Keşe Elbasy Nūrsūltan Nazarbaev Qyrǧyzstannyŋ Şolpan-Ata qalasynda ötken Türkı keŋesınıŋ VI sammitın aşty. «Jastar saiasaty jäne ūlttyq sport türlerı salasyndaǧy yntymaqtastyq» degen taqyryptaǧy biylǧy basqosuǧa Qazaqstan, Qyrǧyzstan, Äzerbaijan, Türkiia prezidentterımen qatar Özbekstan basşysy Şavkat Mirzieev pen Vengriianyŋ ükımet basşysy Viktor Orban da qatysty.
Elbasy Nūrsūltan Nazarbaev Türkı keŋesıne töraǧalyq etudı Qyrǧyz Respublikasyna tapsyryp, ūiymnyŋ jetekşısı retınde zor tabystar tıledı. Sammit barysynda bırqatar maŋyzdy qūjattarǧa qol qoiyldy. Keŋes müşelerı Şolpan-Ata deklarasiiasyn qabyldady. Al Türkı keŋesınıŋ Bas hatşysy qyzmetıne Qazaqstannyŋ ökılı sailandy. Aita keterlık jait, biylǧy sammittıŋ aituly jaŋalyǧynyŋ bırı – Qazaqstan Prezidentınıŋ jaŋa bastamasy. Nūrsūltan Nazarbaev alqaly jiynda «Türkı älemınıŋ körnektı 100 tūlǧasy» atty jaŋa auqymdy jobasyn ūsyndy. Elbasynyŋ būl bastamasy «Qazaqstannyŋ 100 jaŋa esımı» atty jobaǧa negızdelgen. «Qazaqstanda «Ruhani jaŋǧyru» baǧdarlamasy tabysty jüzege asyryluda. Menıŋ tapsyrmam boiynşa, latyn grafikasyna negızdelgen qazaq tılınıŋ jaŋa älıpbiı daiyndaldy. Qazaqstannyŋ latynǧa köşuı – būl öte jaǧymdy jaŋalyq. Öitkenı jazu arqyly türkıtıldes memlekettermen jaqyndasa tüsemız. «Ruhani jaŋǧyru» baǧdarlamasy aiasynda «Qazaqstannyŋ 100 jaŋa esımı» degen jobany ıske asyryp jatyrmyz. Bızdıŋ tarlan tarihymyzda körnektı tūlǧalar öte köp. Osyǧan orai, Türkı keŋesı şeŋberınde «Türkı älemınıŋ körnektı 100 tūlǧasy» atty auqymdy jobany qolǧa alu mümkındıkterın qarastyrudy ūsynamyn» dedı Nūrsūltan Nazarbaev.
Sonymen qatar, Qazaqstan Prezidentı Türkı keŋesınıŋ basqaruşy organdarynyŋ qyzmetın oŋtailandyryp, tiımdılıgın arttyru mäselelerıne arnaiy toqtaldy.
Aita keterlıgı, Türkı keŋesı 2009 jyly 3 qazanda Nūrsūltan Nazarbaevtyŋ bastamasymen qūrylǧan bolatyn. Onyŋ alǧaşqy sammitı 2011 jyly Almatyda öttı. Bügıngı taŋda bedeldı ūiymnyŋ qūramyna Qazaqstan, Qyrǧyzstan, Äzerbaijan jäne Türkiia kıredı.
