany qaitaru kerektıgın bıle me eken? Osy mäsele menı ǧana emes, özge de būrynǧy üleskerlerdı mazalaidy» dedı sūraq qoiuşy.
«Elbasy men Ükımet tüitkılderdı tuyndatqan üleskerlık nysandar qūrylysyn aiaqtauǧa järdemdesu turaly şeşımge keldı. Memleket tarapynan qaitarym negızınde qarjy tört jylǧa bölınedı. Belgılengen merzımge deiın barlyq nysandar salynyp bıtuı tiıs. Sol üşın ökılettı ūiym qūryldy. Būl ūiymǧa sot şeşımımen berıletın aktivter nemese aiaqtalmaǧan nysandardaǧy bos kölemder satylǧan jaǧdaida jūmsalǧan qarjyny qaitaruǧa mümkındık beredı. Ol üşın tehnikalyq jäne qarjylyq audit jasalyp, saraptamadan ötken jobalyq-smetalyq qūjattama ūsynylady. Ökılettı ūiym būl qūjattardy qarap, şeşım qabyldaidy» dedı S.Horoşun.
Onyŋ aituynşa, «Jaǧalau-4» tūrǧyn üi keşenınıŋ būrynǧy üleskerlerıne aqşany qaitaru kestesı jasaldy. Salǧan qarjyny 200-ge juyq adam qaitarǧysy kelıp otyr. Aqşa kestege säikes qaitarylyp jatyr. Bıraq būl kestenıŋ oryndalmai jatqandyǧy turaly äkımdıkke şaǧymdar tüsken.
Kezdesuge qatysqan qūrylys kompaniiasynyŋ jetekşısı Sergei Kotliarovtyŋ sözınşe, «Jaǧalau-4» boiynşa būrynǧy üleskerlerge 600 mln teŋge bereşek qaldy. Aqşa jeke investordyŋ qosymşa qarjylandyru esebınen qaitarylyp jatyr. Būl investor ärtürlı jūmystarǧa merdıgerdıŋ esepşotyna qazırgı künı 1 mlrd teŋgeden astam qarjy saldy. Osy qarjynyŋ ışınde būrynǧy üleskerlerge qaitarylatyn aqşa da bar. S.Kotliarov kesteden qalyp bara jatqandyqtaryn moiyndap, nauryz aiynyŋ aiaǧyna deiın bükıl qarjy qaitarylatynyn aitty.
«Medina», «Ūlytau», «Jetı jol», özge de tüitkıldı tūrǧyn üi keşenderı boiynşa mäseleler köterıldı. S.Horoşun olarǧa tiıstı jauaptardy berıp, şeşılmegen mäseleler vedomstvoaralyq komissiia otyrystarynda qaralatynyn jetkızdı.
JAŊA AVTOBUSTARDYŊ ÜLESI – 80 PAIYZ
Aijan Baimoldinova deitın tūrǧyn būryn et kombinaty jaqqa qatynaǧan №12 avtobus nege sol baǧdardan alynyp tastalǧanyn sūrady. Onyŋ aituynşa, qazır sonyŋ saldarynan sol jaǧalauǧa qatynaulary qiyndady. Şaǧymdanuşyǧa būl mäsele boiynşa «Astana LRT» basşysyna aldaǧy düisenbı künı keluın ūsynǧan äkımnıŋ bırınşı orynbasary qajettık tuyndasa, kez kelgen beisenbı künıne özınıŋ qabyldauyna jazyla alatynyn aitty.
Jalpy byltyr Astana äkımdıgı 380 jaŋa avtobus satyp alǧanyn, alaida olardyŋ bärın tiıstı baǧdarlarǧa jıberu üşın belgılı bır jūmys atqaryluy tiıstıgın, qazırgı taŋda osyndai avtobustardyŋ 80 paiyzy jolauşylardy tasymaldap jürgenın jetkızdı.
JAPANDAǦY JALǦYZ ÜI
Saryarqa audanyna qarasty Avtomatika kentı №6 mekenjaiynda japandaǧy jalǧyz üi ornalasqan. Onyŋ maŋaiyndaǧy eskı jäne apatty üiler tiıstı baǧdarlamaǧa kırıp, sürınıp tastaldy. Sol jalǧyz üidıŋ tūrǧyny baspanasynyŋ nege sol baǧdarlamaǧa kırmegenın sūrady. «22 jyl boiy jylusyz tūru mümkın be? 2014 jyldan berı üiımızdı tūruǧa jaramsyz etıp tapsyn dep jantalasyp kelemın. Komissiia üi 47 paiyzǧa ǧana tozǧan dep körsetıp, jalǧan tehnikalyq akt jasady. Onda jylu qūbyry trassasynyŋ 80 paiyzy tozǧan dep jazylǧan. Jylu qūbyry joq bolsa, qalai tozady? Gaz joq, ystyq su joq, kärız jüiesı ekı jyldan berı jertölege aǧuda. Mūny öz küşımızben jöndep kördık, bıraq qys kelısımen jylu bolmaǧandyqtan, qūbyrlar taǧy jarylady, taǧy da jertölege baryp qūiylady» dedı tūrǧyn. Būǧan jaǧdaidan habardar ekenın aitqan S.Horoşun kelesı aptada audandyq äkımdık jäne tūrǧyn üi inspeksiiasy ökılderımen üidı baryp köretının sendırdı.
B.Mailin 20/6 mekenjaiynda 150 orynǧa arnalǧan balabaqşa salynyp, qūrylystyŋ 80 paiyzy aiaqtaldy. Onyŋ iesınıŋ aituynşa, jylu qūbyryna qosylu ǧana qaldy. Alaida «Astana-Teplotranzit» AQ jylu trassasyn keŋeitudı talap etıp otyr. «Men bır ret ony keŋeittım. Basqa emes, balabaqşa syndy äleumettık nysandy saldym ǧoi. Osy jaǧynan kömek berseŋızder» dedı ol. Qala äkımınıŋ orynbasary jauapty basqarmaǧa eşqandai qosymşa talaptarsyz būl mäselenı dereu şeşudı tapsyrdy.
KEMŞILIKTERDI QŪRYLYS SALUŞY JOIýY TİIS
Byltyr paidalanuǧa berılgen «Expo Towers» tūrǧyn üi keşenınıŋ tūrǧyndary üidıŋ sapasyna şaǧymdandy. Olardyŋ aituynşa, üidıŋ qabyrǧalary jarylyp, terezelerden päterlerıne jel kıredı, lift pen örtke qarsy jüie jūmys ıstemeidı. Qazır tūrǧyndar qūrylys saluşy kompaniiamen sottasyp jatyr. Alaida eş ılgerıleu baiqalmaidy.
«Soŋǧy üş ai kölemınde atalmyş üidıŋ bastamaşy tobymen üş ret kezdestım. Soŋǧy kezdesu ötken särsenbı künı öttı. Qalpyna keltırıluı tiıs jūmystardyŋ tızımı jasaldy. Būl tızımdı Astana qalasynyŋ memlekettık säulet-qūrylys baqylau basqarmasynyŋ, tehnikalyq inspeksiia, tūrǧyn üi inspeksiiasy jäne säulet ökılderı jasady. Menıŋşe, bır ai ışınde merdıger negızgı olqylyqtardy joia aluy tiıs. Jylu mausymy aiaqtalǧan soŋ, iaǧni, säuır-mamyr ailarynda ısteletın de jūmystar bar. Negızınen, barlyq kemşılıktı qūrylys saluşy kompaniia joiuy tiıs. Zaŋ boiynşa tiıstı kompaniia jüktelgen jūmysty oryndamasa, bız küştep oryndau turaly sotqa aryz bere alamyz. Eger sot şeşımı oryndalmaityn bolsa, qylmystyq ıs qozǧalady» dedı qala äkımınıŋ bırınşı orynbasary.
Kezdesude S.Horoşunǧa sūraqtar qoiylǧanymen qatar alǧys ta aityldy. «Aristo-Uspeh» tūrǧyn üi-qūrylys kooperativınıŋ müşelerı atynan kooperativ töraiymy Zämzagül Temırbolat äkımnıŋ bırınşı orynbasary basqaratyn vedomstvoaralyq komissiia jūmysyna mäselelerın şeşıp bergenı üşın raqmet aitty.
Jalpy üş saǧatqa sozylǧan kezdesude äkımnıŋ bırınşı orynbasaryna otyz adam sūraq qoiyp ülgerdı. Sūraq qoiyp ülgermegenderdı äkımnıŋ bırınşı orynbasary kezdesu aiaqtalǧan soŋ jeke qabyldady.
Amanǧali QALJANOV
