Turistık polisei – Qūlpynai
![](https://astana-akshamy.kz/wp-content/uploads/2022/03/dsc_5116.jpg)
Er adamdarmen iyq tırese eldıŋ qauıpsızdıgın qorǧap jürgen äiel tärtıp saqşylary az emes. Solardyŋ ışınde elordanyŋ körnekı oryndarynyŋ maŋaiynan turistık polisiiada ısteitın erekşe jūmys kiımındegı näzık jandardy da körıp qalamyz. Nūr-Sūltan qalasy polisiia departamentı patruldık polisiia polkı turisterge qyzmet körsetu vzvodynyŋ qyzmet aǧa inspektory, polisiia aǧa leitenanty Qūlpynai Täŋırbergen de – solardyŋ qatarynda.
Qazaqstanda turistık polisiia qyzmetı «QR turizm industriiasyn damytu» memlekettık baǧdarlamasyn ıske asyru aiasynda 2019 jyly qūryldy. Sodan berı Türkıstan, Şyǧys Qazaqstan, Almaty, Soltüstık Qazaqstan oblystary jäne elordada turistık polisiia qyzmetı aşyldy. Bas qalada mūndai beketter eŋ maŋyzdy 4 körnekı oryn maŋaiyna, atap aitqanda, «Bäiterek», «Qazaq elı» monumentterı, EKSPO körmesı jäne «Ǧaşyqtar» parkı janyna qoiylǧan. Elorda vzvodyndaǧy 18 poliseidıŋ jartysy – äielder. Olardyŋ basqa poliseilerden artyqşylyǧy – bırneşe şetel tılderın bıletındıgı. Sebebı olardyŋ basty mındetı – elımızde qalai jüru erejelerın turisterge, şeteldık jäne azamattyǧy joq adamdarǧa tüsındıru, turistık obekt aimaǧynda şeteldıkterge qatysty qūqyqbūzuşylyqtar anyqtalǧan kezde sol turaly akt toltyryp, jaqyn jerdegı ışkı ıster basqarmasyna joldau, olarǧa keŋes berıp, sanyna esep jürgızu. Qūlpynaidyŋ aituynşa, turister körnekı nysandardy köruge jyldyŋ barlyq mezgılınde keledı, degenmen kün jylyǧanda, äsırese mamyr men qyrküiek ailary aralyǧynda olardyŋ qatary köbeiedı.
– Olar köbıne toqtaǧan qonaqüilerıne qalai jetu kerektıgın, basqa körnekı oryndarǧa qalai baruǧa bolatynyn nemese qazaqtyŋ ūlttyq taǧamdaryn qai jerden jeuge bolatynyn sūraidy. Negızınen, Türkiia, İtaliia elderınıŋ jäne t.b. elder azamattary kelıp, aǧylşyn nemese türık tılınde sūraq qoiady. Künıne kem degende 2-3 adam keledı. Turister elordanyŋ ädemılıgın, qazaqtardyŋ qonaqjai ekenın tamsana aityp ketedı, – deidı Qūlpynai.
Qūqyq qorǧau organdary salasynda 2015 jyly eŋbek jolyn bastaǧan Qūlpynai üşın tıl bılu asa qiyndyq keltırmedı. Sebebı alǧaşqy joǧary bılım alǧan oqu ornynda türık-aǧylşyn tılderın tereŋdetıp oqyǧan edı. Onyŋ üstıne ol barlyq vzvodtaǧylarmen bırge aǧylşyn tılınen 3 ailyq kursty oqyp, sertifikat aldy. Aǧylşyn tılın «Elementari» deŋgeiınen joǧary bılgender turistık polisiiaǧa öte alady. Tıl bıluden bölek, olar jūmystan tys uaqytta küres jauyngerlık täsılderınen jattyǧuǧa maşyqtanady. Öitkenı keide qoǧamda türlı keleŋsızdıkter bola qalǧan jaǧdaida kez kelgen qauıp pen qaterge daiyn boluy kerek. Bıraq Qūlpynaidyŋ 7 jyldyq täjıribesınde ömırıne qauıp töngen oqiǧalar kezdespegen.
– Türkiiadan kelgen erlı-zaiyptylar EKSPO aumaǧynda balalaryn syrǧanaqqa äkelgende, äielı qatty qūlap jaraqat alǧan, sony jedel järdem şaqyrtyp, auruhanaǧa jetkızude özım bırge erıp jürdım. Öitkenı olardyŋ jaǧdaiyn därıgerlerge tez tüsındıru kerek boldy. Barlyq rentgen, basqa da därıgerler tekseruı kezınde qastarynan tabyldym. Sol üşın artynan maǧan Türkiia elşılıgınen Alǧys hat jariialandy. Bekette köbıne bır er, bır äiel adamnan tūramyz. Ortalyqpen ünemı rasiia arqyly bailanysyp otyramyz. Keudemızde beinetırkegış ılınıp tūrady, soǧan barlyq ıs-äreketımız jazylyp, tırkeledı. Sondyqtan özım süiıp taŋdaǧan qyzmetımnıŋ qiyndyǧynan qyzyǧy basym, – deidı keiıpkerımız. Türkıstannan elordaǧa kelıp, elınıŋ ǧana emes, şeteldıkterdıŋ de qauıpsızdıgı üşın qyzmet etıp jürgen Qūlpynai mamandyǧymen maqtanady.