Elımızde «Sifrlyq Qazaqstan» memlekettık baǧdarlamasy şeŋberınde bıraz ıs-şaralar atqaryldy, äsırese halyqqa qyzmet körsetetın ortalyqtyŋ jūmysy jandandy. Adamdar sarylyp kezek kütpei, qoldaǧy ūialy telefonmen bıraz şaruany tyndyrudy üirendı. Qazır jaŋa ǧasyr jaŋalyǧy bırqatar salaǧa dendep endı dep aituǧa bolady. Ekı jyl būryn elordada balabaqşaǧa joldama alu da elektrondyq jüiege köştı. Osy özgerıske özım qatty quandym. Öitkenı ülken qyzymnyŋ jasy kelse de, kezegı kelmei, ony bıraz kütıp, balabaqşaǧa qolymyz äreŋ jetken edı. Sonyŋ zary ötıp kettı me, endı joldama alu jeŋılder dep oiladym. Söitsem, erte quanyppyn. Nege deisız ǧoi… Aitalyq.
Jazda ūlym ekıge toldy. Endı kelınşegım jūmysqa şyǧatyndyqtan ony balabaqşaǧa bereiık dedık. Kezekke de tūryp qoiǧanbyz. Joldamany indigo avtomatty jüiesı arqyly alasyz. Mūnda qaladaǧy memlekettık balabaqşalardaǧy bos oryndar körsetıledı. Bıraq osy «bos orynǧa» qol jetkızu öte qiyn. Mıne, ekı aidan berı zaiybym ekeumız taŋǧy alty jarymnan tūryp, telefonǧa üŋılemız. Beinelep aitqanda, tyşqan aŋdyǧan mysyq sekıldımız. Tura saǧat taŋǧy 7:00-de balabaqşadaǧy ekı-üş bos oryn jylt etıp şyǧady da, äp-sätte joq bolady. Kei künderı mülde joldama bolmaidy. Mäselen, ötken aptada 50-ge juyq memlekettık tapsyrys alatyn jekemenşık balabaqşadaǧy bos oryndar şyqty, sonyŋ bärı 20 sekundqa jetpei joq boldy. Telefon nüktesın basuǧa ülgermedık. Atalǧan jüiedegı «tehnikalyq kömekke» de jügındık, odan da nätije bolmady. Amal joq, qazır balamdy bırde qalanyŋ şetındegı ata-enemnıŋ üiıne, endı bırde körşı äjeige, ol bolmaǧanda biyl bırınşı synypqa barǧan qyzym ekeuın üige tastap ketıp jürmız. Al jekemenşık balabaqşaǧa bereiık desek, onyŋ baǧasy «aspandap» tūr.
Taǧy bır baiqaǧanym, jalpy Esıldıŋ sol jaǧalauyndaǧy balabaqşalardan joldama alu mümkın emes. Öitkenı olar jüiege öte sirek şyǧady. Qaita, şahardyŋ şet aimaqtary – İlinka, Michurin, İnternasional tūrǧyn alabyndaǧy balabaqşadan oryn aluǧa mümkındık köp.
Qoryta aitqanda, būl elektrondyq jüienı älı de jetıldıre tüsetın tūsy köp. Öitkenı onda joldama alǧandardyŋ sany, ony kım alǧany naqty körsetılmeidı. Sodan kelıp kümän tuady. Bärı de aşyq bolǧan jön. Būryn jaŋa jüiege deiın balabaqşaǧa oryndy Bılım basqarmasy qūrǧan komissiia anyqtap, joldamany sol berdı. Elektrondymen bırge būrynǧy jüie de jalǧasyn tapsa deimın. Öitkenı ata-anada taŋdau bolu kerek.
